អាមេរិក: តារាកំប្លែងជើងចាស់អាមេរិក ដ៏ល្បីល្បាញលោក Jerry Lewis ដែលបានឈ្នះពានរង្វាន់អន្ដរជាតិ សម្រាប់អាជីពសម្ដែងរបស់ខ្លួនរយ:ពេល ៥ទសវត្សរ៍មកហើយនោះ បានទទួលមរណ:ភាពនៅអាយុ ៩១ ឆ្នាំ។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី២១ ខែសីហា ឆ្នាំ២០១៧។
តាមសេចក្តីថ្លែងការណ៍មួយពីគ្រួសាររបស់លោក Lewis បាននិយាយកាលពីថ្ងៃអាទិត្យថា លោក Jerry Lewis និមិត្តរូបខាងកំប្លែងអាមេរិក និងជាតារាសម្ដែងដ៏មានប្រជាប្រិយភាព បានទទួលមរណភាព នៅគេហដ្ឋានរបស់លោកផ្ទាល់ ក្នុងទីក្រុងឡាសវេហ្គាស។
លោក Lewis ទទួលបានប្រជាប្រិយភាពចំណាត់ថ្នាក់លេខមួយ ក្នុងទសវត្សរ៍ ១៩៦០ តាមរយ:រឿងកំប្លែងរបស់លោកដូចជា The Bellboy ឆ្នាំ១៩៦០ និងរឿង The Nutty Professor ឆ្នាំ១៩៦៣។ ក្នុងនាមជាតារាដ៏សំខាន់បំផុតសម្រាប់ផលិតកម្ម Paramount លោកមានសេរីភាពគ្រប់គ្រាន់ ក្នុងការផលិតរឿងណាមួយ ដែលលោកចង់ផលិត៕
មតិយោបល់