មិនមែនត្រឹមតែតារាថ្មីៗ និងតារាល្បីឈ្មោះតែបានធ្លាក់ទីផ្សារមិនសូវមានការសម្ដែងប៉ុណ្ណោះទេ ដែលប្រឈមនឹងរឿងផលិតករបោកលុយនាពេលចុងក្រោយ សូម្បីតែតារាសម្ដែងល្បីឈ្មោះ កញ្ញា ឌុច លីដា ក៏បានបង្ហោះឲ្យដឹងថាមានផលិតករចិត្តសឿងបោកប្រាស់ចិត្តនាងដូចគ្នាផងដែរ។

នាងបានបង្ហោះឲ្យឃើញពីភាពក្រឡិចក្រឡុចរបស់ផលិតករម្នាក់នោះ ប៉ុន្តែក្រោយការបង្ហោះរបស់នាងក៏មានផលិតករ២រូបដែលសុទ្ធតែបានជ្រើសនាងឲ្យសម្ដែងរបស់គេ ក៏បានបង្ហើបឲ្យដឹងពីចំណុចអាក្រក់របស់នាងជាការវាយបកវិញផងដែរ។

ឌុច លីដា បានសរសេរនៅលើហ្វេសប៊ុកថា «បើអ្នកពិតជាគោរពតាមកិច្ចសន្យាមែននោះ អ្នកត្រូវតែបង់ប្រាក់ឲ្យខ្ញុំ៥០ភាគរយទៀតត្រឹមពាក់កណ្ដាលរឿង តែឥឡូវនេះរឿងជិតចប់ហើយ នៅសល់តែប៉ុន្មានថ្ងៃចុងក្រោយតែប៉ុណ្ណោះ អ្នកមិនគោរពពាក្យសន្យាសោះ សន្យាខ្យល់! អ្នកកុហកខ្ញុំបាន តែកុំព្យាយាមកុហកខ្លួនឯងឲ្យសោះ បើចង់ឲ្យខ្ញុំបន្តគោរពជាផលិតករនោះ ខ្ញុំអាចផុសវាបានដើម្បីឲ្យសិល្បករ និងផលិតករដទៃទៀតអានកម្សាន្ត សូមអរគុណ!»។ យ៉ាងណាក៏ដោយឌុច លីដា បានប្រកែកមិនព្រមបញ្ជាក់ឲ្យដឹងថាតើផលិតករម្នាក់នោះជាអ្នកណា និងមិនព្រមទម្លាយថាភាពយន្តមួយណាដែលមានបញ្ហាជាមួយនាងនោះទេ។

ជាមួយនឹងការបង្ហោះរបស់នាង បានធ្វើឲ្យមានការចាប់អារម្មណ៍យ៉ាងខ្លាំង តែគេមិនទាន់ដឹងថាតើហេតុផលដែលខាងផលិតករមិនព្រមបើកលុយឲ្យនាងតាមកិច្ចសន្យា តើពិតជាកំហុសរបស់ផលិតករទាំងស្រុង ឬមានការរួមចំណែកពីកំហុសរបស់នាងនោះទេ ក្នុងពេលដែលឌុច លីដា ធ្លាប់ត្រូវបានផលិតករមួយរូបប្រកាសវាយប្រហាររួចហើយថា នាងជាតារាពិបាកធ្វើការជាមួយ មានប្រវត្តិធ្វើបាបផលិតករ ដោយបានដាក់ថ្ងៃណាត់ហើយតែបែរជាធ្វើមកថតមិនកើតបណ្ដាលឲ្យផលិតកររៀបចំប្លង់ខាតអស់រាប់ពាន់ពាន់ដុល្លារ តែនាងបែរជាលេចមុខថតឲ្យផលិតករមួយផ្សេងក្នុងពេលដែលនាងប្រាប់ថាមានជំងឺជាទម្ងន់មកថតមិនបាន។

ភាពយន្តរឿង«អ្នកគ្រូក្រមុំ»ត្រូវបានគេដឹងថាសម្រេចកាត់ប្លង់នាងចោល និងប្ដូរខ្លឹមសាររឿងដោយសារតែអន្ទងឲ្យនាងមកថតក្នុងប្លង់ចុងក្រោយមិនបាន។

មិនខុសគ្នាពីការទម្លាយ ផលិតករមួយរូបដែលភ្នាក់ងារ Post komsan បានទាក់ទងសួរ បានឆ្លើយប្រាប់ថាឌុច លីដា មិនច្បាស់ថាដៀមដាមខ្លួន ឬយ៉ាងណានោះទេ ដោយសារតែនាងពិតជាបើកលុយមិនទាន់អស់ក្រោយពីបានថតភាពយន្តរបស់លោកមែន។

