ព័ត៌មានបច្ចេកវិទ្យា

ដឹងអត់? ទូរសព្ទ Samsung ក៏អាចជួយសង្គ្រោះជីវិតអ្នកក្នុងគ្រាអាសន្នបានដូច iPhone អីចឹងដែរ!

កាលពីប៉ុន្មានថ្ងៃមុន Post Tech បានលើកយកមុខងារ Emergency SOS នៅលើទូរសព្ទ iPhone ដែលត្រូវបានក្រុមហ៊ុន Apple បង្កើតឡើងដើម្បីអាចប្រើសម្រាប់អាចជួយសង្គ្រោះជីវិតអ្នកប្រើប្រាស់ក្នុងគ្រាអាសន្នណាមួយបាន មកបង្ហាញជូនប្រិយមិត្តម្តងរួចមកហើយ។ ប៉ុន្តែ ចំពោះប្រិយមិត្តដែលកំពុងប្រើប្រាស់ទូរសព្ទដៃស៊េរី Samsung Galaxy ប្រហែលជាមិនដឹងទេថា ទូរសព្ទរបស់ខ្លួនក៏មានមុខងារស្រដៀងគ្នានេះផងដែរ។ មិនតែប៉ុណ្ណោះ វាថែមទាំងមានលក្ខណ:ពិសេសជាងមុខងារ SOS ដែលមាននៅលើប្រព័ន្ធ iOS ថែមទៀតផង។

មុខងារនោះមានឈ្មោះថា Send SOS messages។​ វាត្រូវបានក្រុមហ៊ុន​ Samsung ភ្ជាប់មករួចជាស្រេចនៅលើទូរសព្ទ Galaxy ចាប់ពីស៊េរី S6 និង S6 Edge ហើយមិនត្រឹមតែអនុញ្ញាតឱ្យអ្នកប្រើប្រាស់ផ្ញើសារទៅកាន់លេខទូរសព្ទដែលបានកំណត់ទុកមុន ក្នុងគ្រានអាសន្នណាមួយនោះទេ ប៉ុន្តែ វាក៏អាចផ្ញើភ្ជាប់ទៅជាមួយទីតាំងជាក់ស្តែងដែលលោកអ្នកកំពុងឋិតនៅ ខ្សែអាត់សំឡេង និងរូបថតថែមទៀតផង។

តាមរយ:មុខងារនេះ នៅពេលដែលវាបានបើកដំណើរការរួច លោកអ្នកគ្រាន់តែចុចលើប៊ូតុងបិទ/បើកផ្ទួនៗគ្នាចំនួន ៣ ដង នោះសារ SMS ទីតាំងដែលទូរសព្ទកំពុងឋិតនៅ ខ្សែអាត់សំឡេង និងរូបថត នឹងផ្ញើទៅកាន់តែលេខទូរសព្ទដែលបានជ្រើសរើសកំណត់ទុកមុនភ្លាមៗតែម្តង។

លក្ខខណ្ឌអនុវត្ត៖

  • គាំទ្រលើទូរសព្ទ Samsung Galaxy ដើរដោយប្រព័ន្ធ Android ចាប់ពីស៊េរី S6 និង S6 Edge ឡើង
  • ទូរសព្ទត្រូវមានទឹកប្រាក់ក្នុងគណនីសម្រាប់ការផ្ញើសារចេញ

របៀបអនុវត្ត៖

ជំហានទី១: បើកដំណើរការមុខងារ SOS

១- សូមចូលទៅកាន់កម្មវិធី Settings -> Privacy and Safety -> Send SOS messages

២- ចុច ON លើកុងតាក់បិទ/បើក ឋិតនៅជ្រុងខាងលើនៃផ្ទាំងកម្មវិធីផ្នែកខាងស្តាំ រួចចុចប៊ូតុង Agree។

ជំហានទី២: បញ្ចូលលេខទូរសព្ទសង្គ្រោះបន្ទាន់ក្នុងមុខងារ SOS

១- ភ្លាមៗបន្ទាប់ពីលោកអ្នកចុចបើកមុខងារ SOS រួច សូមចុចលើប៊ូតុង ADD ដើម្បីបញ្ចូលលេខទូរសព្ទ យ៉ាងហោចណាស់មួយ រួចចុចលើប៊ូតុង Done ហើយចុចប៊ូតុងត្រឡប់​ (Back) ដើម្បីមកកាន់មឺនុយ SOS វិញ

២- បន្ទាប់មក លោកអ្នកក៏អាចជ្រើសរើសការភ្ជាប់រូបភាព និងសំឡេងទៅជាមួយសារ SOS បានផងដែរ តាមរយ:ការចុច ON លើ Attach pictures និង​ Attach audio recording។

ជំហានទី៣: ប្រើប្រាស់មុខងារ SOS នៅលើទូរសព្ទ Samsung Galaxy

ក្នុងករណីមានហេតុការបន្ទាន់ ឬអាសន្នណាមួយ លោកអ្នកគ្រាន់តែចុចលើប៊ូតុងបិទ/បើក (Power) ផ្ទួនៗគ្នាចំនួន ៣ ដង បន្ទាប់មក ទោះបីអេក្រង់ទូរសព្ទកំពុងបិទ ឬបើកក៏ដោយ មុខងារ SOS នឹងចាប់បើកដំណើរការ ហើយទូរសព្ទ Galaxy របស់លោកអ្នក នឹងថតរូបភាពតាមកាមេរ៉ាមុខ-ក្រោយ រួមទាំងសំឡេងភ្លាមៗ រួចផ្ញើទៅកាន់លេខទូរសព្ទទំនាក់ទំនងដែលលោកអ្នកបានដាក់បញ្ចូលក្នុង SOS តែម្តង។ បន្ថែមពីលើនេះ វាក៏ភ្ជាប់ទៅជាមួយទីតាំងដែលលោកអ្នកកំពុងឋិតនៅ និងសារ “I need help” ឬប្រែថា “ខ្ញុំត្រូវការជំនួយ” ផងដែរ៕

 

 

 

មតិយោបល់