ព័ត៌មានសិល្បៈ និងកម្សាន្ត

ប្រឡូកសិល្បៈ៣ឆ្នាំ វង្ស ថាណាន់ ផ្ដើមមាន Original Song ក្នុងអាជីព

សារភាពដោយត្រង់ថាចូលប្រឡូកអាជីពសិល្ប:រហូតដល់៣ឆ្នាំ តារាចម្រៀងវ័យក្មេង វង្ស ថាណាន់ បានអះអាងថាខ្លួនទើបតែមានបទចម្រៀងផ្ទាល់ខ្លួនបានមួយបទប៉ុណ្ណោះក្នុងនាមជាតារាចម្រៀង។ យ៉ាងណាមិញ លោកហាក់បង្ហាញនូវជំនឿចិត្តខ្ពស់ ដោយសារតែបទបើកឆាកនោះ គឺប្រភេទ Original Song ជាស្នាដៃកូនខ្មែរ ដែលធ្វើឲ្យទទួលបានមោទនភាពភ្លាមៗក្រោយពេលចេញបង្ហោះ។

លោក វង្ស ថាណាន់ បានអះអាងថាមិនតិចជាងរយ:ពេល៣ឆ្នាំនោះទេ ដែលលោកចំណាយពេលរង់ចាំពីលទ្ធផលក្នុងអាជីពចម្រៀងរបស់ខ្លួន ដោយលោកប្រកាសថាទើបតែក្នុងពេលនេះប៉ុណ្ណោះដែលការរង់ចាំទទួលបានផ្លែផ្កាជាមួយនឹងបទOriginal Song ស្នាដៃកូនខ្មែរជាស្នាដៃផ្ទាល់ខ្លួន។ លោកសម្ដែងនូវអារម្មណ៍រីករាយ និងមោទនភាព នៅពេលមិត្តភ័ក្ត្ររួមអាជីពមួយចំនួនដែលប្រើពេលក្នុងអាជីពមិនតិចជាង៣ឆ្នាំដូចលោកមិនទាន់មានឱកាសបញ្ចេញបានមួយបទដូចគ្នានេះផង តែលោកសម្រេចគោលដៅជាមួយនឹងឱកាសមានបទផ្ទាល់ខ្លួន។ លោកថាបទចម្រៀង«អារម្មណ៍ខ្លាចបាត់អូន» គ្រាន់តែបានចេញបង្ហោះ គឺមានការចាប់អារម្មណ៍តែម្ដង ថ្វីដ្បិតថាមិនទាន់ឈានដល់ដំណាក់កាលខ្លាំងក្លាពីការគាំទ្រនៅឡើយ។ លោកថាអ្នកមានឱកាសចេញបានច្រើនបទលោកមិនហ៊ានប្រៀបប្រដូចនោះទេ ប៉ុន្តែសម្រាប់តារាចម្រៀងធម្មតាៗដូចខ្លួនដែលមិនទាន់មានមួយបទជាស្នាដៃរបស់ខ្លួន គឺលោកយល់ថាខ្លួនលោកសម្រេចបានក្ដីសុបិន្ត។ តារាវ័យ២៣ឆ្នាំ មកពីខេត្តកំពង់ចាមរូបនេះ និយាយថាសប្បាយចិត្តដែលមានមួយបទក្រោយការប្រឡូកអាជីពចម្រៀងទាំងលំបាកអស់៣ឆ្នាំ ហើយលោកក៏នឹងធ្វើ Original Song បន្តបន្ទាប់ដើម្បីរួមចំណែកបញ្ចេញបទស្នាដៃកូនខ្មែរនៅលើទីផ្សារបន្ថែមទៀតផងដែរ។

លោកបានប្រកាសថាបទបើកឆាក«អារម្មណ៍ខ្លាចបាត់អូន!» មិនមែនជាស្នាដៃដែលលោកផលិតម្នាក់ឯងនោះទេ ដោយសារតែបទមួយនេះក៏មានការរួមចំណែកពី លោក ឈុន សុវណ្ណភក្ដី ម្ចាស់ផលិតកម្ម BKS ផងដែរ បើទោះជាបទរបស់លោកក្រោយពេលចេញបង្ហោះគឺមិនស្ថិតនៅក្រោមស្លាកយីហោរបស់ផលិតកម្មBKS។ លោកថាមិនមានគម្រោងចូលជ្រកនៅក្នុងផលិតកម្មណាមួយនោះទេ ដើម្បីអាចមានសេរីភាពគ្រប់គ្រាន់ក្នុងការផលិតបទ Original Song បន្តបន្ទាប់។ ប៉ុន្តែបើមានការផ្ដល់លក្ខណ្ឌសមស្របលោកក៏អាចនឹងធ្វើការពិចារណាផងដែរ៕

មតិយោបល់