ក្រុមកាំភ្លើងធំ Arsenal បានរងនូវការបដិសេធដ៍ធំមួយ ក្នុងការនាំយកខ្សែប្រយុទ្ធបារាំងរបស់ក្រុម Lyon កីឡាករ Alexandre Lacazette ក៍ប៉ុន្តែ ក្លិបអង់គ្លេសមួយនេះ មិនបោះបង់មហិច្ចតាចង់បានខ្សែប្រយុទ្ធរូបនេះឡើយ។

Daily Star បាមឲ្យដឹងថា ក្រុមកាំភ្លើងធំ Arsenal មិនទាន់បោះបង់បំណងនាំយកខ្សែប្រយុទ្ធ​ Alexandre Lacazette ឡើយ ថ្វីបើទទួលនូវការបដិសេធពីក្រុម Lyon ។ ជាការពិតណាស់ Arsenal មានការពេញចិត្តយ៉ាងខ្លាំងទៅលើទម្រង់លេងដ៍ល្អឥតខ្ចោះរបស់ខ្សែប្រយុទ្ធរូបនេះ។ ក៍ប៉ុន្តែ ក្រុម Lyon បាបដិសេធក្នុងការលក់ Alexandre Lacazette ព្រោះថា ក្លិបបារាំងមួយនេះ កំពុងចង់ឈ្នះពាន League 1 នៅឆ្នាំក្រោយ ជាហេតុនាំឲ្យក្លិប មិនអាចលក់ខ្សែប្រយុទ្ធរូបនេះ បានឡើយ។ យ៉ាងណាក៍ដោយ លោក Arsene Wenger អ្នកចាត់ការទូទៅរបស់ក្រុម Arsenal មិនទាន់អស់សង្ឃឹមនៅឡើយទេ។

នៅក្នុងសម្តីមួយឃ្លាដែលលោក Wenger ប្រាប់ទៅ Daily Star លោកបាននិយាយថា៖ ថ្វីបើ យើងទទួលបានការបដិសេធពីសំណាក់ក្រុម Lyon តែយើង នឹងព្យាយាមបន្តទៀត ក្នុងការនាំយកខ្សែប្រយុទ្ធដ៍ឆ្នើមរូបនេះ។ ជាការពិតណាស់ ការទិញកីឡាករមួយរូបមិនមែនជារឿងងាយឡើយ តែងតែមានការបដិសេធជានិច្ច ដូច្នេះហើយ ចំពោះ Alexandre Lacazette ដូចដែលបានឃើញស្រាប់ គាត់ជាខ្សែប្រយុទ្ធដ៍ល្អរបស់ក្លិប ជាហេតុធ្វើឲ្យក្លិបពិបាកក្នុងការលក់កីឡាកររូបនេះណាស់។

គួរបញ្ជាក់ផងដែរថា ខ្សែប្រយុទ្ធបារាំង Alexandre Lacazette វ័យ ២៦ឆ្នាំរូបនេះ ស៊ុតបាន ១០០គ្រាប់ឲ្យ Lyon ក្នុងការបង្ហាញខ្លួនបាន ២០៣ប្រកួត និងស៊ុតបាន ១គ្រាប់ ក្នុង១១ លើកនៃការបង្ហាញខ្លួនឲ្យក្រុមជម្រើសជាតិបារាំង។