វាហាក់ដូចជាកម្រកើតមាន ក្នុងពិភពសិល្បៈដែលបង្ហាញពីសកម្មភាព ស្បថ​ស្បែគ្នា ធ្វើជា​បងប្អូន យ៉ាងដូច្នោះ ។ ប៉ុន្តែសម្រាប់នាយ ចឺម និង​លោក ឈុន សុវណ្ណភក្តី ហៅនាយក្តី បាន​ធ្វើឲ្យពិភពសិល្បៈភ្ញាក់ផ្អើល​យ៉ាងខ្លាំង ក្រោយ​ពីនាយ​ទាំងពីរ​អុជ​ធូប​ស្បថ ធ្វើបងប្អូននឹងគ្នា​។

ស្របពេលនឹងពិធីខួបកំណើត​របស់លោក ឈុន សុវណ្ណភក្តី ដែលធ្វើឡើងនៅក្នុងគេហដ្ឋាន​លោកផ្ទាល់នៅ បុរីវិមានភ្នំពេញ នាយ ចឺម និងនាយក្តី បានធ្វើការស្បថស្បែគ្នា ធ្វើបងប្អូនធម៌ ក្រោមវត្តមានឪពុកម្តាយ​ទាំងសង្ខាង និង​មិត្តរួម​អាជីព​នៃពិភពសិល្បៈ ។​

នា​យ​ក្តី បានថ្លែង​ប្រាប់​ Post News ឲ្យដឹងថា លោកពិត​ជាសប្បាយរីករាយណាស់ ដែលលោកបានស្បថជាមួយនឹងនាយចឺម ធ្វើបងប្អូននឹងគ្នា។ នាយក្តីថា មូលហេតុដែលធ្វើឲ្យលោក និងនាយចឺម ចាប់ដៃគ្នា​ធ្វើបងប្អូនធម៌ យ៉ាងដូច្នោះ គឺដោយសារតែ​សកម្មភាព ខ្លួន​ដូចគ្នា​បេះបិទ រួម​ទាំងចិត្តផងដែរ ស្របពេលដែល​ថតខ្សែភាពយន្ត «អាស្ទើរទឹក​ប៉ះខ្មោចបែកស្លុយ» ។​

នាយ​ចឺម និងនាយក្តី បានថ្លែងបន្តរួមគ្នាថា លោកទាំងពីរនាក់ស្រឡាញ់គ្នា​ ដូចបងប្អូនបង្កើត ហើយការអុធធូបស្បថនេះ គឺមិនបានសម្លឹង​ឃើញអ្វីគ្នាទៅវិញទៅមកនោះទេ គឺចិត្តនិងចិត្តតែម្តង ។​

លោក ឈុន ឡាត់ ដែលត្រូវ​ជា​ឪពុកលោក ឈុន សុវណ្ណភក្តី ក៏បានឲ្យដឹងផងដែរថា ឃើញកូនៗស្បថសូមគ្នា ធ្វើបងប្អូនធម៌ យ៉ាងដូច្នោះ គឺលោកពិត​ជាសប្បាយរីករាយ ដែល​ទទួលបានសមាជិកថ្មីមួយទៀត ដែលត្រូវហៅថាកូន បន្ទាប់ពី កូនភក្តី ហើយសប្បាយរកអ្វីផ្ទឹមបាន៕​