បើនិយាយពីការសម្ដែង មហាជនមិនច្រើនប៉ុន្មានទេ ថាស្គាល់ថាតារាសម្ដែងនាងពីង រ៉ូហ្សា មានស្នាដៃអ្វីខ្លះ ប៉ុន្តែបើនិយាយពីដំណឹងចែកចាយថារវាងនាង និងតារាសម្ដែងឌុច លីដា គឺមានទំនងជាមានទំនាក់ស៊ីជម្រៅ ជាមួយគ្នាក្នុងនាមជាស្រីស្រឡាញ់ស្រី គឺមានអ្នកស្គាល់នាងច្រើន។ យ៉ាងណាក៏ដោយក្រោយពេលស្ងប់ស្ងាត់ ជាមួយព័ត៌មានដ៏រសើបមួយនោះ គេចាប់អារម្មណ៍នាងមានទីផ្សារ ក្នុងវិស័យភាពយន្ត និងឡើងកាលីបក្នុងសិល្បៈ។

ពីង រ៉ូហ្សា បានសារភាពថាក្រោយមានការភ្ញាក់ផ្អើលថានាង និងឌុច លីដា មានស្នេហាភេទដូចគ្នាកាលពីមួយរយៈមុន ផលិតករ និងមហាជនហាក់ស្គាល់នាងច្រើន។ នាងនោះជាព័ត៌មានឡើងកំដៅ ដែលរុញឲ្យនាងអាម៉ាសមុខ ប៉ុន្តែក៏ធ្វើឲ្យនាងឈានឡើង ក្នុងនាមជាតារាសម្ដែងផងដែរ។ អ្វីៗគឺមិនខុសពីក្រោយភ្លៀងមេឃស្រឡះនោះទេ ប៉ុន្តែក៏មិនមានន័យថានឹងចង់បង្កើត មានឲ្យមានការយល់ច្រលំពាក់ព័ន្ធនឹងរឿង ស្រឡាញ់ភេទដូចគ្នាជាមួយនឹងតារាសម្ដែងនាងឌុច លីដា។ នាងថាទំនាក់ទំនងជិតស្និទ្ធិ ក្នុងពេលថតរឿងជាមួយគ្នាជាមួយឌុច លីដា បានរុញឲ្យមានការយល់ច្រលំ ខណៈដែលព័ត៌មានស្រឡាញ់ភេទដូចគ្នា ដ្បិតថាបានជួយឲ្យនាងត្រូវបានផលិតករទាក់ទងឲ្យមានឱកាសសម្ដែង ប៉ុន្តែស្អុយឈ្មោះសឹងលាងមិនជ្រះ ជាពិសេសនៅពេលព័ត៌មានចរចាមអារ៉ាមបន្តសាយភាយ។

ពីង រ៉ូហ្សា ថាក្រោយស្អុយឈ្មោះនាងឆ្មក់បានតំណែងកាន់តែល្អ ក្នុងវិស័យភាពយន្តដូចជា បានសម្ដែងជាតួរងក្នុងរឿង«ណារ៉ូ និងសូម៉ាលី» របស់ទូរទស្សន៍CTN ។ អ្វីដែលនាងសប្បាយចិត្តបំផុត គឺនាងត្រូវបានលោកហ្វៃ សំអាង ផ្ដល់តំណែងឲ្យសម្ដែងជាតួអង្គជំទាវ ក្នុងរឿង«ទឹកភ្នែកព្រោះសម្រស់» ដែលគ្រោងនឹងដាក់ផ្សាយនៅលើ កញ្ចក់ទូរទស្សន៍អប្សរា ដែលចម្រុះដោយតារាល្បី ទាំងជើងចាស់ និងជើងថ្មី។ នាងថាការប្រឡូកសិល្បៈប្រមាណជាង២ឆ្នាំ កេរ្តិ៍ឈ្មោះរបស់នាងទើបតែត្រូវគេស្គាល់ច្រើន ដោយសារព័ត៌មានស្រឡាញ់ភេទដូចគ្នា ជាមួយនាងឌុច លីដា ប៉ុណ្ណោះ ប៉ុន្តែមកទល់ពេលនេះ ដោយសារតែឱកាសបានសម្ដែងក៏មានអ្នកស្គាល់រូបនាងជាងមុនផងដែរ។

នាងបានទទួលតំណែងជាតួអង្គកាន់តែលេចធ្លោក្នុងរៀងជាច្រើនទៀតដូចជារឿង«ដីបំណាស់ថ្មី» និងស្ពតពាណិជ្ជកម្ម។ ក្នុងនោះនាងក៏ឡើងកាលីបណាស់ដែរ ក្នុងក្រុមបង្ហាញម៉ូដ Cambodia Super Model របស់នាងឌួង ហ្សូរីដា ក្នុងនាមជាតារាម៉ូដែល។ ពីង រ៉ូហ្សា បានអះអាងថាក្រោយមានឱកាសសម្ដែងច្រើន ស្ថានភាពរកប្រាក់ក៏ល្អផងដែរ ទើបចុងក្រោយនាងមានជីវិត ហ៊ឺហារឡូយឆាយ ដែលមិនខុសពីតារាឡើងកូដទាំងការងារ និងការរស់នៅនោះ ៕