តារាចម្រៀង ជើងចាស់ លោក សាន ផានិត កាលរាត្រីថ្ងៃទី៧ ខែកុម្ភ: ឆ្នាំ២០១៧ បានធ្វើការផ្តល់មតិសំខាន់ៗ ជូនដល់ យក់ ឋិតរដ្ឋា តាមរយ: Post Komsan ក្រោយនាងចាកចេញពីហង្សមាស ។
ខាងក្រោមនេះគឺជាមតិ ឬអនុសាសន៍ ដែល សាន ផានិត បានផ្តល់ឲ្យ តារាចម្រៀងស្រីខាងលើ និងក្រុមហ៊ុន ៖
និយាយពីដំណោះស្រាយ ក្នុងនាមខ្ញុំយល់ពីអារម្មណ៍តារាល្បី ដើម្បីឲ្យល្អទាំងសង្ខាង សម្រាប់ផលិតកម្ម និងយក់ ឋិតរដ្ឋា ខ្ញុំគិតថា នាងមិនគួរដាក់ពាក្យឈប់នោះទេ តែសម្រាប់កុងត្រាបន្តយើងត្រូវនិយាយមុន គួរដាក់ពាក្យស្នើរសុំ ដោយត្រូវជាតួសំខាន់១ក្នុងចំណោម តួល្បីសម្រាប់គម្រោងផលិត និងទីផ្សារ ឬអ៊ីវិន ផ្សេងៗសម្រាប់រកលុយ ដូចជា ខនសឺត ស្ពតពាណិជ្ជកម្ម ។
លោកថា សម្រាប់កុងត្រាបន្តនោះ យក់ ឋិតរដ្ឋា ត្រូវស្នើរដោយ មិនត្រូវធ្វើជាតួបំរុងទេ ហើយបើគាត់ទាមទារចំណុចមួយនេះ បានគាត់ នឹងមិនមានបញ្ហាផ្លូវចិត្តឡើយ ។ បើក្រុមហ៊ុន អូខេត្រង់ចំណុចហ្នឹង នោះក្រុមហ៊ុននឹងផ្តោតលើការរៀបចំបទចម្រៀង ផ្តល់ឲ្យបទសំខាន់ ក្នុងអាលប៊ុម និងប្រូម៉ូតលើទូរទស្សន៍។
លោកថាចំណុចអវិជ្ជមានវិញ បើទាមទារចំណុចនេះ មិនបានទេ វានឹងមិនល្អទាំងក្រុមហ៊ុន និងតួ។ លោកបន្តទៀតថា កាលពីដើម យក់ ឋិតរដ្ឋា ស្ថិតក្នុងកំពូលតារា ដោយល្បីជាង អាញ្ញា(ឱក សុគន្ធកញ្ញា) បើទោះបីជាមិនមានសម្រស់ស្អាតជាង អាញ្ញា និងមានកូន តែបើក្រុមហ៊ុន មានចិត្ត នៅតែមានវិធីធ្វើឲ្យតួនេះល្បីដដែល។
លោកបន្តថា សម្រាប់លោកវិញ គឺលោកត្រូវទាមទារចំណុចខាងលើ នេះជាដាច់ខាត បើទោះបីជាខាងផលិតកម្មគិតថា យើងមោទនភាពបន្តិច តែរិតតែធ្វើឲ្យយើងតស៊ូ ដោយឈរលើគោលការណ៍ ខ្លួន ផលិតនូវអ្វីសម្រាប់ខ្លួនឯង ក្នុងវិថីសិល្ប:។
លោកថា ចំណុចល្អបំផុត សម្រាប់ក្រុមហ៊ុន គួរតែធ្វើ Rotation (ឆ្លាស់វេន) ឲ្យច្បាស់លាស់ ដោយក្នុងមួយឆ្នាំមានប៉ុន្មាន ត្រីមាស ឬជ្រុង ដោយរដូវកាលនេះត្រូវចេញ អ្នកចម្រៀងល្បីកំពូល ដោយអ្នកចម្រៀងហ្នឹងនៅមួយជ្រុងណា ដោយឱកាសតែ ១ត្រីមាសទេ គឺចាប់ពីខែ ១ដល់ខែ ៣ ។ ម្យ៉ាងវិញទៀត នៅសល់ ត្រីមាសផ្សេងទៀត ត្រូវទុកឱកាសឲ្យក្រុម Pop ក្រុម Rock ផ្នែកចម្រៀងR&B ជាដើម មានលក្ខខណ:ឲ្យវាវិលជុំ មួយឆ្នាំចុះឡើង ទៅវានឹងមានសន្តិភាព ។បើឲ្យតែតារាម្នាក់ ច្រៀងគ្រប់រស់ជាតិនោះ ច្បាស់ណាស់ នឹងធ្វើឲ្យមានសង្គ្រាមកើតឡើង ក្នុងក្រុមហ៊ុនជាមិនខាន។
ការផ្តល់នូវអនុសាសន៍នេះ លោក សាន ផានិតថា មិនមែនតែសម្រាប់ហង្សមាសទេ សម្រាប់ផលិតកម្មដទៃ គួរតែចាត់ចែងបែបនេះទៅ ទើបធ្វើឲ្យតារាជ្រកក្រោមដំបូលខ្លួនអាចរស់បាន។
បញ្ជាក់ផងដែរថា ម្សិលមិញនេះដែរ លិខិតសូមឈប់ របស់ យក់ ឋិតរដ្ឋា បានធ្លាយចេញ នៅលើបណ្តាញសង្គមហ្វេសប៊ុក យ៉ាងព្រោងព្រាត ដែលធ្វើឲ្យទស្សនិក គាំទ្រនាងមានអារម្មណ៍មិនសប្បាយចិត្តជួសនាង ៕
មតិយោបល់