រដ្ឋាភិបាលអ៊ីតាលី បានគំរាមគំហែងបញ្ឈប់នាវានៃប្រទេសដទៃ មិនឲ្យនាំជនចំណាកស្រុកយកមកកាន់កំពង់ផែ របស់ខ្លួនបន្តទៀតទ្បើយ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី២៩ ខែមិថុនា ឆ្នាំ២០១៧។

ការព្រមាននេះ បានកើតឡើងចំពេលអ្នកតំណាងសហភាពអឺរ៉ុបរបស់ប្រទេសអ៊ីតាលី លោក Maurizio Massari បានព្រមាននៅក្នុងលិខិតមួយផ្ញើទៅកាន់បណ្ដាលប្រទេស ក្នុងសហភាពអឺរ៉ុបថា « ស្ថានភាពក្នុងប្រទេសពេលនេះ បានក្លាយទៅជាគ្មាននិរន្តរភាព» ។

នាយករដ្ឋមន្រ្តីអ៊ីតាលីលោក Paolo Gentiloni បានចោទប្រកាន់ថា «បណ្ដាលជនជាតិអ៊ឺរ៉ុបផ្សេងទៀតជាច្រើន កំពុងព្យាយាមស្វែងរកមធ្យោបាយផ្សេង ដើម្បីធ្វើដំណើរចំណាកស្រុក»។

បើតាមការប៉ាន់ស្មានមនុស្សប្រហែល ១ម៉ឺននាក់ ត្រូវបានគេជឿថា បានប៉ុនប៉ងធ្វើដំណើរពីអាហ្វ្រិកខាងជើង កាលពី ៤ ថ្ងៃមុន។

គួរបញ្ជាក់ដែរថា ជនអន្តោរប្រវេសន៍ជាង ៧៣ ពាន់នាក់ហើយ បានមកដល់ប្រទេសអ៊ីតាលី នៅក្នុងឆ្នាំនេះ ដែលមានកើនឡើង ១៤% បើធៀបទៅនឹងរយ:ពេលដូចគ្នាកាលពីឆ្នាំមុន៕