កាលពីរសៀលថ្ងៃ១១ វិច្ឆិកា កំពូលតារាល្បីល្បាញរបស់សិង្ហបុរី៣រូប បានបង្ហាញខ្លួននៅក្នុងប្រទេសកម្ពុជាគួរអោយភ្ញាក់ផ្អើល នៅសណ្ឋាគារឡឺរ៉ូយ៉ាល់ដោយមានអ្នកគាំទ្រជាច្រើនដែលនិយមទស្សនាការសម្ដែងរបស់អ្នកទាំង៣ចូលរួម។ នេះជាវត្តមានរបស់តួឯកទាំង៣ដួង ដែលជាតារាល្បីល្បាញរបស់ប្រទេសសិង្ហបុរី ដើម្បីមកសម្ពោធភាពយន្តថ្មីរបស់ពួកគេ ដែលគ្រោងនឹងដាក់បញ្ចាំងនៅកម្ពុជាក្នុងពេលខាងមុខតាមរយៈកញ្ចក់ទូរទស្សន៍CTV8HD ។

វត្តមានតារាប្រុសស្រីទាំង៣ដួងនោះរួមមានលោក ដេសមិន តាន់ Desmond Tan កញ្ញា ផេកឆ័រ Paige Chua និងលោក រ៉ូមីអូ តាន់ Romeo Tan ដែលអ្នកទាំង៣សុទ្ធសឹងតែជាតួអង្គឯកក្នុងភាពយន្តភាគរឿង«ត្រៀមខ្លួនដើម្បីជាតិ»។ តារាទាំង៣គឹជាកំពូលតារាសម្ដែងប្រចាំនៅក្នុងប្រទេសសិង្ហបុរី ហើយក៏មិនមែនជាលើកដំបូងនោះដែរដែលអ្នកទាំង៣បានមកដល់ប្រទេសកម្ពុជា ដោយសារតែពេលកន្លងមកក៏ធ្លាប់មានវត្តមានផងដែរ ដោយគ្រាន់តែការមកដល់របស់ពួកគេ គឺមិនមែនជុំគ្នាបែបនេះ ដោយសារតែការមកកម្ពុជាមុនៗគឺមកក្នុងគោលបំណងសម្ពោធភាពយន្តដូចគ្នា ហើយជារឿងដែលតារាម្នាក់ៗក្នុងចំណោមពួកគេ ត្រូវសម្ដែងជាមួយតារាផ្សេង។ អ្នកគ្រប់ប្រចាំទូរទស្សន៍ CTV8HD បានអះអាងថាវត្តមានរបស់អ្នកទាំង៣នៅក្នុងប្រទេសកម្ពុជាកាលពីរសៀលថ្ងៃទី១១ វិច្ឆិកា គឺតបតាមការអញ្ជើញរបស់ស្ថានីយទូរទស្សន៍របស់ខ្លួនដែលជាដៃគូសហការរបស់ផលិតកររឿងនៅសិង្ហបុរី ដើម្បីសម្ពោធភាពយន្តរឿង«ត្រៀមខ្លួនដើម្បីជាតិ»ដែលប៉ុស្ដិ៍CTV8HD ទើបនឹងទិញសិទ្ធិផ្ដាច់មុខ ហើយត្រៀមដាក់ផ្សាយនៅលើកញ្ចក់ទូរទស្សន៍នាពេលខាងមុខ។

លោក ដេសមិន តាន់ ជាតួអង្គឯកក្នុងរឿង និងជាកំពូលតារាសិង្ហបុរីល្បីល្បាញ បានអះអាងថាភាពយន្តរឿង«ត្រៀមខ្លួនដើម្បីជាតិ»ជាភាពយន្តល្បីឈ្មោះមួយរបស់ប្រទេសសិង្ហបុរីដែលបានចំណាយដើមទុនក្នុងការថតរហូតដល់ច្រើនសែនដុល្លារ ដោយសារតែមានសកម្មភាពសម្រិតសម្រាំងពាក់ព័ន្ធនឹងការកិច្ចការហ្វឹកហាត់ទាហាន និងការការពារសុវត្ថិភាពប្រទេស ដែលតម្រូវអោយភាពយន្តទាំងមូលចំណាយទុនផលិតខ្ពស់ និងចំណាយតួអង្គច្រើន។ ក្នុងនោះលោកក៏ជាអ្នកបង្ហាត់កងទ័ពដែលមានប្លង់ពិបាកៗរាប់មិនអស់ផងដែរ បើធៀបនឹងការសម្ដែងកន្លងមករបស់លោក។ លោកថាសប្បាយចិត្តដែលបានមកដល់កម្ពុជាជាថ្មី ហើយឃើញអ្នកគាំទ្រជាជនជាតិកម្ពុជាស្គាល់ឈ្មោះរបស់លោក និងស្គាល់នូវរឿងសម្ដែងរបស់លោកតាមរយៈការទិញសិទ្ធដាក់បញ្ចាំងនៅលើកញ្ចក់ទូរទស្សន៍ CTV8HD។

