នៅទីបំផុតភោជនីយដ្ឋានដែលមានឈ្មោះថា«គុនល្បុកតោក្លិប»របស់តារាសម្ដែងអ្នកនាងពេជ្រ ខេនឌីត្រូវបានបើកសម្ពោធហើយ កាលពីល្ងាចថ្ងៃទី១៣ ឧសភា នៅកណ្ដាលក្រុងសៀមរាម ដោយមានគណប្រតិកភូខេត្ត និងតារាសិល្បៈយ៉ាងច្រើនកុះករចូលរួម។ នេះជាភោជនីយដ្ឋានកម្រមួយដោយសារតែក្រៅពីមានសេវាកម្មលក់ម្ហូបខ្មែរសុទ្ធសាធ ក៏ជាទីលានបង្ហាញក្បាច់គុនល្បុកតោទ្រង់ទ្រាយធំសម្រាប់ភ្ញៀវជាតិ និងអន្តរជាតិផងដែរ។ ភោជនីយដ្ឋានត្រូវបានសាងសង់ឡើងក្នុងទ្រង់ទ្រាយធំ ដោយបានចំណាយរហូតដល់៣០ម៉ឺនដុល្លារ ក្នុងពេលមិនទាន់រាប់បញ្ចូលការចំណាយដែលត្រូវថែមថយនៅឡើយ។

អ្នកនាងពេជ្រ ខេនឌី និយាយថា អ្នកនាងសម្រេចចិត្តបោះទុនធ្វើភោជនីយដ្ឋាននេះ គឺដោយសារតែលោកតាសាន គឹមស៊ាន ដែលជាអ្នកចងក្រងក្បាច់គុនល្បុកតោជាជីតារបស់ខ្លួន និងដោយសារតែអ្នកនាងចង់អោយកីឡាករកីឡាការិនីក្នុងវិស័យក្បាច់គុនមួយនេះ មានប្រាក់ចំណូលពីការសម្ដែង និងប្រកួតជាប់លាប់ក្នុងភោជនីយដ្ឋានរបស់ខ្លួន មិនមែនទាល់តែមានបុណ្យជាតិធំៗទើបមានការសម្ដែងដូចមុន។ អ្នកនាងថាភោជនីយដ្ឋានរបស់ខ្លួនបានសម្រេចទទួលសិស្សអោយចូលហ្វឹកហាត់ដោយមិនគិតកម្រៃសម្រាប់សិស្សក្រីក្រ និងសម្រេចផ្ដល់ប្រាក់ចំណូលរាល់ពេលអោយសម្ដែង។ ក្នុងនោះអ្នកនាងក៏ប្រកាសរៀបចំការប្រកួតប្រចាំសប្ដាហ៍ ដើម្បីស្វែងរកជើងខ្លាំងប្រចាំខែ ប្រចាំត្រីមាស និងប្រចាំឆ្នាំផងដែរដើម្បីលើកទឹកចិត្តអ្នកហ្វឹកហាត់អោយប្រឹងប្រែង និងដើម្បីបញ្ជូនពួកគេទៅប្រកួតតំណាងប្រទេសនៅក្រៅប្រទេស។ អ្នកនាងថាភោជនីយដ្ឋានរបស់ខ្លួនបានចំណាយអស់ជាង៣០ម៉ឺនដុល្លារដោយសារមានការរត់ច្បាប់ និងមានការសុំសិទ្ធិពីសហព័ន្ធល្បុកតោកម្ពុជាផង។ នៅក្នុងពិធីសម្ពោធនោះអ្នកនាងថាបានទទួលចូលរួមជាភ្ញៀវកិត្តិយសដោយគណប្រតិភូសហព័ន្ធល្បុកតោ មន្ត្រីថ្នាក់ខេត្ត និងតារាសិល្បៈក្នុងក្រុមគ្រួសារតារាកម្ពុជា។ តារាទាំងនោះត្រូវគេឃើញបង្ហាញវត្តមានច្រៀងរាំ

យ៉ាងអឺងកងក្នុងភោជនីយដ្ឋានរបស់អ្នកនាងដល់ពាក់កណ្ដាលយប់ផងដែរដូចជាអ្នកនាងស៊ុន ណារីម៉ូនីកា កញ្ញាស្រីពៅមុខឈើ លោកខេនវណ្ណាថាត់ ពិធីករប៉ុស្ដិ៍លេខ៣ លោកឈួន ពន្លឺម្ចាស់ពានតារាសម្ដែងឆ្នើមរបស់ទូរទស្សន៍អប្សរា លោកសូ ណាទី ពិធីករប៉ុស្ដិ៍លេខ និងតារាសម្ដែងកញ្ញាលី ឌីណាសមាជិកគ្រួសារតារាកម្ពុជាជាដើម។ ពិធីនៅក្រៅការសម្ដែងក្បាច់គុនល្បុកតោដោយកីឡាករកីឡាការិនីអាជីព ក៏មានការប្រកួតដណ្ដើមទឹកប្រាក់ និងប្រាក់រង្វាន់នាពេលនោះដែរ៕

https://www.youtube.com/watch?v=yGjNFIA2Piw&feature=youtu.be

https://www.youtube.com/watch?v=5HJE7at_L0Q