បន្ទាប់ពីវិលចូលសិល្បៈមួយខ្យល់ធំ ដោយល្បី សារជាថ្មីបទ «គ្មានសិទ្ធិ» និងបទ «ផ្កាយព្រះអង្គារ» តារាចម្រៀងសាន ផានិត បានប្រកាសជំហរនឹងច្បាមយកកម្រិតជាតារាចម្រៀងកំពូលសារជាថ្មី តាមរយៈក្រុមរាំដែលគ្រប់គ្រងដោយជនជាតិកូរ៉េ។
បច្ចុប្បន្នលោក សាន ផានិត គេសង្កេតឃើញថា កំពុងជោគជាំនឹងការងារសិល្បៈទាំងការឡើងឆាកតាមខេត្ត និង ច្រៀងតាមក្លិបរាត្រី រហូតដល់មានក្រុមរាំផ្ទាល់ខ្លួន ដែលមានអ្នកពីក្រោយខ្នងជាជនជាតិកូរ៉េ។
លោក សាន ផានិត បានប្រាប់ Post Komsan នៅល្ងាចថ្ងៃទី៣១ ខែមីនា ឆ្នាំ២០១៧ ឲ្យដឹងថា បច្ចុប្បន្ននេះលោកមានក្រុមរាំផ្ទាល់ខ្លួន ដោយបានបង្ហាញក្បាច់រាំលើឆាក ចំនួនពីរ Show ទៅហើយ នឹងរំពឹងខ្ពស់តាមរយៈក្រុមរាំនេះ នឹងធ្វើឲ្យលោកមានតម្លៃខ្លួន កាន់តែខ្ពស់ឡើងវិញ ។
«ជាក្តីរំពឹង សម្រាប់ជំហានក្នុងឆ្នាំ២០១៧ នេះ ខ្ញុំអាចនឹងជោគជ័យ សម្រាប់បទចម្រៀង និងក្រុមរាំប្រចាំខ្លួនដែលមានលក្ខណៈស្តង់ដាលើឆាក កម្រិតជាតារាកំពូលឡើងវិញ» ។សម្តីលោក សាន ផានិត។
លោកបានបន្តថា សម្រាប់ជនជាតិកូរ៉េ ដែលគ្រប់គ្រងក្រុមរបស់លោក គឺមានបទពិសោធន៍លើទីផ្សារសិល្បៈនៅកូរ៉េ រួមទាំងការដឹកនាំ ។លោកថា ជនជាតិកូរ៉េរូបនេះ កំពុងពិភាក្សាពង្រីកទីផ្សារខោអាវម៉ាក ដុកទ័រស្គីន (Doctor Skin) ដែលជាប្រេនមួយដ៏ល្បី ជាមួយលោកផ្ទាល់ នឹងឈានទៅរកការបើករោងចក្រនៅកម្ពុជា ក្នុងពេលអនាគតដ៏ខ្លីខាងមុខ។
ម្ចាស់បទ ទូរស័ព្ទប្រាប់ផង បានបន្តទៀតថា ជាមួយក្រុមរាំរបស់លោក នឹងបង្កើតបទចម្រៀងជាលក្ខណៈញាក់រហូត ៥០ភាគរយ ពីលើបទបែបរ៉ូមេនទិក ដើម្បីប្រជែងទីផ្សារយកប្រជាប្រិយភាពឡើងវិញ ដូចកាលពីប៉ុន្មានឆ្នាំមុន៕
ទស្សនាវីដេអូឃ្លិប Show ៖
https://www.youtube.com/watch?v=BmLkVukNKzw&feature=youtu.be
មតិយោបល់