កាលពីយប់ថ្ងៃទី២៩ មិថុនា ឆ្នាំ២០១៧ តារាចម្រៀង២រូបចុងក្រោយគឺអ្នកនាងកាតុ និងរ៉ូលីន បានមកដល់ប្រទេសកម្ពុជាទៀតហើយ បន្ទាប់ពីលោកអែនឌី បានចុះមកដល់មុន។ អ្នកទាំង៣បានចេញទៅសម្ដែងនៅអាមេរិកព្រមគ្នា ដោយតាមការអះអាងគឺទទួលជោគជ័យយ៉ាងខ្លាំង តាំងពីមុនចូលឆ្នាំខ្មែរនោះមក។

លោក អែនឌី បានអះអាងថាក្នុងជំហានចេញទៅសម្ដែងនៅអាមេរិកលោកបានចេញទៅសម្ដែងមុនគេ បន្តបន្ទាប់មកទើបអ្នកនាងកាតុ និងរ៉ូលីនបានទៅតាមក្រោយ ដោយការសម្ដែងខ្លះពួកលោកក៏សម្ដែងបែកគ្នា ហើយខ្លះក៏សម្ដែងជុំគ្នា។ ក្នុងនោះអតីតភរិយារបស់យ៉ែម សំអូន គឺអ្នកនាងយ៉ាន លីនដា ក៏បានឡើងពីប្រទេសអូស្រ្តាលី ទៅរួមសម្ដែងជាមួយលោកនៅលើទឹកដីសហរដ្ឋអាមេរិកផងដែរ ទើបធ្វើឲ្យការសម្ដែងរបស់លោកទទួលជោគជ័យ។ លោកាបានមកដល់ប្រទេសកម្ពុជាមុនអ្នកនាងកាតុ និងរ៉ូលីនប៉ុន្មានម៉ោង ដោយសារតែជើងហោះហើររបស់លោកត្រូវមកមុន។ លោកក៏មានគម្រោងចេញទៅសម្ដែងនៅអាមេរិកជាថ្មីផងដែរ បន្ទាប់ពីចប់បេសកកម្មនៅអាមេរិកលើកនេះ។

មិនខុសគ្នាដែរ អ្នកនាងកាតុនិងរ៉ូលីន ដែលបានបាត់មុខពីកម្ពុជាអស់ច្រើនខែ ហើយទើបមកដល់ប្រទេសកម្ពុជាកាលពីយប់ថ្ងៃទី២៩ មិថុនា ឆ្នាំ២០១៧នោះ បានអះអាងថា ការសម្ដែងរបស់ពួកនាងនៅលើទឹកដីអាមេរិកជោគជ័យ ដោយក្នុងនោះសូម្បីប្រាក់ធីបក៏រកបានច្រើននោះដែរក្នុងរយៈពេលដែលបានសម្ដែងជូនបងប្អូនខ្មែរនៅទីនោះ។ អ្នកទាំងពីរប្រាប់ថាក្រោយមកដល់ស្រុកគឺនឹងបង្ហាញមុខភ្លាមៗលើឆាកតន្ត្រី និងកម្មវិធីរបស់ទូរទស្សន៍ដោយសារតែមានអ្នកទាក់ទងហើយ ដើម្បីឲ្យពួកនាងបង្ហាញខ្លួន៕