យោងតាមសំណេរមួយខ្លីរបស់តារាសម្ដែងនាង មាស សម្ផស្ស គឺចំណងស្នេហា៤ឆ្នាំរបស់នាង និងលោក William ជាគូដណ្ដឹងក្រោមដំបូលផ្ទះតែមួយ និងជាអណិកជនអាមេរិកនោះស្ថិតក្នុងភាពរង្គោះរង្គើ។ មកទល់ពេលនេះដំណឹងបែកគ្នារបស់ពួកគេកាន់តែធ្វើឲ្យម្នាក់ៗភ្ញាក់ផ្អើល ជាពិសសបន្ទាប់ភាគីខាងស្រីផុសជាសាធារណៈថាសុំបញ្ចប់ស្នេហាដែលបានកើតឡើង។ បើទោះជាបានលុបចោលភ្លាមៗក្រោយពីផុសសំណេរបង្ហាញពីដំណឹងរង្គោះរង្គើស្នេហ៍ ក៏ការភ្ញាក់ផ្អើលនៅតែកើតមានឡើងក្នុងចំណោមអ្នកសិល្បៈ និងអ្នកធ្លាប់កោតសរសើរអ្នកទាំងពីរ។

ភ្លាមៗបន្ទាប់ផុសធ្វើឲ្យផ្អើល នាងបានថ្លែងប្រាប់តាមឆាតថា មិនចង់និយាយអ្វីច្រើនពាក់ព័ន្ធនឹងភាពប្រេះស្រាំនេះទេ ដោយថាខ្លួនចង់ទុកការបែកបាក់ឲ្យបញ្ចប់ស្ងាត់ៗ។

យ៉ាងណាមិញ លោក លុយ វីលៀម ជាគូស្នេហ៍របស់នាងបានថ្លែងប្រាប់Post News ថា មាស សម្ផស្ស គ្រាន់តែមានអារម្មណ៍អន់ចិត្តចំពោះខ្លួនមួយពេល ហើយកើតអារម្មណ៍ចង់បែកប៉ុណ្ណោះ។ លោកថារវាងខ្លួន និងគូស្នេហ៍អត់មានអ្វីត្រូវបែកបាក់នោះទេ ប៉ុន្តែមកពីក្នុងប៉ុន្មានថ្ងៃចុងក្រោយលោកមានការមមាញឹកនឹងការងារខ្លាំងពេក រហូតមិនមានពេលវេលាផ្ដល់ឲ្យគូស្នេហ៍ សូម្បីតែពាក្យសម្ដីផ្អែមល្ហែម ទើបនាងមានអារម្មណ៍គិតថាលោកបែកចិត្ត ហើយបង្ហោះថាពួកលោកបែកគ្នា។

លោកនិយាយថា«ខ្ញុំអត់មានអីទេ តែបងមិនដឹងស្រីៗគាត់ចង់ឲ្យយើងយកចិត្តយកថ្លើមនឹងណា ទើបយើងអត់សូវបានគិតពីគាត់ គាត់មានសតិអារម្មណ៍!»។ លោកថាក្នុងមួយរយៈចុងក្រោយលោកមិនដែលបានទៅណាមកណាជាមួយមាស សម្ផស្ស ទាល់តែសោះ ហើយចូលផ្ទះក៏យប់ណាស់ដែរ ដោយមិនដែលបាននិយាយអ្វីនឹងគ្នាផង ទើបចេះតែបណ្ដាលឲ្យនាងមានសតិអារម្មណ៍ហើយគិតថាលោកចង់បែក។ លោកនិយាយថា«ប៉ុន្មានថ្ងៃនឹងខ្ញុំរវល់ការងារផង ស្មុគស្មាញផង ហើយខ្ញុំចេះតែអត់ចង់ប្រាប់ឲ្យគាត់គិតច្រើនទើបគាត់ថាខ្ញុំមិចៗហ្នឹង ការពិតខ្ញុំអត់មានខួរក្បាលខូចខិលទេ ខ្ញុំរាល់ថ្ងៃគឺចង់រ៉ាប់រងតែឯង ហើយអត់ចង់ឲ្យគាត់មកគិតជាមួយទេ!»។

យ៉ាងណាមិញ លោកថាមកទល់ម៉ោងនេះអ្វីៗមានភាពរលូនវិញហើយ បន្ទាប់ពីមាស សម្ផស្ស ក៏បានដឹងថាអ្វីដែលសោះអង្គើយក្នុងប៉ុន្មានថ្ងៃចុងក្រោយ គឺដោយសារតែបញ្ហាសម្ពាធការងារ។ លោកថាខ្លួនកំពុងប្រឹងប្រែងរកលុយ ដោយសារលោកចង់រៀបការជាមួយគូដណ្ដឹងឲ្យផ្អើលពិភពសិល្បៈ ដោយមិនជម្រើសរួមរស់ស្ងាត់ៗបែបនេះរហូតទេ ដើម្បីបំពេញមុខឲ្យមាស សម្ផស្ស ដែលលោកថាខ្លួនស្រឡាញ់ស្មើជីវិត។ លោកថាខ្លួនគ្មានអារម្មណ៍បែកធ្វេងបែកស្ដាំនោះទេ ហើយក៏គ្មានខួរក្បាលទៅមមើមមាយរឿងចាប់អារម្មណ៍ស្រីណាប្រុសណានោះដែរ ក្រៅពីតែប្រឹងរកលុយធ្វើឲ្យគូស្នេហ៍សប្បាយចិត្តក្រោយពេលរៀបការ៕