បន្ទាប់ពីរកឃើញថាលោកនាយវីតាមីនសេ មានជំងឺដំបៅក្រពះធ្ងន់ធ្ងរហើយមិនអាចធ្វើការវះកាត់ ឬបាញ់កាំរស្មីដើម្បីរំលាយដុំសាច់ក្នុងថ្លើមបាន កាន់តែធ្វើឲ្យអ្នកនាងប៉េងប៉ោងជាកូនស្រីមានការរន្ធត់ចិត្តខ្លាំងឡើងដោយសារតែជំងឺរបស់ឪពុកកាន់តែស្ថិតក្នុងការគំរាមកំហែងជាងមុន។

អ្នកនាងប្រកាសថាគ្រោងនឹងលក់ឡាន ប្រសិនបើខ្ចីធនាគារមិនទាន់ ដើម្បីប្រមូលលុយយកឪពុកទៅក្រៅប្រទេសគឺថៃ និងសិង្ហបុរី ដើម្បីឲ្យបានអស់ចិត្ត។

អ្នកនាងប៉េងប៉ោង និយាយថាមកទល់ពេលនេះឪពុករបស់អ្នកនាងគឺលោកវីតាមីនសេ មិនត្រូវបានក្រុមគ្រូពេទ្យឲ្យសម្រាកនៅក្នុងមន្ទីរពេទ្យនោះទេ ដោយសារតែលោកមានជំងឺដំបោះក្រពះធ្ងន់ធ្ងរមួយបន្ថែមទៀត ដែលមិនអាចឲ្យជំងឺដុំសាច់របស់លោកវីតាមីសេ អាចធ្វើអ្វីបាន។

អ្នកនាងថាគ្រូពេទ្យតម្រូវឲ្យលោកវីតាមីនសេ សម្រាកព្យាបាលជំងឺដំបៅក្រពះអោយជាសះសិន ទើបអាចសម្រេចថាត្រូវវះកាត់ ឬប្រើថ្នាំបាញ់រំលាយដុំសាច់ទៅបាន ខណៈដែលការវះកាត់ក៏មិនមែនជារឿងងាយស្រួលសម្រាប់ឪពុកអ្នកនាងដែលមានជំងឺទឹកនោមផ្អែមផង និងមានវ័យជរាផង ដែលមិនមានកម្លាំងគ្រប់គ្រាន់អាចទប់នឹងថ្នាំរំលាយដុំសាច់បាន ប្រសិនបើជម្រើសយកជម្រើសប្រើថ្នាំ។

អ្នកនាងគ្រូពេទ្យស្ម័គ្រចិត្តរបស់ធីតា និងគ្រូពេទ្យនៅមន្ទីរពេទ្យមិត្តភាពសូវៀត សុទ្ធតែបានយកចិត្តទុកដាក់ជាមួយជំងឺរបស់លោកវីតាមីនសេ ប៉ុន្តែអ្នកនាងបានឮមកថាជំងឺរបស់ឪពុកនាងបានបញ្ជូនទៅព្យាបាលនៅក្នុងប្រទេសថៃ ឬប្រទេសសិង្ហបុរីគឺនឹងមានសង្ឃឹមច្រើន ទើបអ្នកនាងចង់ប្រថុយ។ អ្នកនាងថាខ្លួននឹងសម្រេចលក់រថយន្តផ្ទាល់ និងដាក់ឈ្មោះខ្ចីធនាគារអេស៊ីលីដាព្រមគ្នា ដើម្បីប្រមូលលុយមួយចំនួនបញ្ជូនលោកវីតាមីនសេទៅកាន់ប្រទេសថៃ ដោយអ្នកនាងថាបើខាងពេទ្យថៃមិនអាចព្យាបាលគឺអ្នកនាងនិងតស៊ូបញ្ជូនឪពុកទៅកាន់ប្រទេសសិង្ហបុរី។