ប៉ុន្តែលោកថាបើនាងពិតជាមានបំណងថាឲ្យខ្លួនមែន គឺលោកក៏មិនខ្វះអំណះអំណាងក្នុងការតបតនោះដែរ ដោយសារតែនាងបានខកខានមិនមកថតរឿងរបស់លោកកាលពីប៉ុន្មានថ្ងៃមុនមួយលើក ធ្វើអោយលោក និងផលិតកម្មទាំងមូលខាតបង់លុយកាក់នៅក្នុងថ្ងៃនោះប្រមាណជា៣ពាន់ដុល្លារ។ លោកអះអាងថា ក្នុងពេលកុងត្រានាងបានប្រាប់ថា ថ្ងៃនេះបានអាចថតបាន ថ្ងៃនោះបានអាចថតបាន ប៉ុន្តែដល់ពេលថតជាក់ស្ដែងនាងគឺជាតារាដែលពិបាកធ្វើការជាមួយជាងគេ ដោយសារតែក្រុមការងារណាត់នាងម៉ោង៧ នាងមកម៉ោង១០ ហើយឲ្យតែដល់កំណត់ថ្ងៃបើកលុយ គឺនាងទារលុយបើកដោយមិនមានការយោគយល់ទេ។

មិនខុសពីផលិតករដែលក្រុមការងាររបស់យើងរក្សាសិទ្ធិមិនបញ្ចេញឈ្មោះដែរ ផលិតករមួយរូបផ្សេងទៀត ដែលបានជ្រើសនាងឲ្យសម្ដែងក្នុងភាពយន្តរបស់ខ្លួនមិនទាន់ចប់ដែរ ក៏បានបញ្ជាក់ថាបើនាងពិតជាថាឲ្យខ្លួន គឺនាងពិតជាខ្មាស់គេហើយ ដោយសារតែនាងគឺជាតារាដែលមិនគោរពពេលវេលា ហើយច្រើនយកលេសរាគខ្លាំងមកថតមិនបាន ដោយបានធ្វើឲ្យភាពយន្តរបស់លោករយាលថ្ងៃមិនអាចដំណើរការតាមកាលកំណត់។ លោកថាប្រហែលជានាងមិនថាឲ្យលោកទេ ប៉ុន្តែបើថាឲ្យលោកមែន គឺល្អមើលហើយ ដោយសារតែលោកដ្បិតថាមិនទាន់ជ្រះស្រឡះរឿងលុយសម្ដែងឲ្យនាងប្រាកដមែន ប៉ុន្តែក៏បានផ្ដល់ការយោគយល់ចំពោះនាងច្រើន។

យ៉ាងណាក៏ដោយគេមិនទាន់ដឹងថាក្នុងចំណោមផលិតករ២រូបដែល Post komsan ទាក់ទងបំភ្លឺ តើមានមួយរូបណាស្ថិតក្នុងការរបង្ហោះរបស់នាង ឬមិនមាននោះទេ ដោយគ្រាន់តែការអះអាងរបស់ផលិតករទាំងពីរបានហៅការបង្ហោះរបស់ឌុច លីដា មានន័យដៀមដាមឲ្យពួកលោកស្របគ្នា និងថាបើនាងពិតជាមានបំណងវាយប្រហារបែបនោះមែន គឺផលិតករម្នាក់ក្នុងចំណោមទាំង២ដែលនាងវាយប្រហារ ក៏នឹងបញ្ចេញទម្លាប់អាក្រក់របស់នាង ធ្វើឲ្យនាងបាត់បង់ទីផ្សារផងដែរ។ ផលិតករម្នាក់និយាយថា បើនាងសំដៅលើលោក គឺលុយដែលមិនព្រមបើកឲ្យអស់នោះ គ្រាន់តែចង់ឲ្យនាងកំណត់ថ្ងៃទទួលថតឲ្យលោកឲ្យបានតាមកំណត់ប៉ុណ្ណោះ គឺមិនមែនអស់លុយឲ្យទេ។

ប៉ុន្តែកន្លងមក ឌុច លីដា ធ្លាប់បានបញ្ជាក់ថា ហេតុផលដែលនាងមិនព្រមទៅថតឲ្យផលិតករតាមការកំណត់គឺមកពីខាងផលិតករបានទាមទារឲ្យនាងទៅជួសរឿងខុសថ្ងៃព្រមព្រៀង ធ្វើឲ្យនាងមិនអាចទម្លាក់ការងារនៅកន្លែងផ្សេងប៉ុណ្ណោះ ហើយបណ្ដាលមកពីពិបាកលុយផង ទើបនាងមិនចង់ថតបន្ត។ អ៉ីចឹងហើយទើបគេមិនដឹងថារឿងរ៉ាវដែលនាងបង្ហោះ ហើយមានផលិតករ២រូបមានខ្លួនទទួលនេះ តើអ្នកណាជាអ្នកខុសពិតប្រាកដ៕