ក្រោយពីរបួសជាសះ តារាសម្ដែងដែលរងហិង្សាយ៉ាងធ្ងន់ធ្ងរ ពីអតីតគូស្នេហ៍ នាងពេជ្រ អាវីហ្សា បានអះអាងថានាងនឹងឡើងទៅប្រទេសថៃ នៅដើមខែធ្នូនេះ ដើម្បីថែមថយផ្នែកខ្លះ ក្រោយពីរងផលប៉ះពាល់ ដោយការវាយតប់របស់គូស្នេហ៍។ នាងថារបួសសះហើយ ប៉ុន្តែស្នាកស្នាម និងបញ្ហាប៉ះពាល់លើផ្ទៃមុខ គឺនៅតែមានការប្រឈមនៅឡើយទេ ទើបនាងសម្រេចចិត្តទៅជួបវេជ្ជបណ្ឌិត របស់ប្រទេសថៃភ្លាមៗ ដើម្បីកែកុនផ្នែកខ្លះ ។

ពេជ្រ អាវីហ្សា និយាយនាងលែងសូវបានដឹងដំណឹងពាក់ព័ន្ធនឹង លោកគៀងហេង ជាអតីតគូស្នេហ៍ទៀតហើយ បន្ទាប់ពីពាក្យបណ្ដឹងរបស់នាងត្រូវបានបញ្ជូនដល់ដៃតុលាការ និងក្រោយពីនាងបានចូលបំភ្លឺលើសំណុំរឿង នៅខេត្តព្រះសីហនុ។ នាងថារឿងនោះនឹងត្រូវចាត់ការបន្ត ក្នុងពេលបន្តបន្ទាប់ ហើយនាងក៏ហាក់យល់ថាខ្លួនទទួលបានយុត្តិធម៌ តាមការទាមទារចង់បានផងដែរ បើទោះជាតុលាការមិនទាន់ឈានដល់ ចេញសាលក្រមលោកគៀង ហេង ដែលជាសាច់ញាតិភរិយា លោកឧកញ៉ាទ្រី ភាព ពីបទគំរាមកំហែង និងប្រើអំពើហិង្សា តាមការចោទប្រកាន់នៅឡើយ។ នាងថាអ្វីដែលនាងចង់បានគឺសេរីភាព ចឹងកិច្ចការបន្ទាប់ពីនោះគឺនាងយល់ថានាងលែងចង់ដឹង។ នាងអះអាងថាអ្វីដែលនាងត្រូវធ្វើបន្ត សម្រាប់ជីហានជីវិតគឺទៅព្យាបាលបញ្ហាច្រមុះ និងមុខឲ្យអស់បញ្ហាជាមុនសិន មុនពេលនាងនឹងទទួលចេញមុខ នៅក្នុងពិភពសិល្បៈជាថ្មី ។

យ៉ាងណាមិញ នាងក៏ថ្ងូររឿងថ្លៃព្យាបាល និងស្ថានភាពមិនមានប្រាក់ចំណូល ចាប់តាំងពីមានរឿងរ៉ាវកន្លងមកផងដែរ ដោយសារតែនាងអត់បាន ទទួលប្រាក់ថ្លៃព្យាបាល និងសំណងជំងឺចិត្តពីលោកគៀង ហេង និងគ្រួសារក្រោយការរងគ្រោះ។ នាងថាខ្លួននឹងចេញមុខ ទទួលសិល្បៈជាថ្មី ដរាបណាការកែកុនសម្រស់ដែលបានប៉ះពាល់ នៅក្នុងប្រទេសថៃត្រូវបានបញ្ចប់ ថ្មីដ្បិតតែនាងមិនទាន់ច្បាស់ថានឹងឡើងទៅថៃ ឲ្យប្រាកដពេលណា និងរហូតដល់ពេលណាទើបផ្ទៃមុខ ត្រូវបានស្រស់ផូរផង់ជាថ្មី ៕