ក្រោយពេលព្រឹត្តិការណ៍ពិព័រណ៍ផលិតផលខ្មែរ រយ:ពេល ៤ថ្ងៃ នៅខេត្តបាត់ដំបង បានបញ្ចប់ជាស្ថាពរ ក្រសួងពាណិជ្ជកម្ម នឹងរៀបចំព្រឹត្តិការណ៍ដូចគ្នានេះ នៅខេត្តស្វាយរៀង នាខែមិថុនា នៅរាជធានីភ្នំពេញ នាខែតុលា និងនៅខេត្តកែប នាខែធ្នូ បន្តទៀត។

ព្រឹត្តិការណ៍ដ៏មានសារ:សំខាន់នេះ គឺរៀបចំឡើងក្នុងគោលបំណងបំផុសឲ្យ ប្រជាពលរដ្ឋកម្ពុជាងាកមកគាំទ្រ និងប្រើប្រាស់ផលិតផលក្នុងស្រុក ជំនួសផលិតផលនាំចូលពីបរទេស។

រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្តិ បានគូសបញ្ជាក់ថា ការទិញផលិតផលខ្មែរ ស្មើនឹងជួយបង្កើតការពារជូនប្រជាពលរដ្ឋ កាត់បន្ថយភាពក្រីក្រ ព្រមទាំងជួយពង្រឹងស្ថិរភាពផលិតកម្មក្នុងស្រុក និងលើកកម្ពស់សមត្ថភាពប្រកួតប្រជែងរបស់កម្ពុជា នៅលើឆាកអន្តរជាតិ។

លោក ក៏បានអំពាវនាវដែរថា បើចង់ឲ្យផលិតផលជាតិរស់ សូមកុំឆ្ងាញ់តែរសជាតិផលិតផលបរទេស ដែលនេះជាសារដាស់តឿនមួយផងដែរ ដល់ប្រជាពលរដ្ឋកម្ពុជា ឲ្យនាំគ្នាគាំទ្រផលិតផលជាតិកាន់តែច្រើនឡើងៗ បើសិនផលិតករ និងសហគ្រិនកម្ពុជា អាចធ្វើបាន។

លោកបន្តថា ផលិតផលរបស់កម្ពុជា មានគុណភាពល្អ តម្លៃសមរម្យ តែត្រូវការផ្សព្វផ្សាយឲ្យបានទូលំទូលាយជូនប្រជាជនខ្មែរ និងអន្តរជាតិ ដើម្បីទាក់ទាញការគាំទ្រថែមទៀត ហើយលោករំពឹងថា វត្តមានផលិតផលខ្មែរ នឹងកាន់តែកើនឡើង នៅលើទីផ្សារនានា ជាពិសេសតាម ផ្សារទំនើបផងដែរ។

គួររម្លឹកដែរថា ព្រឹត្តិការណ៍ជម្រុញផលិតផលខ្មែរ ដែលបានរៀបចំឡើងនៅខេត្តបាត់ដំបង បានទាក់ទាញសហគ្រាសធុនតូច និងមធ្យម មកពីរាជធានីខេត្តចំនួន ១២០ស្តង់ ធ្វើការតាំងបង្ហាញ និងលក់ផលិតផលរបស់ខ្លួន សំដៅស្វែងរកប្រាក់ចំណូលទ្រទ្រង់និរន្តភាពផលិតកម្ម និងចូលរួមជម្រុញកំណើនសេដ្ឋកិច្ច៕