បរទេសៈ នៅក្នុងអំឡុងពេលជំនួបដ៏ខ្លី រវាងប្រធានាធិបតីរុស្ស៊ី លោក វ្លាឌីមៀរពូទីន និងប្រធានាធិបតីអាមេរិក លោក ដូណាល់ ត្រាំ នៅខាងក្រៅកិច្ចប្រជុំកំពូល APEC ពួកគេបានអនុម័តសេចក្តីថ្លែងការណ៍រួមគ្នាមួយ ទាក់ទងនឹងប្រទេសស៊ីរី។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី១១ ខែវិច្ឆិកា ឆ្នាំ២០១៧។

មេដឹកនាំទាំងពីរ បានអះអាងជាថ្មីអំពីការប្តេជ្ញាចិត្តរបស់ពួកគេ ចំពោះអធិបតេយ្យភាព និងបូរណភាពទឹកដីរបស់ប្រទេសស៊ីរី ហើយបានអំពាវនាវដល់ភាគីទាំងឡាយ ដែលកំពុងមានជម្លោះនៅទីនោះ ឲ្យចូលរួមក្នុងដំណើរការដោះស្រាយនយោបាយ នៅទីក្រុងហ្សឺណែវ ព្រមទាំងបានរំលឹកឡើងវិញ ជុំវិញវិធានការកម្ចាត់ពួកសកម្មប្រយុទ្ធ Daesh ទៀតផង។

តាមសេចក្តីថ្លែងការណ៍រួមគ្នា បានឲ្យដឹងថា ប្រធានាធិបតីនៃប្រទេសទាំងពីរ បានព្រមព្រៀងគ្នារក្សាទំនាក់ទំនងយោធា ដែលមានស្រាប់ នៅក្នុងប្រទេសស៊ីរី ដើម្បីធានាសន្តិសុខដល់កងកម្លាំងប្រដាប់អាវុធអាមេរិក និងរុស្ស៊ី ក៏ដូចជាដើម្បីទប់ស្កាត់ឧប្បត្តិហេតុដ៏គ្រោះថ្នាក់ផ្សេងៗ ដែលបង្កទ្បើងពីកងកម្លាំងសម្ព័ន្ធមិត្តរបស់ក្រុមភេរវកម្ម Daesh៕