អ្នកនាងថាមានអារម្មណ៍សប្បាយចិត្តណាស់ដែលបានគ្រូពេទ្យរបស់ធីតាខ្នះខ្នែងជួយលោកវីតាមីនសេ តែអ្នកនាងនៅតែចង់បញ្ជូនឪពុកទៅកាន់ប្រទេសថៃឲ្យបានអស់ចិត្ត ទើបសម្រេចចិត្តដាក់គម្រោងលក់ឡាន និងដាក់សំណើរខ្ចីលុយធនាគារដើម្បីបានលុយសមល្មមមួយដោះស្រាយបន្ទុកនោះ។ អ្នកនាងបានសួរមិត្តភក្តិនៅក្នុងសិល្បៈថា តើគួរទុកឲ្យឪពុកស្ថិតក្នុងស្ថានភាពដូចរាល់ថ្ងៃ ឬគួរបញ្ជូនទៅព្យាបាលក្រៅប្រទេស ដែលជាជម្រើសចុងក្រោយ? ក្នុងពេលដែលអ្នកនាងប្រាប់ថាបើទោះជាមួយជំហានស្លាប់ក៏អ្នកនាងត្រូវតែធ្វើចំពោះឪពុកវិញដែរ ដោយមិនអាចបណ្ដោយឲ្យលោកវីតាមីនសេស្ថិតក្នុងស្ថានភាពមិនមានការខ្នះខ្នែងបញ្ជូនចេញទៅក្រៅប្រទេសនោះទេ។

យ៉ាងណាមិញ អ្នកនាងថាគម្រោងបញ្ជូនឪពុកចេញក្រៅប្រទេសនៅមិនទាន់អាចសម្រេចនោះទេ ដោយសារតែនាងក៏ត្រូវការការពិភាក្សាជាមួយគ្រូពេទ្យធីតាដែលជួយខ្នះខ្នែងជួយដល់ឪពុក ត្រូវរង់ចាំរហូតដល់អ្នកនាងអាចលក់ឡាន និងខ្ចីលុយធនាគារបានទុកក្នុងដៃជាមុនសិន ដើម្បីកុំឲ្យមានបញ្ហាប្រឈមណាមួយក្នុងពេលយកលោកវីតាមីនសេចេញទៅប្រទេសថៃ ឬសិង្ហបុរី។

អ្នកនាងថាកំពុងជជីកសួរគេពីលទ្ធភាពរបស់ពេទ្យថៃ និងពេទ្យសិង្ហបុរី តែបើខាងអ្នកជំនាញទាំងពីរផ្ដល់លទ្ធផលថាស្ថានភាពជំងឺរបស់ឪពុកបើនៅព្យាបាលនៅក្នុងប្រទេសកម្ពុជាក៏មិនខុសគ្នា នោះអ្នកនាងក៏សុខចិត្តទុកឪពុកនៅបន្តព្យាបាលក្នុងស្រុកផងដែរ។ អ្នកនាងនិយាយថា«បងកំពុងសួរគេ ថាបើនៅថៃ ឬនៅសិង្ហបុរី គេអាចមើលប៉ាបាន គឺបងមានតែលក់ឡាន ឬដាក់បញ្ចាំផ្ទះដើម្បីខ្ចីធនាគារទេ ដើម្បីមានលុយយកគាត់ទៅក្រៅ បងសុខចិត្តអស់អីក៏បានដែរ ឲ្យតែប៉ាបានជា!»។

អ្នកនាងមិនទាន់ដឹងថានឹងអាចប្រមូលលុយបានប៉ុន្មានសម្រាប់ត្រៀមយកឪពុកទៅក្រៅនោះទេ ដោយអ្នកនាងបានទៅពិភាក្សាជាមួយធនាគារ គឺគេមិនទាន់ឆ្លើយតបថាអាចឲ្យអ្នកនាងខ្ចីប៉ុន្មាននៅឡើយ ខណៈដែលការលក់ឡានក៏នឹងជាជំហានទី២ប្រសិនបើលុយដែលធានាអោយខ្ចីមិនគ្រប់សម្រាប់ការចំណាយ៕