សៀមរាប៖ លើវេទិកា​រសម្ពោធ​ដាក់បញ្ចាំងខ្សែភាពយន្ត «មុនដំបូង​ខ្មែរក្រហមសម្លាប់ប៉ារបស់ខ្ញុំ» ដែលមានចំណង​ជើងជាភាសាអង់គ្លេសថា«First They Killed My Father» អ្នកស្រី Angelina Jolie បានពោល​នៅមុខមហាជន​ថា កម្ពុជាបានកែប្រែ​ជីវិតរបស់អ្នកស្រី​។​

អ្នកស្រី Angelina Jolie​ ថា​«កម្ពុជា​ជាទឹកដីមួយដ៏ថ្លៃថ្លា ផ្នែកហេតុផលមួយសំខាន់ ដែលយើងផលិតខ្សែភាពយន្តនេះឡើង មិនមែនជាការបង្ហាញនូវប្រវត្តិសាស្រ្តដ៏ ខ្មៅកខ្វក់របស់ប្រទេសកម្ពុជានោះទេ តែ​ផ្ទុយទៅវិញយើងចង់បង្ហាញពីការតស៊ូ ការខិតខំប្រឹងប្រែង ប្រជាពលរដ្ឋកម្ពុជា រួមទាំងការបង្ហាញទេពកោសល្យដ៏អស្ចារ្យ របស់សិល្ប:ករ​ សិល្ប:ការិនី និងប្រជាពលរដ្ឋកម្ពុជាផងដែរ» ។​

អ្នកស្រីបានលើកឡើងថា «កម្ពុជា ជាប្រទេសមួយ ដែលបានផ្លាស់ប្តូរ ជីវិត​លោកស្រី ប្រសិនបើមិនមានកម្ពុជា ទេ ខ្ញុំក៏ប្រហែលមិនក្លាយទៅជា​ម្តាយដ៏ល្អមួយរូបដែរ​» ។​ខ្សែភាពយន្តនេះដែរ ជាការថ្លែង​អំណរគុណ វិញដល់កម្ពជា បានផ្តល់ជីវិតថ្មី ដល់ខ្ញុំ។ នេះជាសម្តីបន្ថែមចុងក្រោយរបស់អ្នកស្រី Angelina Jolie៕