មកទល់ពេលនេះមានការលើកឡើងពីបណ្ដាទូរទស្សន៍ដែលទទួលទិញរឿងភាគខ្មែរជាច្រើន ថាបណ្ដាទូរទស្សន៍សុទ្ធតែបានដំឡើងតម្លៃរឿងមួយភាគៗ ដើម្បីឲ្យផលិតករមានកម្លាំងចិត្តផលិតរឿង។ យ៉ាងណាមិញ ផលិតកររបស់ផលិតកម្ម LD ដែលត្រូវគេស្គាល់ថាបានផលិតរឿងភាគជាប្រចាំឲ្យបណ្ដាទូរទស្សន៍ក្នុងស្រុកដូចជាCTN និង PNN ជាដើម បានអះអាងថាផលិតករមិនបានទទួលផលប្រយោជន៍នោះទេ។

លោក លៀក លីដា ម្ចាស់ផលិតកម្ម LD បានអះអាងថា កាលពីមុនក្នុងមួយរឿងរបស់រឿងខ្មែរដែលផលិតដោយផលិតករក្នុងស្រុកទទួលបានត្រឹមតែមួយភាគពី៨០០ដុល្លារទៅ១០០០ដុល្លារប៉ុណ្ណោះ។ ប៉ុន្តែមកទល់ពេលនេះបណ្ដាទូរទស្សន៍ដែលលោកចាប់ដៃផលិតរឿងឲ្យគឺបានដំឡើងចាប់ពីមួយភាគ១៥០០ដុល្លារទៅជាង២ពាន់ដុល្លារ ដែលធ្វើឲ្យលោកមានទឹកចិត្តក្នុងផលិតជាងមុន។ យ៉ាងណាមិញ លោកថាស្ថានភាពកើនសន្ទុះដែលទទួលបានមិនហុចផ្លែផ្កាឲ្យបណ្ដាផលិតករ ជាពិសេសគឺលោកដែលជាផលិតករនោះទេ ដោយសារតែភាពជាក់ស្ដែងក្រោយការដំឡើងថ្លៃឲ្យ ក៏ខាងបណ្ដាទូរទស្សន៍កំណត់លើគុណភាព និងសម្រាំងតាំងពីតួសម្ដែង ដែលធ្វើឲ្យផលិតករចំណាយច្រើនលើសមុន ដែលមិនខុសពីការទទួលបានកម្រៃតិច តែការផលិតក៏ឆិនឆៃបាន។ យ៉ាងណាមិញ លោកថាក្នុងនាមជាផលិតករគឺលោកសប្បាយចិត្ត ដោយសារតែការផលិតរឿងភាគបើទោះជាមិនចំណេញ តែក៏ជួយផលិតករមានកញ្ចប់មួយសមរម្យក្នុងការផលិតរឿង ដើម្បីបន្សល់ទុកស្នាដៃ។ លោកនិយាយថា«ការផលិតរឿងភាគ និយាយត្រង់អត់ចំណេញទេ ព្រោះមួយភាគឥឡូវខាងទូរទស្សន៍គាត់ឲ្យច្រើនជាងមុន ប៉ុន្តែមានខុសគ្នាអីបើតួគាត់តម្រូវយកតែល្បីៗ និងការចំណាយលើក្រុមបច្ចេកទេសក៏ច្រើនដែរហ្នឹង ចឹងសរុបទៅគាត់ដំឡើងលុយហ្នឹងបានផលតែតួសម្ដែងទេ!»។ លោកថាអះអាងថាតារាសម្ដែងស្ទើរទាំងអស់ សុទ្ធតែបានប្រកាន់ជំហរដំឡើងថ្លៃ ហើយលោកក៏មិនអាចបន្តឲ្យតម្លៃតួដដែលៗដោយមិនគិតពីកេរ្តិ៍ឈ្មោះរបស់តារាសិល្ប:នោះទេ។ លោកបានលើកឡើងបែបនេះ ក្នុងពិធីជួបជុំតារាសិល្ប:សម្ពោធរឿង«អាពាហ៍ពិពាហ៍ចម្លែក»ដែលជារឿងភាគថ្មីរបស់LD ក្នុងថ្ងៃដែលទូរទស្សន៍ CTN ដាក់ផ្សាយផ្លូវការកាលពីយប់ថ្ងៃទី២៩ ឧសភា ដើម្បីវាយលុកម៉ោងមាស។ លោកថានេះជារឿងដែលខាងផលិតកម្មរបស់លោកចំណាយដើមទុនក្នុងការផលិតខ្ពស់ ដោយសារតែតួសម្ដែងមួយរឿងគឺមានដល់រង្វង់៣០នាក់ ហើយភាគច្រើនជាតួល្បី ។ លោកថារឿងមួយនេះផលិតកម្មអត់ចំណេញទេបើទោះជាបានទទួលកម្រៃខ្ពស់ពីខាងCTN តែលោកសប្បាយចិត្តដោយសារតែរឿង«អាពាហ៍ពិពាហ៍ចម្លែក»ជារឿងនិពន្ធសាច់រឿងថ្មី ដែលលោកផលិតឡើងដោយផ្ដោតលើប្លង់ និងគុណភាពរឿងជាធំ។ លោកថាឲ្យតែភាពយន្តភាគដែលលោកផលិតបានសម្រេចដាក់បញ្ចាំងនៅលើកញ្ចក់ទូរស្សន៍ថ្ងៃណា លោកនឹងធ្វើពិធីជប់លៀងជួបជុំតួថ្ងៃនោះដើម្បីអបអរការថតបញ្ចប់ផង និងដើម្បីជួបជុំតារាល្បីៗឲ្យមកអង្គុយទស្សនាភាពយន្តក្នុងថ្ងៃបើកឆាកនោះផង ដោយទស្សនាការផ្សាយផ្ទាល់នៅលើកញ្ចក់ទូរទស្សន៍តែម្ដង។ លោករំពឹងថារឿង«អាពាហ៍ពិពាហ៍ចម្លែក»ទទួលជោគជ័យ ដោយសារសម្អាងថាភាពយន្តនេះចម្រុះដោយតួល្បីៗ និងបង្កប់ដោយភាពកំប្លុកកំប្លែងច្រើននៅក្នុងផ្ទៃរឿង។

ខាងក្រោមនេះជាទិដ្ឋភាពតារាសិល្ប:ដែលបានបង្ហាញខ្លួនក្នុងពិធីជួបជុំអបអរភាពយន្តថ្មីរបស់LD ដាក់បញ្ចាំងនៅលើកញ្ចក់ទូរទស្សន៍ CTN៖

//www.youtube.com/watch?v=s8Q69OG1uDc&feature=youtu.be