នៅថ្ងៃទី២២ ឧសភា នេះតារាល្បីៗយ៉ាងច្រើនកុះករនឹងបង្ហាញទាំងរូបសម្រស់ និងសមត្ថភាពបង្អួតគ្នានៅលើកម្រាលព្រំប្រចាំឆ្នាំរបស់គ្រួសារតារាកម្ពុជា នៅស្ដាតអូឡាំពិកក្រោមការជ្រោមជ្រែងរបស់សហព័ន្ធកីឡាទាញព្រ័ត្រកម្ពុជា។ តារាចម្រៀងយុវវ័យមកពី៣ផលិតកម្មធំត្រូវគេឃើញប៉ះគ្នាក្នុងវេទិកានេះ ខណ:ដែលមហាជនកំពុងអ៊ុតមើលថាតារាមកពីផលិតកម្មមួយណាកន្ទ្រាក់បានការទាក់ទាញទាំងសំលៀកបំពាក់ និងសកម្មភាពច្រៀងរាំជាងគេនៅក្នុងព្រឹត្តិការណ៍នោះ។

តារាល្បីឈ្មោះមកពីផលិតកម្មហង្សមាស ត្រូវគេឃើញវត្តមានតារាល្បី៦រូបបង្ហាញខ្លួន គឺអ្នកនាង ពេជ្រ សោភា លោក ណុប បាយ៉ារិទ្ធ ទេព បូព្រឹក្ស កញ្ញាវី ឌីណែត លោកនៅ ស៊ីនឿន និង កញ្ញាផន ស្រីខួច។ តារាទាំង៦នេះ សុទ្ធតែមានក្បាច់រាំរស់រវើកដូចគ្នា ខណ:អ្នកគាំទ្រវិញថ្វីដ្បិតថាពេជ្រ សោភា ប្រាកជានាំមុខគេ តែតារាប្រុសស្រីដែលរួមដំបូលជាមួយនាងក៏ប្រាកដជារកស្ទីលប្លែក ដើម្បីកន្ទ្រាក់ការគាំទ្រឲ្យពេញទំហឹងផងដែរ។ ពេជ្រ សោភា និង ទេព បូព្រឹក្ស មិនបានបង្ហាញឆន្ទ:ថា នឹងធ្វើឲ្យលេចធ្លោរកម្រិតណានោះទេ ប៉ុន្តែអ្នកទាំងពីរ សុទ្ធបានបញ្ជាក់ដូចគ្នាថាវត្តមាននៅក្នុងព្រឹត្តិការណ៍កម្រាលព្រំប្រចាំលើកនេះ នាងនឹងលើកក្រុមរាំទៅរំលេចភាពរស់រវើកឲ្យលេចធ្លោ។ ពួកនាងថាខ្លួនត្រៀមរួចរាល់ហើយជាមួយក្រុមរាំ ដោយពួកនាងសុខចិត្តទៅច្រៀងនៅលើកម្រាលព្រំនោះដោយមិនគិតកម្រៃហើយ ថែមទាំងចាយលុយយកក្រុមរាំទៅរាំឲ្យរង្គើឆាកដើម្បីកន្ទ្រាក់សំឡេងគាំទ្រនោះផង។ មិនខុសគ្នាដែរ លោកណុប បាយ៉ារិទ្ធ ឯណោះវិញលោកថាខ្លួននឹងមាន៣បទនៅលើព្រឹត្តិការណ៍កម្រាលព្រំនោះ ដោយលោកនាងបើកឆាកបទស្លូ ហើយយកក្រុមរាំទៅរាំឲ្យផ្អើលឆាកផងដែរ ដើម្បីអ្នកគាំទ្រពេញចិត្ត។ លោកថាសប្បាយចិត្តដែលបានបង្ហាញខ្លួននៅក្នុងព្រឹត្តិការណ៍សប្បុរសធម៌ ហើយលោករំពឹងនឹងមានបរិយាកាសអំណោយផលដោយមិនមានការរំខានដោយអាកាសធាតុនោះឡើយ។ លោកថាគឺជារឿងប្រសើរមួយដែលតារាល្បីណាត់គ្នានៅក្នុងព្រឹត្តិការណ៍នោះ ដើម្បីជាប្រយោជន៍ដល់គន្ធបុប្ផា និងកុមារក្រីក្រ។ កញ្ញា វី ឌីណែត កញ្ញាផន ស្រីខួច និងលោកនៅ ស៊ីនឿន ក៏បានបង្ហាញឲ្យឃើញពីគម្រោងកន្ទ្រាក់យកការគាំទ្រឲ្យបានច្រើននៅលើកម្រាលព្រំរបស់គ្រួសារតារាកម្ពុជានោះផងដែរ។ ម្នាក់ៗសុទ្ធតែអះអាងថានឹងតែងខ្លួនឲ្យប្លែក ហើយយកក្រុមរាំទៅជាមួយដើម្បីរាំឲ្យរំពើននៅលើវេទិកានៅកណ្ដាលស្ដាតអូឡាំពិកនោះ។ អ្នកទាំង៣សុទ្ធតែមានជំនឿចិត្តថាអ្នកគាំទ្រនឹងទៅគាំទ្រកុះករនៅក្នុងវេទិកា ទើបត្រូវតែបញ្ចេញស្ទីលឲ្យប្លែក និងអស្ចារ្យ ឲ្យសមជាតារាល្បីរៀងខ្លួនប្រចាំផលិតកម្មហង្សមាស។

