ខុសពីការបើកសម្ពោធដាក់បញ្ចាំងរឿងរបស់ផលិតកម្មផ្សេង ផលិតកររឿង«នរណា Comeback» ដែលត្រូវគេស្គាល់ថាកាលពីមុនបានប្រើចំណងជើងរឿងថា«រាជបុរី Comeback »ក្រោយផ្ទុះចម្រូងចម្រាស់ជាមួយគ្រួសារខាងលោករាជ បុរី នោះ បានអះអាងថាលោកនឹងធ្វើកម្មវិធីធំ២ ដើម្បីអោយបើកដាក់បញ្ចាំងរឿងរបស់ខ្លួនមានភាពខុសគេ។ កម្មវិធីទាំង២ត្រូវបានគេរំពឹងយ៉ាងខ្លាំងថានឹងជួយអោយភាពយន្តរបស់លោកទទួលបាននូវភាពទាក់ទាញនោះផង ដើម្បីអោយរឿងទាំងមូលមានការចាប់អារម្មណ៍ចង់ទៅទស្សនា ក្នុងពេលផលិតកម្មរបស់លោកទើបតែសម្រេចចិត្តផលិតរឿងជាថ្មី។

លោក ហួរ សុផល ហៅសិរី ចាងហ្វាងផលិតកម្មក្លាស៊ិក បានអះអាងថានៅក្នុងពិធីសម្ពោធរឿង«នរណា Comeback » ខាងមុខនេះ លោកនឹងធ្វើទម្រង់បើកសម្ពោធអោយខុសពីគេ ដោយនៅល្ងាចថ្ងៃទី១៥ វិច្ឆិកា គឺលោកនឹងរៀបចំព្រឹត្តិការណ៍កម្រាលព្រំក្រហម ដើម្បីកាត់ខ្សែបូធំមួយដើម្បីប្រកាសអោយដឹងពីការបើកសម្ពោធរឿង ហើយនៅថ្ងៃទី១៦ វិច្ឆិកា បន្ទាប់គ្នា គឺលោកនឹងរៀបចំតារាសិល្បៈរហូតដល់២៥០តួ អោយទស្សនាភាពយន្តអោយកក្រើករោងកុនតែម្ដង។

លោកបន្តថាកម្មវិធីកាត់ខ្សែបូរលើកម្រាលព្រំក្រហម នឹងត្រូវធ្វើឡើងនៅវេលាម៉ោង៤កន្លះល្ងាច ដោយលោករៀបចំនៅលើទីលានផ្ញើម៉ូតូនៅខាងមុខផ្សារស៊ីធីម៉ល នៅទល់មុខសាលាដំបូងរាជធានីភ្នំពេញតែម្ដង ដើម្បីអោយមហាជនបានឃើញពីពិធីទាំំងមូល អមអោយឃោសនស័ព្ទ និងការបកស្រាយបទចម្រៀងពីសំណាក់តារាល្បីៗជាច្រើននាក់។ នៅក្នុងពិធីនោះលោកនឹងស្នើអោយតារាដែលសុទ្ធសឹងតែជាផលិតករ និងតារាល្បីៗស្លៀកពាក់ក្រហមខ្មៅ ហើយដើរលើកម្រាលព្រំ ដោយមុននឹងកាត់ខ្សែបូរប្រកាសរឿងក៏នឹងមានកម្មវិធីគួរអោយកត់សម្គាល់ជាច្រើនផងដែរជាពិសេសគឺសកម្មភាពថតរូបផ្ទាល់ជាមួយតារាសម្ដែងល្បីៗ ដែលជាភ្ញៀវកិត្តិយស និងជាតួសំខាន់នៅក្នុងភាពយន្តរឿង«នរណា Comeback »ដោយផ្ទាល់តែម្ដង។ លោកថាពិធីនេះត្រូវបានរៀបចំទទួលភ្ញៀវជាអ្នកមុខមាត់ និងតារាល្បីៗប្រមាណជាង១០០នាក់ ដោយក្រៅពីវត្តមានតារាសម្ដែងក្នុងរឿងក៏នឹងមានតារាចម្រៀងល្បីៗមកពីផលិតកម្មផ្សេងៗមកច្រៀងកំដរោងផងដែរ។

ដោយឡែកសម្រាប់កម្មវិធីថ្ងៃទី១៦ វិច្ឆិកា លោកថាគឺជាប្រមូលផ្ដុំតារាល្បីៗនៅក្នុងពិភពសិល្បៈ ជាពិសេសតារាសិល្បៈមកពីក្រុម«គ្រួសារតារាកម្ពុជា»ដើម្បីធ្វើសន្និសីទកាសែតនៅជាន់រោងកុនក្នុងផ្សារអ៊ីអន វេលាម៉ោង១រសៀល និងទស្សនាភាពយន្តតែម្ដង ដោយលោកបញ្ជាក់ថានៅក្នុងពិធីនោះ គឺនឹងមានភាពទាក់ទាញយ៉ាងខ្លាំង ដោយសារតែអ្នកគាំទ្រនៅក្នុងរោងកុន នឹងបានជួបដោយផ្ទាល់ជាមួយតារាសម្ដែងក្នុងរឿង និងតារាល្បីៗជាច្រើនផ្សេងទៀត ដើម្បីថតរូបដោយផ្ទាល់ជាមួយតារាសិល្បៈ មុន និងក្រោយការទស្សនារឿង។ លោកបានចំណាយទិញសំបុត្រនៅក្នុងរោងកុងរបស់ដល់២៥០កៅអី ដើម្បីអោយតារាសិល្បៈ បានទស្សនាជុំគ្នា និងបានបង្ហាញពីការជួបជុំក្នុងការគាំទ្រដល់ស្នាដៃរឿង«នរណា Comeback » ដែលលោកបានផលិតក្រោយពីផលិតកម្មក្លាស៊ិក ផ្អាកដំណើរការអស់ច្រើនឆ្នាំ។

លោកអះអាងថាភាពយន្តរឿង«នរណា Comeback » នឹងក្លាយជាភាពយន្តទាក់ទាញនៅក្នុងពិភពភាពយន្ត ដោយសារតែលោកក៏បានសម្រិតសម្រាំងទាំងគុណភាព និងសាច់រឿងដើម្បីធ្វើការប្រកួតប្រជែង។ លោកហួរ សុផល បញ្ជាក់ថា ភាពយន្តរឿង«នរណា Comeback » នឹងដំណើរការលក់សំបុត្រផ្លូវការនៅថ្ងៃទី១៦ វិច្ឆិកា ទើបលោកសម្រេចជ្រើសយកថ្ងៃនោះធ្វើជាថ្ងៃជួបជុំតារាសិល្បៈ ដើម្បីបានទស្សនាកុននៅរោងអ៊ីអន បន្ទាប់ពីធ្វើពិធីកាត់ខ្សែបូរលើកម្រាលព្រំនៅល្ងាចថ្ងៃទី១៥ វិច្ឆិកា៕
​