ភ្នំពេញ: នេះជាលើកទី១ ហើយដែលអតីតសិស្ស សាលាបឋមសិក្សាបឹងត្របែកខាងត្បូង លោក កែវ សាស្ត្រា បានធ្វើតន្ត្រីរំលឹកគុណគ្រូ ដែលធ្វើឡើងនៅព្រឹកថ្ងៃទី១៤ ខែសីហា ឆ្នាំ២០១៦ ដោយមានការចូលរួមយ៉ាងច្រើនកុះករពីសំណាក់តារាល្បីៗ ក្នុងប្រទេសកម្ពុជា ។
តារាល្បីៗ ដែលចូលរួមក្នុងកម្មវិធីប្រគំតន្ត្រីខាងលើ មាន តារាៗដូចជា លោក សារុន កល្យាណ ហៅ Jimmy Kiss លោក ទ្រី សក្កដា លោក អាចារ្យធំ លោក ដួង សុខគា លោក នូ សំណាង លោក ជីង លោក អ៊ឹម រតន: និងតារាប្រុសស្រីល្បីៗ ជាច្រើនទៀត ក្នុងព្រះរាជាណាចក្រកម្ពុជា។
លោក កែវ សាស្ត្រា អតីតសិស្សសាលាបឋម សិក្សាបឹងត្របែកខាងត្បូង និង ជាអ្នកគៀងគរ អតីតសិស្ស ធ្វើការប្រគំតន្ត្រីរំលឹកគុណគ្រូ នេះឡើង បានប្រាប់ Post News ឲ្យដឹងថា កម្មវិធីនេះបង្កើតឡើង ដោយនឹកឃើញពីអតីតកាល ថា អ្នកគ្រូ លោកគ្រូ បានបូជាសាច់ស្រស់ឈាមស្រស់ ប្រើប្រាស់ភាសានេះ មិនមែនធ្ងន់ គឺមែន គាត់អ្នកខ្លះទៅស៊ីឈ្នួល ច្រូតត្រកួន ឲ្យគេ អ្នកខ្លះរត់ម៉ូតូឌុប អ្នកខ្លះទួលនំលក់ ការងារជាច្រើនទៀត ដែលពួកគាត់លះបង់ធ្វើ ហើយយកពេលវេលា ដើម្បីមានឱកាស បង្រៀនសិស្ស ក៏ដូចពួកយើង ។
លោក កែវ សាស្ត្រា ថា«ពិធីបុណ្យរំលឹកគុណគ្រូ នេះភាគច្រើនគេធ្វើឡើងនៅវិទ្យាល័យតាមខេត្ត តែមិនបានធ្វើនៅមឋមសិក្សានោះទេ ព្រោះថា សិស្សវិទ្យាល័យមានលទ្ធភាពតបស្នងគ្រូ ហើយសម្រាប់ខ្ញុំ ជ្រើសរើសយកការធ្វើពិធីនេះ ដល់គ្រូមឋមសិក្សា ដូចចាក់បេះដូងពួកគាត់ ដែលភាគច្រើនសិស្សមឋមសិក្សា គឺបាត់ដំណឹង ជាង ១០ ឆ្នាំពិបាកនឹងជួបគ្នា ហើយការបង្កើតពិធីនេះ ធ្វើឲ្យខ្ញុំអាចជួបអតីតសិស្សដែលបានរៀននៅទីនេះផងដែរ» ។
អ្នកនាង សុខឡេង អតីតសិស្សមឋមសិក្សាបឹងត្របែកខាងត្បូងក៏បាន មានប្រសាសន៍ថា កម្មវិធីនេះល្អ ដែលធ្វើឲ្យអ្នកនាង អាចជួប អតីតសិស្សដែលធ្លាប់សិក្សានៅទីនេះ ជិត ២០ឆ្នាំ ហើយកម្មវិធីនេះល្អ បង្ហាញជាគំរូដល់ប្អូនៗជំនាក់ក្រោយ ឲ្យដឹងគុណគ្រូ។
ដោយឡែក អ្នកនាង ឯម មាលា វិញ ក៏បានឲ្យដឹងថា អ្នកនាងពិតជាសប្បាយរីករាយ រំភើបមែនទែន ដែលបានជួបមិត្តភក្តិ ទាំងអស់គ្នា ដែលធ្លាប់បានរៀន និងអ្នកគ្រូដែលបង្រៀននៅទីនេះ ហើយក៏សង្ឈឹមថា នៅឆ្នាំក្រោយកម្មវិធីនេះ អាចនឹងបង្កើតឡើង នៅទីនេះ ម្តងទៀត ។
លោកស្រី ឆាយ ណារិន នាយិកា សាលាមឋមសិក្សា បឹងត្របែកខាងត្បូង មានប្រសាសន៍ឲ្យដឹងថា លោកស្រីមានការរំភើបរីករាយ ជាទីបំផុត ដែលអតីតសិស្ស ដែលពួកគាត់មានទឹកចិត្ត កតញ្ញូ ចំពោះលោកគ្រូ អ្នកគ្រូ ដែលបាន បង្ហាត់បង្រៀន តាំងពីជំនាន់មុនៗមក ហើយក៏ជូនពរ ដល់កូនៗ (អតីសិស្ស) ឲ្យជួបតែសំណាងល្អ ៕
មតិយោបល់