ភ្នំពេញ: កាលពីយប់ថ្ងៃទី៥ ខែឧសភា នៅក្លឹបកម្សាន្ត GL អតីតក្លិបកម្សាន្ត Classic Night ស្ថិតនៅជាប់ផ្លូវត្រសក់ផ្អែម បានធ្វើពិធីប្រកួតប្រជែងតារាភេទ៣ យ៉ាងអធឹកអធម ដើម្បីប្រគល់ពានតារាឆ្នើមប្រចាំឆ្នាំ២០១៦ ដល់អ្នកមានទេពកោសល្យ និងដើម្បីអបអរដល់ខួប១២ឆ្នាំរបស់ក្លឹប។ នៅក្នុងពិធីនោះ គេឃើញមានការបង្ហាញម៉ូដ និងសម្ដែងShow កំប្លុកកំប្លែងជាច្រើន ដើម្បីរំលេចពីសមត្ថភាព និងទេពសកោសល្យរបស់ក្រុមតារាភេទទី៣ ដែលភាគច្រើនគឺជាអ្នកប្រឡូកក្នុងនៅក្នុងសិល្បៈ។

លោក ខេវិន អ្នករៀបចំកម្មវិធីបានអះអាងថា ហេតុផលដែលនាំឲ្យមានកម្មពិធីប្រកួតប្រជែងតារាភេទទី៣ ប្រចាំក្លឹបនេះ គឺដើម្បីជាការលើកមុខមាត់ កុំឲ្យមានរើសអើង ដល់ក្រុមភេទទី៣ផង និងដើម្បីលើកទឹកចិត្តដល់ក្រុមភេទទី៣ ដែលមានសមត្ថភាព និងទេពកោសល្យសិល្បៈនោះផង។

អ្នកដែលបានឈានដល់វគ្គចុងក្រោយ ក្នុងកម្មវិធីប្រកួតប្រជែងនោះ មានចំនួន១៨នាក់ ដោយមួយចំនួនក៏ជាតារាភេទទី៣ ដែលមានបណ្ដាខេត្តផ្សេងៗពីគ្នា។

លោកថា អ្នកដែលបានឡើងប្រកួតនៅយប់ថ្ងៃទី៥ ឧសភា នោះនឹងជាប់ចំណាត់ថ្នាក់ទាំងអស់ដោយសារតែពួកគេត្រូវបានជម្រុះ និងបានពិនិត្យសមត្ថភាព ដោយក្រុមអ្នកផ្ដល់ពិន្ទុរបស់ក្លឹបរួចហើយ។

សែន ពិសិដ្ឋ ម្ចាស់ក្លឹបបញ្ជាក់ថា ពានដែលបានប្រគល់ជូនរួមមានតារាភេទទី៣ ដែលស្អាតប្រចាំឆ្នាំ២០១៤ តារាភេទទី៣ ដែលឆ្នើមខាងទេពកោសល្យប្រចាំឆ្នាំ និងតារាភេទទី៣ដែលមានប្រជាប្រិយភាពប្រចាំឆ្នាំ២០១៦។ នៅក្នុងពិធីនោះក៏មានការបង្ហាញនូវអត្តសញ្ញាណក្រមាដោយក្រុមភេទទី៣ និងមានការចូលរួមយ៉ាងច្រើនកុះករដោយភ្ញៀវកិត្តិយស ក្រុមផលិតករ និងតារាសិល្បៈល្បីឈ្មោះជាច្រើនរូបផងដែរ៕