តាំងពីបានចេញមុខក្នុងកម្មវិធីកម្សាន្តរបស់ទូរទស្សន៍CNC គេកត់សម្គាល់ថាពិធីការិនីនាង មាស សុវណ្ណរតនា ទទួលបានឱកាសច្រើននៅតាមកម្មវិធីក្រៅឆាក។ អ៊ីចឹងហើយទើបបានជារឿងឯកជនរបស់នាងពាក់ព័ន្ធនឹងការប្រកាសប្ដឹងចំពោះក្រុមអ្នកដើរបង្ខូចឈ្មោះបងស្រី និងគ្រួសារនៅលើហ្វេសប៊ុក បានក្លាយជារឿងរសើប និងមានអ្នកតាមដានពីរឿងរបស់នាង។

មាស សុវណ្ណរតនា បានអះអាងថា រឿងរ៉ាវដែលបានកើតឡើង គឺផ្ដើមចេញពីអ្នកឈ្នានីសមួយក្រុម ដែលបានប្រើសម្ដីវាយប្រហារទៅលើបងស្រីរបស់នាង និងគូដណ្ដឹងរហូតធ្វើឲ្យទំនាក់ទំនងស្នេហាររវាងបងស្រី និងគូដណ្ដឹងឈានដល់បញ្ហារង្គោះរង្គើ។ នាងប្រកាសចេញមុខប្ដឹងលើករណីនេះ បន្ទាប់ពីពាក្យសម្ដីវាយប្រហារកាន់តែមានកម្រិតប៉ះពាល់ធ្ងន់ធ្ងរទៅៗចំពោះកិត្តិយស និងមុខមាត់គ្រួសារ ដោយមិនមែនតែបងស្រីរបស់នាងម្នាក់។ នាងថាបញ្ហាផ្ដាច់ពាក្យ គ្រួសារអាចទទួលយកបានបន្ទាប់ពីមានចម្រូងចម្រាស់កើតឡើងមិនចេះអស់មិនចេះចប់ ហើយ ហើយភាគីខាងប្រុសមិនមានចេតនាដោះស្រាយលើក្រុមឈ្នានីស។ ប៉ុន្តែអ្វីដែលគ្រួសារនាងទទួលយកមិនបានគឺការបង្ខូចឈ្មោះ ដែលនាងត្រូវតែដាក់ពាក្យបណ្ដឹងពីបទបរិហាកេរ្ត៍។ នាងថាអ្នកដើរ និយាយបង្ខូចឈ្មោះចំពោះបងស្រីនាងសុទ្ធតែបានដឹងខ្លួនថា ពួកគេបានធ្វើអ្វីខ្លះ ហើយបើភាគីទាំងនោះមិនធ្វើការសុំទោសជាសាធារណៈឲ្យនាង និងគ្រួសារបានអស់ចិត្តទេ នោះការប្រឈមមុខគ្នា ផ្លូវច្បាប់នឹងជៀសមិនផុត ។ នាងថាជំហាននៃការអត់ធ្មត់លែងមានទៀតហើយ បន្ទាប់ពីរឿងរ៉ាវដែលបានកើតឡើង គឺចេញពីមនុស្សតែមួយក្រុម ហើយវាដដែលខ្លាំងពេក។ នាង និងគ្រួសារសម្រេចចិត្តដាក់បណ្ដឹង ដោយខាងមេធាវីនឹងចាត់ការប្រមូលភស្ដុតាង ក្នុងការដាក់បន្ទុកលើអ្នកបរិហាកេរ្តិ៍មិនពិតពីបងស្រីខ្លួន និងគ្រួសារខ្លួន ទៅកាន់ប្រព័ន្ធច្បាប់ឆាប់ៗបើគ្មានការសុំទោស។ នាងថាចង្កៀងផ្ទះអ្នកណាភ្លឺផ្ទះអ្នកនឹង ដូច្នេះអ្នកដែលវាយប្រហារចំពោះបងស្រីនាង និងគ្រួសារនាងដោយពាក្យប្រមាថខុសពីការពិតមិនអាចចេះតែនិយាយបានទេ ដោយសារសម្ដីទាំងនោះក្រៅពីធ្វើឲ្យគូដណ្ដឹងដែលស្រឡាញ់គ្នា៤ឆ្នាំត្រូវប្រេះស្រាំ ក៏ធ្វើឲ្យគ្រួសារនាងខូចឈ្មោះធ្ងន់ធ្ងរ។

ជាមួយនឹងការប្រកាសប្ដឹង មាស សុវណ្ណរតនា ក៏ប្រកាសថានឹងបញ្ចេញមុខមាត់ របស់អ្នកបរិហាកេរ្តិ៍ ពីគ្រួសារនាងជាសាធារណៈផងដែរ ដើម្បីឲ្យបុគ្គលនោះភ្ញាក់រលឹក និងដើម្បីកុំឲ្យបុគ្គលនោះបន្តឈឺឆ្អាលរឿងរ៉ាវ ក្នុងរង្វង់គ្រួសាររបស់នាងទៀត។ នាងថាមានតែវិធានការក្ដៅ និងការជម្រើសផ្លូវច្បាប់ប៉ុណ្ណោះ ទើបអាចដោះស្រាយបញ្ហា ដែលបានកើតឡើង តែនាងនឹងទុកពេលចុងក្រោយឲ្យជនទាំងនោះ សារភាពកំហុសថាអ្វីដែលខ្លួនបានសាបព្រួសចេញពីមាត់កន្លងមកគឺជារឿងបង្ខូចឈ្មោះដោយចិត្តឯង ដើម្បីបញ្ចប់រឿង។ នាងថាខ្លួនមិនចង់បានថ្លៃជំងឺចិត្តពីបណ្ដឹងនោះទេ ប៉ុន្តែបើបង្ខំឲ្យនាងដាក់បណ្ដឹង គឺសំណងផ្លូវចិត្តពីការប៉ះពាល់កិត្តិយសគ្រួសារ ត្រូវតែធ្វើតាមច្បាប់។
មកទល់ពេលនេះ ជម្លោះរវាងមាស សុវណ្ណរតនា និង ក្រុមអ្នកឈ្នានីសបងស្រីត្រូវគេមើលឃើញថាឡើងកំដៅផង និងបន្ថយកំដៅផង ដោយសារតែអ្នកដែលបានបង្ខូចឈ្មោះនៅតែផ្គើន ហើយក៏មានម្នាក់ក្នុងចំណោមនោះចេញមុខសុំទោស។ នាងថាដរាបណាគ្មានការសុំទោស បណ្ដឹងផ្លូវច្បាប់ត្រូវតែកើតឡើង ដើម្បីបញ្ចប់រឿងច្រំដែល ដែលប៉ះពាល់គ្រួសារកុំឲ្យនៅសារចុះសារឡើង៕