ខណ:ដែលកេរ្តិ៍ឈ្មោះលើឆាកកំប្លែងមិនសូវជាជោគជ័យ ដូចតារារួមក្រុមក្នុងទ្រនំទូរទស្សន៍ស៊ីធីអិន នាយត្បាល់នៅប្រឈមការខ្វះខាតលុយក្នុងការធ្វើ MV Original Song ខ្លួន បន្ទាប់ពីថតសំឡេង និងធ្វើបទស្នាដៃកូនខ្មែររួចរាល់ក្តី។
បើទោះបីជាមានចិត្តក្នុងការលើកស្ទូយផលិតបទចម្រៀងស្នាដៃកូនខ្មែរ ដើម្បីអបអរចូលឆ្នាំថ្មី ប៉ុន្តែ តារាកំប្លែងរូបនេះបានត្អួញត្អែរ ទាំងអាក់អន់ចិត្ត ដែលបទលោកក្រោមចំណងជើងថា «វៃផ្លាប់ៗ» មិនអាចមានលទ្ធភាពបញ្ចេញ MV ដូចបទផ្សេងៗ ស៊េរីបែកស្លុយ។
«ខ្ញុំពិតជាអាក់អន់ចិត្តយ៉ាងខ្លាំង ដោយខ្វះលទ្ធភាព ក្នុងការធ្វើ MV មួយនេះចេញដើម្បីអបអររាំចូលឆ្នាំខ្មែរប្រពៃណីជាតិ ដែលជាបទមានចង្វាក់បែបប្រពៃណីខ្មែរ និង ធ្វើ Melody ថ្មីទាំងស្រុង»។ នេះជាសម្តីរបស់ នាយត្បាល់ ដែលបានប្រាប់ Post Komsan កាលពីល្ងាចថ្ងៃអាទិត្យទី៩ ខែមេសា។
លោកថា សម្រាប់លោកពិតជាគ្មានលុយផលិត MV បទនេះមែន ដោយមានលទ្ធភាពត្រឹមថតសំឡេង ខណ:ដែល Melody នេះក៏ផលិតដោយខ្លួនឯង ។ លោកបានពោលទាំងរំពឹងទុកថា សង្ឈឹមថា មានផលិតកម្ម ឬ ម្ចាស់ជំនួយផ្សេងៗ អាចជួយលោកក្នុងការថត MV មួយនេះ មុនចូលឆ្នាំខ្មែរ ស្របពេលដែលជីវិតសិល្ប:របស់លោក មិនជាធូរធារនោះ៕
មតិយោបល់