កញ្ញា ផេក ឆ័រ តារាសម្ដែងស្រីក្នុងរឿង«ត្រៀមខ្លួនដើម្បីជាតិ»បានអះអាងថាកញ្ញា រឹតតែមានប្លង់ស្មុគស្មាញក្នុងការសម្ដែងច្រើនឡើងថែមទៀត ដោយសារតែនាងត្រូវសម្ដែងជាកងទ័ពជើងទឹកស្រី ហើយជារឿងដែលនាងត្រូវផ្សងគ្រោះថ្នាក់ និងនឿយហត់ច្រើនដើម្បីថតចប់។ កញ្ញាថានេះជាលើកទី២ដែលបានមកដល់ប្រទេសកម្ពុជា ហើយក្នុងថ្ងៃណាមួយកញ្ញានឹងមានគម្រោងមកសម្ដែងនៅក្នុងប្រទេសកម្ពុជា ដើម្បីផ្សព្វផ្សាយពីប្រទេសកម្ពុជានៅក្នុងប្រទេសសិង្ហបុរីវិញម្ដង។

លោករ៉ូមីអូ តាន់ ដែលជាតួអង្គឯកមួយរូបដែលនៅក្នុងរឿងបានអះអាងថាសប្បាយចិត្តយ៉ាងខ្លាំង ដែលភាពយន្តរឿង«ត្រៀមខ្លួនដើម្បីជាតិ»ត្រូវបានទូរតស្សន៍របស់កម្ពុជាដ៏ល្បីគឺ CTV8HD ទិញសិទ្ធិយកមកដាក់បញ្ចាំង ក្នុងពេលដែលភាពយន្តនេះបានទទួលការគាំទ្រយ៉ាងភ្លូកទឹកភ្លូកដីនៅក្នុងប្រទេសសិង្ហបុរី និងបណ្ដាប្រទេសនៅអាស៊ីមួយចំនួនទៀត។ លោកថាមួយរឿងលោកត្រូវគេអោយសម្ដែងជាតួទាហានដែលមានការបោះបង់មុខជំនួញ និងភ្លេចសូម្បីតែការមើលថែភរិយា ដើម្បីហ្វឹកហាត់ និងចូលធ្វើទាហានជួយការពារជាតិ។ លោកថាមួយរឿងនេះគឺបង្ហាញនូវការអប់រំអោយមើលឃើញពីតម្លៃនៃការលះបង់សម្រាប់ជាតិ និងសង្គមគ្រួសារយ៉ាងខ្លាំង ដោយលោករំពឹងយ៉ាងខ្លាំងថាភាពយន្តនេះនៅពេលដាក់ផ្សាយផ្លូវការនឹងផ្ទុះការគាំទ្រមិនចាញ់នៅក្នុងប្រទេសកំណើតលោកនោះផង។

លោកថាភាពយន្តនេះមានចំនួនប្រមាណ២០ភាគ ហើយក្រោយការបង្ហាញខ្លួននៅក្នុងប្រទេសកម្ពុជាកាលពីរសៀល ថ្ងៃទី១១ វិច្ឆិកានៅសណ្ឋាគារឡឺរ៉ូយ៉ាល់ ពួកលោកទាំង៣ក៏នឹងទៅពញាក់អ្នកគាំទ្រនៅផ្សារទំនើបអ៊ីអន ដោយមានការថតរូបជុំគ្នា និងលេងហ្គេមផ្ដល់រង្វាន់ផង នៅថ្ងៃទី១២ វិច្ឆិកា មុនចាកចេញពីកម្ពុជា៕