ឆ្លើយតបនឹងការចោទប្រកាន់ថាលោកញៀនល្បែង និងមានស្រីហើយខ្វះការទទួលខុសត្រូវក្នុងនាមជាស្វាមី ទើបបណ្ដាលអ្នកនាងឃ្មឹបសម្រេចចិត្តដើរ លោកហុងដា ដែលពីមុនបានអះអាងថាមិនចង់តបតជាមួយភរិយាព្រោះចង់អោយភរិយាមានអ្នកអាណិតច្រើនដែរដើម្បីបានជំនួស បែរជាថ្លែងផ្លាស់ប្ដូរជំហរកាលពីល្ងាចថ្ងៃទី១៧ ឧសភា ថា នឹងឈានទៅរកការបកអាក្រាតអតីតភរិយាអោយអស់ផ្លូវដើរប្រសិនបើអ្នកនាងនៅតែបន្តលើកឡើងយកល្អតែម្ខាង ហើយធ្វើអោយលោករងការរិះគន់ពីសំណាក់អ្នកគាំទ្រជាមនុស្សញៀនល្បែង និងមានស្រីញីចោរម្សៀត។

នាយហុងដានិយាយថាខ្លួនបានស្ដាប់រាប់ពាក្យសម្ដីរបស់អ្នកនាងឃ្មឹបសម្អុយលោកគ្មានខ្វះចន្លោះនោះទេ ដោយលោកប្រកាសថាបើនាងចង់បានជំនួយចង់អោយគេអាណិត មិចមិននិយាយតែរឿងកម្សត់ ហេតុអ្វីចាំបាច់បកអាក្រាតធ្វើអោយគេរិះគន់ និងវាយប្រហារចំពោះលោកទៅវិញ។ លោកថាខ្លួនមិនអះអាងថាល្អគ្រប់ដប់នោះទេ ប៉ុន្តែបើលោកមិនល្អមិនមែនសុខចិត្តយកកូនមកចិញ្ចឹមទាំង២ ហើយបណ្ដោយអោយភរិយាចុះចេញតាមចិត្ត ដល់ថ្នាក់កូនរបស់លោកក៏ស៊ឹងនឹងឈប់នឹកនាក្រោយពេលអ្នកនាងសាងកំហុសនោះទេ។ លោកថាមិនចង់បកស្រាយច្រើនទេ ព្រោះខ្លាចអ្នកនាងឃ្មឹបអស់ផ្លូវដែរ ហើយត្រូវមហាជនជេរប្រទិចជាថ្មី ប្រសិនបើលោកឆេវឆាវហើយប្រកាសធ្វើការតបត។ លោកទទូចអោយអតីតភរិយាបញ្ឈប់ការនិយាយបំផ្លើសពីខ្លួន ហើយបើនៅតែអះអាងថាចុះចេញពីលោកព្រោះតែរឿងខូចចិត្តនឹងលោកលែងល្បែង ឬមានស្រីចោលប្រពន្ធចោលកូន ដោយសុខចិត្តទៅរស់នៅផ្សងព្រេងនៅឯស្រុកព្រោះតែឆ្អែតចិត្តនឹងលោកបន្តទៅទៀត នោះលោកនឹងធ្វើការបកអាក្រាតអោយអស់ផ្លូវដើរ។ លោកថាអ្នកប្ដឹងតុលាការតែយកចំណុចល្អ ប៉ុន្តែលោកមានសាក្សី និងមានអំណះអំណាងថាអ្វីដែលអតីតភរិយារបស់លោកលើកឡើងមិនមានការពិតមួយចំនួន ហើយថាជាការសម្អុយដែលលោកមិនអាចទទួលយកបាន។ លោកថាបើលោកជាមនុស្សញៀនល្បែង និងមានស្រីធ្វើបាបប្រពន្ធកូនប្រហែលជាកូនទាំង២ត្រូវអ្នកនាងឃ្មឹបយកទៅបាត់ហើយ បើតាមតែលោកមានចំណុចអាក្រក់ដល់ម្លឹង។ លោកថាខ្លួននឹងរង់ចាំមើល ប្រសិនបើអតីតភរិយាលើកឡើងតែពីរឿងកម្សត់ហើយមិនធ្វើអោយមានការជេរប្រទិចចំពោះខ្លួននោះលោកនឹងជួយអាណិត ហើយបន្តអំពាវនាវអោយមានការទទួលនាងក្នុងពិភពកំប្លែងនោះផង តែបើនិយាយយកល្អហើយចោទថាកំហុសធា្លក់ខ្លួនគឺដោយសារតែលោកញៀនល្បែង និងសំបូរស្រីទៀត គឺការបកអាក្រាតតបតពិតជាធ្វើអោយនាងអស់ផ្លូវទាំងទ័លច្រក។ លោកនៅតែសម្ដែងការអាណិតចំពោះអតីតភរិយា និងថាខ្លួនកំពុងរែកទុកដោយសារតែត្រូវភរិយាក្រោយស្លាប់ចោល ហើយកូនច្បងដែលលោកស្រឡាញ់ស្មើជិវិតក៏ប្រឈមជាប់គុគមួយជីវិតព្រោះជាប់ពាក់ព័ន្ធនឹងគ្រឿងញៀនផង។

អ្នកនាងឃ្មឹបបានអះអាងថា លោកមិនបានរត់តាមបុរសឧកញ៉ាណាម្នាក់ ក្នុងពេលចុះចេញពីផ្ទះនោះទេ គឺនាងពិបាកចិត្តរឿងនាយហុងដារញៀនល្បែង និងមានស្រីច្រើន ហើយក៏រត់ទៅសម្ងំរស់នៅខេត្តបន្ទាយមានជ័យ ដើម្បីគេចមុខពីភាពអាម៉ាស់ដែលត្រូវប្ដីក្បត់ចិត្តប៉ុណ្ណោះ។ នាងថាខ្លួនរស់នៅបែកគ្នាក្រោយខូចចិត្តនឹងនាយហុងដា៤ឆ្នាំទើបសម្រេចយកប្ដី ដោយមិនមានប្រុសស្នេហ៍ ឬមានប្ដីក្នុងពេលមានរឿងប្ដីប្រពន្ធនោះឡើយ។ នាយហុងដាបានចោទថាសម្ដីនេះជាការសម្អុយមិនមានការពិត និងថាបើអ្នកនាងនៅតែបន្តលើកឡើង នោះលោកបកអាក្រាតវិញ ដោយមិនយល់មុខនោះទេដើម្បីវែកញែកត្រូវខុស។ អ៊ីចឹងហើយទើបជម្លោះរបស់អ្នកទាំងពីរដែលស្ងប់ស្ងាត់អស់ជាង៦ឆ្នាំហើយរើសវិញ ដោយម្នាក់ៗហាក់បន្តសាចទឹកដាក់គ្នា ដោយមិនរកដំណោះស្រាយរឿងកូនប្រុសជាប់ឃុំ ដែលអាចនឹងធ្វើអោយគេបាត់បង់អនាគតអស់មួយជិវិតនោះ៕