មុនផ្ទុះឡើងនូវរឿងអាស្រូវពាក់ព័ន្ធនឹងលែងលះជាមួយស្វាមីមានអេតាស៊ីវិលគឺលោកវីលៀម តារាសម្ដែងនាងមាស សម្ផស្ស គ្រានតែមានឱកាសបានសម្ដែងខ្លះជាថ្មីក្រោយពេលបង្ហាញខ្លួនប៉ុណ្ណោះ។ អ៊ីចឹងហើយទើបអ្នកណាៗក៏កត់សម្គាល់ថាឡើងកូដក្រឺតៗ ដោយសារតែចប់ព័ត៌មានលែងប្ដីភ្លាម ក៏បានតំណែងតួឯកក្នុងភាគភាគធំតែម្ដង។

ក្នុងប៉ុន្មានថ្ងៃនេះ អ្នកនាងមាស សម្ផស្ស សស្រាក់សស្រាំជាមួយនឹងការសម្ដែងក្នុងរឿង«វេទមន្តស្នេហ៍»របស់ប៉ុស្ដិ៍លេខ៥ ដែលផលិតដោយផលិតកម្មចក្រវាឡពេជ្រយ៉ាងខ្លាំង ដោយនាងបានតំណែងជាតួភរិយាដើមរបស់សេដ្ឋី ដែលសំបូរឈុតឆាកបង្ហូរទឹកភ្នែកនោះផង។ នេះជាការបើកទំព័រតួឯកលើកដំបូង បន្ទាប់ពីនាងបាត់មុខពីសិល្បៈ ហើយក្រោយមកក៏សម្រេចចិត្តចេញមុខវិញក្នុងសកម្មភាពរបស់គ្រួសារតារាកម្ពុជា។ នាងបានកន្ទ្រាក់ទីផ្សារបានកាន់តែខ្លាំង ក្រោយពេលដំណឹងលែងលះជាមួយស្វាមីមិនបានរៀបការដោយមានតែអេតាស៊ីវិលកាលពីប៉ុន្មានសប្ដាហ៍មុន។

មាស សម្ផស្ស និយាយថានាងសប្បាយចិត្តយ៉ាងខ្លាំង បន្ទាប់ពីបានសម្ដែងតួឯកក្នុងរឿង «វេទមន្តស្នេហ៍»ដែលជារឿងឆ្លុះបញ្ចាំងពីសម័យលោកម្ចាស់ក្នុងសម័យលង្វែក។ អ្នកនាងថារឿងនេះចំណាយការផលិតអស់ច្រើន ដោយសាច់រឿងក៏មានចំណុចទាក់ទាញធ្វើអោយនាងរំពឹងខ្ពស់ផងដែរ ទើបនាងសម្រេចចិត្តទទួលសម្ដែងត្រាំត្រែងដល់ខេត្តកំពង់ធំស្ទើររាល់ថ្ងៃក្នុងប៉ុន្មានថ្ងៃនេះ ដោយសុខចិត្តបោះចោលការងារសិល្បៈ និង មុខជំនួញពាក់ព័ន្ធនឹងហាងសម្រស់របស់នាងក្រោយដាច់ស្រេចជាមួយស្វាមីនោះ។ អ្នកនាងបានចាត់ទុកថាទីផ្សារសិល្បៈកម្រើកឡើង ដោយសារតែបានបង្ហាញខ្លួនយ៉ាងសកម្មក្នុងក្រុម«គ្រួសារតារាកម្ពុជា» ដោយមិនចាត់ទុកមិនមែនដោយសារចំណាយនៃដំណឹងលែងលះនោះឡើយ។ យ៉ាងណាមិញ នាងទទួលស្គាល់ថាក្រោយការលែងលះខ្លួននាងមានសិទ្ធិទទួលការងារដោយគ្មានសម្ពាធផងដែរ ទើបអាចជាកត្តាចូលចិត្តអញ្ជើញអោយនាងសម្ដែងជាហូរហែរ ជាពិសេសគឺការបើកឆាកតួឯកក្នុងរឿង«វេទមន្តស្នេហ៍»នៅប៉ុស្ដិ៍លេខ៥នោះ។ អ្នកនាងថាខ្លួនបានសម្ដែងជាតួភរិយាដើម និងជានារីដែលរែកពន់នូវមហាទុក្ខយ៉ាងកម្រ ដោយសារតែស្វាមីមានភរិយារាប់មិនអស់។ នាងថាសាច់រឿងនេះមានខ្លឹមសារស្រដៀងគ្នានឹងជីវិតអភ័ព្វរបស់ខ្លួនពាក់ព័ន្ធនឹងរឿងស្នេហាទើបអ្នកនាងពិបាកសម្ដែងពេលត្រូវយំ សម្រាប់គ្រប់ឈុតដែលកម្សត់។ រឿងនេះនឹងបញ្ចប់ការថតក្នុងពេលខាងមុខ ដោយក្រោយពីបញ្ចប់នេះទៅ ក៏នឹងត្រៀមទទួលរឿងថ្មីនៅក្រោយចូលឆ្នាំផងដែរ៕