ប្រឡូកសិល្បៈប្រមាណជាង១០រឿងនៅក្នុងវិថីសិល្បៈគេកត់សម្គាល់តារាសម្ដែងលោក ឆានុន ឆាយ៉ា ហាក់ទទួលបានការចាប់អារម្មណ៍ខុសពីមុន បន្ទាប់ពីលោកស្រាប់តែត្រូវផលិតករអោយសម្ដែងជាតួភេទទី៣ ឬហៅតួខ្ទើយជាប់គ្នាតែម្ដង ខណៈដែលលោកត្រូវគេសង្ស័យថាមានចំណូលចិត្តដូចគ្នានឹងតំណែងនេះផង។ យ៉ាងណាមិញ តារាវ័យ២៤ឆ្នាំរូបនេះ ហាក់មិនខ្វល់ពីពាក្យចចាមអារ៉ាមនោះទេ ដោយលោកប្រកាសថាក្រោយពីបានសម្ដែងជាតួភេទទី៣ ដោយត្រូវផលិតករអោយសម្ដែងជាតួស្រឡាញ់ភេទដូចគ្នាជាមួយលោកទេព រិន្ទដារ៉ូ ផងនោះ លោកថានឹងបន្តទទួលសម្ដែងទៀត ដោយមិនខ្វល់ពីការរិះគន់ឡើយ។

លោកឆានុន ឆាយ៉ា និយាយថា លោកបានទទួលសម្ដែងជាតួភេទទី៣ចំនួន៣រឿងចុងក្រោយ ដោយក្រុមផលិតករបានហៅការសម្ដែងរបស់លោកក្នុងតំណែងចុងក្រោយ ថាសមកម្ររកតួសម្ដែងណាមកសម្ដែងត្រាប់តាមផង។

លោកត្រូវគេអោយសម្ដែងជាតួខ្ទើយលើកដំបូងក្នុងរឿង«រាជបុរីComeback» លើកទី២ក្នុងរឿងភាគរបស់ទូរទស្សន៍CTN ក្រោមចំណងជើងថា«ក្រមុំបេះដូងដែកប៉ះអង្គរក្សចិត្តខ្លាំង» រឿងភាគ«អាពាហ៏ពិពាហ៏ចម្លែក» និងក្នុងភាពយន្តខ្នាតធំមួយទៀត ដែលផលិតករអោយសម្ដែងជាតួស្រឡាញ់គ្នាជាមួយលោកទេព រិន្ទដារ៉ូ ដែលខាងផលិតករស្នើអោយលាក់ចំណងជើង។

លោកថា៤រឿងចុងក្រោយគឺផលិតករសុទ្ធតែតម្រូវអោយលោកសម្ដែងជាតួប្រុសចរិតស្រី ដោយខាងផលិតករបានទទូចអោយលោកបន្តសម្ដែងក្នុងចរិតបែបនេះអោយបានច្រើនផង នៅក្នុងកាលៈទេសៈដែលតួសម្ដែងជាប្រុសសង្ហារភាគច្រើនមិនសូវចង់សម្ដែង។

លោកទទួលស្គាល់ថាភាពយន្តទាំង៤នោះមិនទាន់វាយលុកទីផ្សារនៅឡើយទេ ប៉ុន្តែតារាសិល្បៈ និងក្រុមផលិតករដែលលោកបានធ្វើការជាមួយ សុទ្ធតែបានដឹងថាលោកបានប្រឡូកការសម្ដែងចរិតនោះ ដោយលោកប្រកាសថាមិនខ្វល់ពីការរិះគន់ក្រោយពេលភាពយន្តទាំង៤ដំណើរការព្រមគ្នានោះផង។

សម្រាប់ភាពយន្តរឿង«អាពាហ៍ពិពាហ៍ចម្លែក»លោកថាមហាជនបានស្គាល់ពីទេពកោសល្យសម្ដែងរបស់លោករួចហើយ ប៉ុន្តែការសម្ដែងរឿងនោះមិនទាន់ខ្លាំងទេ បើធៀបនឹងការសម្ដែងក្នុងរឿង៣ទៀត ដែលគ្រោងដាក់បញ្ចាំងបណ្ដាក់គ្នាចាប់ពីចុងខែតុលានេះ រហូតដល់មុនដំណាច់ឆ្នាំ២០១៧។ លោកថាផលិតករហាក់ជម្រុញអោយលោកសម្ដែងជាតួអង្គភេទទី៣នាពេលចុងក្រោយ ហើយលោកក៏ប្រហែលជាគ្រងតំណែងនេះអោយមានការទទួលស្គាល់នៅក្នុងពិភពសម្ដែងផងដែរ បើទោះជានៅក្រៅការសម្ដែងមហាជននឹងអាចហៅលោកថា«អាខ្ទើយ» ឬហៅឈ្មោះតួអង្គដែលលោកបានសម្ដែងធ្វើភេទទី៣នោះនៅក្នុងផ្ទៃរឿង។
លោកថាការសម្ដែងបែបណាក៏លោកទទួលសម្ដែងផងដែរ ហើយបើក្រុមផលិតករនៅតែអះអាងថាលោកសម្ដែងជាតួបែបនេះនេះបានល្អ គឺលោកនឹងបន្តការសម្ដែង៕