ព័ត៌មានសិល្បៈ និងកម្សាន្ត

លេចដំណឹង! ឱក សុគន្ធកញ្ញា ភ្ជាប់ពាក្យជាមួយប្អូនប្រុសថៅកែហង្សមាស

បើទោះជាមិនទាន់ច្បាស់លាស់ ប៉ុន្តែមានការលើកឡើងកាន់តែច្រើនថា តារាចម្រៀងល្បីឈ្មោះនាង ឱក សុគន្ធកញ្ញា កំពុងមានស្នេហាស៊ីជម្រៅជាមួយប្អូនប្រុសថៅកែហង្សមាសដែលបុរសវ័យប្រមាណជាង៤០ឆ្នាំម្នាក់នោះក៏មានងារជាឧកញ៉ាផងដែរ។ មានការទម្លាយថា នាង និងបុរសម្នាក់នោះមានទាំងពិធីភ្ជាប់ពាក្យស្ងាត់ៗដោយមានចាស់ទុំដឹងឮនោះផង ដោយគ្រាន់តែទិដ្ឋភាពនៃពិធីភ្ជាប់ពាក្យនោះមិនត្រូវបានគេទម្លាយ។ គេមិនដឹងថាការលើកឡើងនេះមានការពិតកម្រិតណានៅឡើយទេ ប៉ុន្តែផ្អែកតាមការទម្លាយដោយមិនបើកចំហររបស់អ្នកសិល្ប: ដែលស្និទ្ធិនឹងតន្ត្រីករមួយរូបបញ្ជាក់នេះជារឿងពិត។

ការលើកឡើងនេះ គឺបន្ទាប់ពីមានការសង្ស័យពីទំនាក់ទំនងរវាង នាង និង ឆន សុវណ្ណារាជ ថាជាការបង្វែងដាន និងបន្ទាប់ពីនាងប្ដូររថយន្តតម្លៃរាប់ម៉ឺនដុល្លារ ដែលរថយន្ដនោះមានគេខ្សឹបខ្សៀវថា ប្អូនប្រុសថៅកែហង្សមាសជាអ្នកទិញឲ្យ។ ប្រភពផលិតករ និងអ្នកដឹកនាំកម្មវិធីច្រើនឡើងសុទ្ធតែបានលើកឡើងពីចំណងស្នេហ៍របស់តារាស្រីរូបនេះ និងប្អូនប្រុសរបស់លោកងួន ដែលជាថៅកែហង្សមាស ដោយមានការអះអាងថាអ្នកទាំងពីរកាន់តែស្រឡាញ់ និងយល់ចិត្តគ្នាតាំងពីមុនភ្ជាប់ពាក្យស្ងាត់ៗនោះផង។

យ៉ាងណាក៏ដោយអ្វីៗបានត្រឹមតែជាសាយភាពពីបណ្ដាផលិតករនៅហង្សមាស និងអ្នកជិតស្និទ្ធិជាច្រើនរូបរបស់នាងប៉ុណ្ណោះ ប៉ុន្តែការពិតយ៉ាងណាគេមិនទាន់ដឹងទេ ក្នុងពេលដែលនាងក៏មិនដែលសម្ញ៉ែងឲ្យអ្នកគាំទ្រដឹងថានាងមានស្នេហា និងបញ្ជាក់ឲ្យដឹងថាមានអ្វីគួរឲ្យកត់សម្គាល់ជាមួយបុរសម្នាក់ដែលត្រូវគេស្គាល់ថាជាប្អូនប្រុសរបស់ថៅកែហង្សមាសនោះ។ ដំណឹងសាយភាយហាក់មានទម្ងន់ច្រើនឡើង ដោយអ្នកអះអាងបានទាំងនិយាយថាបានឃើញរូបថតបំពាក់ចិញ្ចៀនរបស់នាងជាមួយប្អូនប្រុសថៅកែហង្សមាស ក្នុងពិធីភ្ជាប់ពាក្យកាលពីពេលថ្មីៗនោះផង។ អ្នកសាយភាពដំណឹងដ៏រសើបនេះបានទាំងលើកឡើងថា បើឱក សុគន្ធកញ្ញា មិនមាបង្អែកធំដល់ម្លឹងនៅហង្សមាស គឺនាងអាចនឹងត្រូវគេទម្លាក់ដៃ ក្នុងពេលតារាហង្សមានមានអ្នកខ្លាំងច្រើនឡើង។ ប្រភពនោះព្រលយថានាងនឹងមិនភ័យរឿងធ្លាក់កូដទេ ដោយសារតែនាងមានសមត្ថភាពមិនធម្មតាលើសក្រុមចម្រៀងនៅហង្សមាសហើយថែមទាំងមានទាំងបង្អែកខ្លាំងផង ដែលមិនមានអ្នកណាហ៊ានទម្លាក់ដៃក្នុងការមិនលើកស្ទួយនាង ធ្វើឲ្យនាងប្រែប្រួលប្រជាប្រិយភាព។

ជាមួយនឹងព័ត៌មានរសើបនេះ ផុសញូនឹងរង់ចាំការបកស្រាយពី ឱក សុគន្ធកញ្ញា ដោយផ្ទាល់ ដើម្បីឲ្យច្បាស់ថាដំណឹងដែលថានាងមានទំនាក់ទំនងជាមួយប្អូនប្រុសថៅកែហង្សមាស ដល់ថ្នាក់ភ្ជាប់ពាក្យជាមួយគ្នា ថាជាការពិត ឬគ្រាន់តែជាពាក្យចចាមអារ៉ាម?

មតិយោបល់