ភ្នំពេញ៖ឌី សូនីតា បានបង្ហាញនូវអារម្មណ៍សោកស្តាយ អន់ចិត្តតិចតួច នៅពេលដែលប្លង់ដែលខ្លួនថតជាច្រើន ត្រូវបានក្រុមការងារផលិតកុនប្រវត្តិសាស្ត្រខ្មែរ (First They Killed My Father) អ្នកស្រី Angelina Jolie កាត់ចោល ។
បើទោះបីជាយ៉ាងនេះក្តី ផ្ទុយនឹងជំហរអន់ចិត្តនេះ ឌី សូនីតា បានសម្តែងនូវអារម្មណ៍ សប្បាយទៅវិញ ដែលនាងអាចចូលរួមថតខ្សែភាពយន្តប្រវត្តិសាស្ត្រខ្មែរ និងម្យ៉ាងវិញទៀតអាចជួបអ្នកស្រី Angelina Jolie ដោយផ្ទាល់។
ឌី សូនីតា បានប្រាប់ Post Komsan ក៏ដូចជា Post News Media ឲ្យដឹងថា មុននឹងខ្ញុំទៅទស្សនាខ្សែភាពយន្តនេះ ក្រុមការងារបានខលសូមទោស និងប្រាប់ហេតុផលរួចរាល់ហើយ តែខ្ញុំនៅតែមានមោទនភាព ទោះបីជាកាត់ប្លង់របស់ខ្ញុំស្ទើរតែទាំងអស់ក៏ដោយ តែសប្បាយទៅវិញ មានចំណែកក្នុងការថតរឿងប្រវត្តិសាស្ត្រខ្មែរ ។
គេឃើញថាក្នុងខ្សែភាពយន្ត First They Killed My Father នេះ កញ្ញា ឌី សូនីតា បានបង្ហាញវត្តមានតែមួយប្លង់តែប៉ុណ្ណោះ ក្នុងចំណោម ជាង ១០ ប្លង់ទាំងតូចទាំងធំ ដែលនាងបានអះអាងប្រាប់។
យ៉ាងណាមិញ ឌី សូនីតា បន្តថា រឿងកាត់ប្លង់ចោលនេះ អន់ចិត្តគឺអន់ចិត្តហើយ មិនថាគេមិនថាយើង តែអ្នកខ្លះវិញ ថតច្រើនខែ ជាងខ្ញុំទៅទៀត សូម្បីតែមួយប្លង់មិនចេញផង ចឹងហើយទោះចេញមួយប្លង់ ក៏ខ្ញុំអាចទទួលយកបានដែរ។
បញ្ជាក់ផងដែរថា ឌី សូនីតា បានហ៊ាន សមគ្រប់យ៉ាង រហូតដល់កាត់សក់ខ្លី ធ្វើយ៉ាងណាឲ្យសមនឹងសាច់រឿង តាមអ្វីដែល ផលិតករកុនខាងលើ ចង់បាន៕
មតិយោបល់