ក្រោយពីបានចាកចេញពីផលិតកម្ម Galaxy គេកត់សម្គាល់ថាតារាចម្រៀងលោក សារ៉ាក់ ទទួលបានការចាប់អារម្មណ៍ជាងមុន ជាពិសេសបន្ទាប់ពីបទ «អាជីពអ្នកចាក់កន្ទុយលេខ» របស់លោកត្រូវបានទទួលស្គាល់នៅលើបណ្ដាញYoutube។
លោកកាន់តែមានទឹកមាត់លេបបន្ថែមទៀត ក្រោយពីបទ«ស្អប់អតីត»ដែលទើបតែចេញក្ដៅៗ ត្រូវបានគេចូលស្ដាប់ច្រើននៅលើបណ្ដាញសង្គម អមដោយការសរសើរថាមួយបទនេះទាក់ទាញ។

តារាចម្រៀងដែលបានផ្សងព្រេងមកពីខេត្តព្រៃវែងរូបនេះ និយាយថាលោកសប្បាយចិត្តណាស់ដែលមានឱកាសបានផលិតបទចម្រៀងនិពន្ធថ្មី ហើយទទួលបានការគាំទ្រជាបន្តបន្ទាប់នាពេលចុងក្រោយ។ ទោះជាបទ«ស្អប់អតីត»ត្រូវបានមជ្ឈដ្ឋានអ្នកស្ដាប់សរសើរថាមានអត្ថន័យជ្រាលជ្រៅ និងមានសាច់ភ្លេងគួរអោយចង់ស្ដាប់ភាគច្រើន ក៏លោកនៅតែមិនទាន់ហ៊ានរំពឹងច្រើននោះទេ ដោយលោកបញ្ជាក់ទុកអោយមហាជនជាអ្នកវិនិច្ឆ័យជាជាង។ លោកប្រកាសថានឹងត្រៀមចេញ MV បទនេះអោយបានឆាប់ៗដើម្បីអោយគាំទ្រដែលបានចាប់អារម្មណ៍ជាមួយបទ«ស្អប់អតីត»របស់លោកបានឃើញពីការប្រឹងប្រែងបន្ថែមទៀតរបស់លោកនៅក្នុងវិស័យចម្រៀង។ លោកថាមួយបទនេះត្រូវចិត្តលោកច្រើន ហើយលោកនឹងបន្តប្រឹងប្រែងផលិតបទនិពន្ធថ្មីដែលគុណភាព និងមិនកែច្នៃសាច់ភ្លេងដើមពីគេ ដើម្បីអោយកេរ្តិ៍ឈ្មោះរបស់លោកកាន់តែមានការទទួលស្គាល់នោះផងដែរ។ លោកគ្រោងនឹងចេញបទOriginal Song ជាច្រើនទៀត ដើម្បីបំបុកអារម្មណ៍មហាជនក្នុងពេលដ៏ខ្លី។

យ៉ាងណាមិញ លោកថាបទចម្រៀងមួយបទក៏ត្រូវតែសម្រាំងអោយល្អជាមុនផងដែរ ដើម្បីកុំអោយខាតកម្លាំងហើយមិនទទួលបានការគាំទ្រ។ ជាមួយគ្នានោះក៏ប្រកាសជំហរមិនទាន់ចូលជ្រកនៅក្នុងផលិតកម្មណាមួយបន្ទាប់ពីបានដាច់ស្រេចជាមួយផលិតកម្មចាស់ដូចគ្នា ដោយលោកប្រកាសថាចង់ពង្រឹងការផលិតបទផ្ទាល់ខ្លួនអោយមានការទទួលស្គាល់ច្រើនបន្តិចសិនចាំចាប់ផ្ដើមគិតគូររឿងកុងត្រាចូលផលិតកម្មណាមួយជាថ្មី៕