ព័ត៌មានសិល្បៈ និងកម្សាន្ត

ទេព រិន្ទដារ៉ូ ថតឈុតហែសព ស្វែង សុជាតា

កាលពីរសៀលថ្ងៃទី២៨ មីនា តារាសម្ដែងល្បីឈ្មោះលោកទេព រិន្ទដារ៉ូ បានបង្ហាញខ្លួនថតឈុតធ្វើបុណ្យសពឲ្យអ្នកនាងស្វែង សុជាតា នៅវត្តមានប្រាសាទ ធ្វើឲ្យមានការចាប់អារម្មណ៍យ៉ាងខ្លាំងពីសំណាក់អ្នកចេញចូលវត្តនោះ។ នេះជាឈុតដែលមានអ្នកខ្លះស្មានថាជាទិដ្ឋភាពមែនទែន នៅពេលរូបថតប៉ុន្មានសន្លឹកត្រូវបានបង្ហោះឡើង បន្ទាប់ពីលោកទើបផ្អើលថាឈឺធ្ងន់ ដោយសារតែរូបសម្ដែងនៅក្នុងរឿងមួយ។

លោកទេព រិន្ទដារ៉ូ និយាយថាឈុតដែលលោកសម្ដែងជាតួអង្គដង្ហែសពអ្នកនាងស្វែង សុជាតា នេះ គឺជាឈុតមួយក្នុងរឿង«១៥រោច» ដោយលោកត្រូវសម្ដែងជាតួកូនប្រុសអ្នកនាងស្វែង សុជាតា ហើយម្ដាយរបស់លោកក៏ទទួលមរណភាព បន្ទាប់ពីលោកបានធ្វើឲ្យម្ដាយខកចិត្ត។ លោថានៅក្នុងរឿង«១៥រោច» ជារឿងដំបូងដែលលោកបានសម្ដែងជាតួអ្នកនាងស្វែង សុជាតា ហើយត្រូវសម្ដែងក្នុងឈុតដង្ហែសពអ្នកនាង។ រឿងនេះដំណើរការថតបានចំនួន១៥ភាគរយហើយ ដោយការសម្ដែងរបស់តួអង្គនីមួយៗ គឺមានឈុតស្រណុកចិត្តជាងលំបាក ជាពិសេសគឺឈុតយំសោកបោកខ្លួននោះតែម្ដង។ នេះបើលោកបញ្ជាក់។ គាប់ជួនជាការសម្ដែងនៅអំឡុងចុងខែមីនា គឺក្ដៅបែកផ្សែង ទើបលោកយល់ថាមិនមែនជារឿងស្រួលសម្ដែងទេ ដែលត្រូវសម្ដែងក្នុងឈុតកម្សត់ហើយរងកម្ដៅថ្ងៃ។ យ៉ាងណាមិញ លោកថាសប្បាយចិត្តដែលបានសម្ដែងក្នុងរឿង«១៥រោច» ហើយសម្ដែងជាតួត្រូវស្លាប់ និងជាតួដង្ហែសពអ្នកនាងស្វែង សុជាតា ដែលមានអ្នកឃើញរូបនោះនឹងមានការយល់ច្រទ្បំជាថ្មី។ លោកថាមិនខ្លាចរឿងចង្រៃខ្លួននោះទេ បើទោះជាត្រូវសម្ដែងធ្វើម្ដាយស្លាប់ និងក្រោយមកក៏ស្លាប់ខ្លួនឯង ចំពេលមុនចូលឆ្នាំខ្មែរដែលកាន់តែឈានជិតមកដល់។ លោកនិយាយថា«អត់ខ្លាចចង្រៃអីទេបើយើងជាតួចឹង ហើយបើទោះជាសម្ដែងខែបុណ្យខែសប្បាយអីដែលអ្នកខ្លះមិនគួរសម្ដែង ក៏ខ្ញុំយល់ថាមិនអី បើគ្រាន់តែជាការសម្ដែងហ្នឹង!»។ លោកថាមានអ្នកលេងហ្វេសប៊ុកច្រើនហើយ យល់ថាលោកស្លាប់ដោយសារតែឃើញបង្ហោះរូបពេលសម្ដែងធ្វើស្លាប់ដោយមិនបានបកស្រាយ។

លោកទេព រិន្ទដារ៉ូ បានបង្ហាញក្ដីរំពឹងយ៉ាងខ្ពស់ថារឿង«១៥រោច»នឹងទទួលជោគជ័យ ដោយសារតែរឿងមួយនេះមានការអប់រំខ្ពស់ ហើយជារឿងដំបូង ដែលលោកបានសម្ដែងជាតួកូនប្រុសរបស់អ្នកនាងស្វែង សុជាតា ហើយត្រូវសម្ដែងក្នុងឈុតដង្ហែសពរបស់អ្នកនាងទៀត។ នៅក្នុងសកម្មភាពថតឈុតនោះក្រៅពីលោកក៏មានវត្តមានកញ្ញា កុល ដាវី លោកលឹម រដ្ឋា និងតារាជាច្រើនផ្សេងទៀតផងដែរ៕

មតិយោបល់