នៅក្នុងផលិតកម្មថោនឯណោះវិញ ក៏មានតារាល្បីឈ្មោះ២ដួងបង្ហាញខ្លួននៅក្នុងព្រឹត្តិការណ៍នេះទាំងមូលផងដែរ។ អ្នកនាង យក់ឋិតរដ្ឋា ដែលសុខចិត្តចោលកម្មវិធីច្រៀងរាំបានលុយនៅខេត្ត ព្រោះតែចង់ចូលរួមបានអះអាងថានេះជាវេទិកាជួបជុំតារាសិល្ប:ក្នុងទ្រង់ទ្រាយធំមួយដែលនាងត្រូវបង្ហាញខ្លួនមិនអាចបាត់មុខ។ អ្នកនាងបានរៀបចំក្រុមរាំ និងបានត្រៀមខ្លួនរួចជាស្រេចរួចហើយ ថាត្រូវបង្ហាញខ្លួនឲ្យលេចធ្លោរស្វាគមន៍អ្នកគាំទ្រ។ មិនខុសគ្នាដែរលោកសុគន្ធ ថេរ៉ាយុ ឯណោះវិញ ថ្វីដ្បិតថាសុខភាពមិនអំណោយផល តែក៏បានប្រកាសថានឹងបង្ហាញខ្លួនច្រៀងរាំដើម្បីឲ្យកក្រើកព្រឹត្តិការណ៍កម្រាលព្រំលើកទី២នេះដែរ។ លោកថាខ្លួននឹងមកច្រៀងបាន ដោយសារតែលោកមានបំណងបង្ហាញខ្លួនមិនឲ្យបាត់មុខ ប៉ុន្តែប្រសិនបើជំងឺធ្វើទុក្ខមិនអាចសម្រួលបានទាន់ពេលនោះលោកក៏ត្រូវសុំទោសទស្សនិកជនផងដែរ។ បើសុខភាពរបស់លោកមិនមានជាបញ្ហាចោទចំថ្ងៃទី២២ ឧសភា នោះលោកនឹងបង្ហាញខ្លួន៣បទដូចគ្នានឹងយក់ ឋិតរដ្ឋា ដែរ ក្នុងពេលដែលអ្នកទាំងពីរសុទ្ធតែត្រូវបានគេរំពឹងថាគឺជាមុខមាត់របស់ថោនដែលកន្ទ្រាក់បានភាពលេចធ្លោរមិនចាញ់គូប្រជែងនៅផលិតកម្ម២ទៀតនោះឡើយ។

សម្រាប់ផលិតកម្មសាន់ដេ ឆ្នាំនេះក៏មានតារាលេចធ្លោរ២ដួងគឺសុខ ពិសី និងនាយចឺម បង្ហាញខ្លួនផងដែរ។ អ្នកទាំងពីរនឹងបង្ហាញខ្លួន៣បទលើកម្រាលព្រំដូចគ្នា ដោយនាយចឺមនៅក្នុងឆ្នាំនេះគឺល្បីជាងឆ្នាំមុន សម្រាប់តំណែងជាតារាចចម្រៀងរបស់លោក។ សុខ ពិសី និងនាយចឺម មិនត្រូវបានគេដឹងថានឹងច្រៀងរួមគ្នាជាមួយបទ«លលកស្រីយំ»ឬយ៉ាងណានោះទេ ប៉ុន្តែសម្អាងលើប្រជាប្រិយភាពរបស់អ្នកទាំងពីរក៏ពិតជាកន្ទ្រាក់បានកាគាំទ្រមិនណយនោះដែរ៕