ខណ:ដែលភាពល្អូកល្អិនរវាងអ្នកនាងសុខ សោម៉ាវត្តី និងកីឡាករជម្រើសជាតិលោក លី វ៉ាហេទ ត្រូវគេកត់សម្គាល់មិនសូវបង្ហោះជាសាធារណ:ដូចមុននោះ តារាស្រីរូបនេះក៏ត្រូវគេឃើញបង្ហោះសារខូចចិត្តគួរឲ្យចាប់អារម្មណ៍ ដែលនាំឲ្យមានការប៉ាន់ស្មានថាស្នេហាខុសវ័យរបស់នាងប្រែប្រួល។ ស្របគ្នានោះ ប្រភពជាច្រើននិយាយថា ក្នុងប៉ុន្មានថ្ងៃនេះច្រើនមានអារម្មណ៍តុកស៊ិច ដោយមិនខុសពីមនុស្សខូចចិត្តឡើយ។

អ្នកនាង សុខ សោម៉ាវត្តី បានបង្ហោះលើផេកផ្ទាល់ខ្លួនកាលពីយប់ថ្ងៃទី២៨ មិថុនា ថា «ធ្វើអ្វីដែលអ្នកសប្បាយចិត្តទៅ មួយជីវិតមានប៉ុន្មានដង ម្នាក់ឯងមានអីមិនល្អ!»។ អមដោយសំណេរខូចចិត្តអ្នកនាងក៏បានបង្ហោះរូបថតជារបៀបស្រងេះស្រងោច ខណ:ដែលសារមុនៗរបស់នាងក៏បានរំលេចថាខ្លួនកាន់តែចាស់កាន់តែពូកែ ដែលធ្វើឲ្យគេដឹងថាសម្ព័ន្ធស្នេហារបស់នាងអាចនឹងមានការប្រេះស្រាំ។ ប្រភពពីតារាសិល្ប:បានអះអាងថា សុខ សោម៉ាវត្តី ក្នុងប៉ុន្មានថ្ងៃនេះច្រើនតែព្រលឹងមិននៅនឹងខ្លួន ជាពិសេសចាប់តាំងពីនាងមិនសូវមានឱកាសបង្អួតភាពផ្អែមល្ហែមដែលធ្លាប់តែមានជាមួយកីឡាករលី វ៉ាហេទ ដូចមុន។ រាល់ថ្ងៃគេមិនដឹងថាទំនាក់ទំនងរបស់អ្នកទាំង២ប្រែក្លាយជាយ៉ាងណានោះទេ តែយោងតាមការទម្លាយគឺប្រុសក្មេងរបស់នាងហាក់យកអាជីពបាល់ទាត់ហើយមិនសូវចែកពេលជួបជជែកលេងជាមួយនាងដូចមុនច្រើនទេ ទើបចេះតែធ្វើឲ្យនាងមិនសប្បាយចិត្ត។ កាលពីមុនអ្នកទាំង២ត្រូវគេអះអាងថាឧស្សាហ៍ជួបគ្នាជាប្រចាំ តែរយ:ពេលក្រោយនាងក៏រវល់ទទួលថត ហើយលោក លី វ៉ាហេទ ក៏រវល់ហ្វឹកហាត់ ធ្វើឲ្យស្ថានភាពទំនាក់ទំនងចាប់ផ្ដើមសោះកក្រោះ។ មានពេលខ្លះគេឃើញនាងមានអារម្មណ៍មួរម៉ៅពេលលេងហ្វេសប៊ុកម្នាក់ឯង និងមានអារម្មណ៍អត់សប្បាយចិត្តនៅពេលខលឲ្យលោកលី វ៉ាហេទ មកជួបហើយលោកប្រាប់ថាមកជួបមិនបាននោះផង។

យ៉ាងណាមិញគេមិនទាន់ដឹងថាសារខូចចិត្តរបស់នាង គឺជាការឆ្លុះបញ្ចាំងពីការបែកបាក់ជាមួយលោក លី វ៉ាហេទ គឺគ្រាន់តែផុសលេងដើម្បីទាក់ទាញការចាប់អារម្មណ៍នោះទេ ក្នុងពេលដែលស្នេហាមួយគូនេះត្រូវគេប៉ាន់ស្មានថាទំនងជាមានស៊ីជម្រៅគ្នាច្រើនទៅហើយពិបាករង្គោះរង្គើរ។ អ្នកសិល្ប:មួយក្រុមបានពន្លយពាក្យថា បើទោះជាមានរឿងមិនសប្បាយចិត្តខ្លះ តែសុខ សោម៉ាវត្តី និងលោក លី វ៉ាហេទ មិនមានរឿងដល់ថ្នាក់បែកបាក់នោះទេ ដោយសារតែអ្នកទាំង២សុទ្ធតែយល់ពីគ្នាច្បាស់លាស់ទៅហើយ។ ម្នាក់ៗយល់ថាការបង្ហោះសារខូចចិត្តរបស់នាង អាចគ្រាន់តែជាអារម្មណ៍មួរម៉ៅមួយពេលនៅពេលង៉ក់ងរ គឺមិនមែនជារឿងដែលបង្ហាញពីការរង្គោះរង្គើរស្នេហ៍ឡើយ។

យ៉ាងណាមិញ បើស្ថានភាពនេះចេះតែបន្តអូសបន្លាយ ទំនាក់ទំនងល្អប្រសើររបស់ស្នេហាមួយគូនេះក៏អាចនឹងដល់ផ្លូវទ័លផងដែរ ក្នុងពេលដែលលោក លី វ៉ាហេទ ទាំងក្មេង ទាំងសង្ហារ និងក៏ជាកីឡាករល្បីឈ្មោះផង ឯសុខ សោម៉ាវត្តី ដ្បិតថាមេម៉ាយមែន តែសម្បូរស្នេហ៍៕