ក្នុងមួយរយៈចុងក្រោយគេកត់សម្គាល់ថាតារាចម្រៀង អ្នកនាង មាស លក្ខិណា ដែលទឹកដមសំឡេងរបស់អ្នកនាងត្រូវបានគេកោតសរសើរថាពិរោះស្រដៀងនឹងម្ចាស់ដើមគឺ រស់ សេរីសុទ្ធា កាន់តែមានទីផ្សារសិល្បៈ ដល់ថ្នាក់រកពេលទទួលការងារច្រៀងរាំលែងចង់កើត។ អ្នកនាងក៏ទើបតែច្រានចចោលការងារអញ្ជើញអោយចេញច្រៀងក្រៅស្រុក និងការងារកាន់កាប់ក្នុងកម្មវិធី«មរតកសំនៀង»របស់ទូរទស្សន៍អប្សរាដូចមុន ព្រោះតែកាក់កបនឹងរបរលក់ត្រីងៀតនោះផងដែរ។

អ្នកនាងមាស លក្ខិណា និយាយថាបើធៀបនឹងរយៈពេលមុន គឺអ្នកនាងចាប់ផ្ដើមយកពេលចូលប្រឡូកសិល្បៈ ទៅធ្វើត្រីងៀត ផ្អកប្រហុក និងត្រីប្រឡាក់ជាដើមដើម្បីរកចំណូលច្រើនជាង ដោយសារតែមុខរបរនេះដ្បិតថាតម្រូវអោយអ្នកនាងចំណាយកម្លាំងរាងហត់បន្តិច ប៉ុន្តែបើនិយាយពីចំណូលកប់ក្ដោង។ អ្នកនាងថាត្រីងៀតធម្មជាតិរបស់ខ្លួនរបស់គឺថ្នាក់រកត្រីមកធ្វើជាងៀតលក់អោយភ្ញៀវអត់ទាន់នោះទេ ទើបការងារអញ្ជើញអោយច្រៀងពេលខ្លះ គឺអោយតែចំនឹងការងារត្រូវពន្លឿនការកុម្ម៉ង់របស់ភ្ញៀង គឺអ្នកនាងសុខចិត្តខកខាន។
អ្នកនាងថាកាលពី៣ឆ្នាំមុន អ្នកនាងបន់អោយមានការអញ្ជើញប៉ុណ្ណោះ និយាយរួមសូម្បីតែកម្មវិធីច្រៀងរាំមិនទទួលបានកម្រៃក៏អ្នកនាងមិនដែលចោលដែរ ប៉ុន្តែចាប់តាំងពីអ្នកនាងបែកគំនិតបើកជាស្ទីឌីយោថតចម្រៀង និងធ្វើត្រីងៀតដាក់លក់តាមអនឡាញ គឺមានតែការងារសិល្បៈសំខាន់ៗប៉ុណ្ណោះ ដែលអ្នកនាងមិនចោល។

អ្នកនាងថារាល់ថ្ងៃអ្នកនាងត្រូវចំណាយប្រឡាក់ត្រីដោយខ្លួន ដោយការប្រឡាក់ងៀត និងធ្វើប្រហុកផ្អកជាដើម ក៏អ្នកនាងដុតដៃដុតជើងដោយផ្ទាល់នោះដែរ ទើបមុខរបរធ្វើត្រីធម្មជាតិជាងៀត ជាផ្អក និងជាត្រីប្រឡាក់ជាដើម ទទួលបានជោគជ័យព្រោះតែមានការគាំទ្ររហូតដល់ថ្នាក់ធ្វើងៀតមិនទាន់។ អ្នកនាងថាហេតុផលដែលធ្វើអោយអាជីវកម្មនេះទទួលបានជោគជ័យ គឺដោយសារតែអ្នកនាងចុះទិញពីអ្នកនេសាទដោយផ្ទាល់នូវប្រភេទត្រីសំខាន់ៗ ដោយមិនប្រើត្រីងាប់ ត្រីអន់សាច់ ត្រីចិញ្ចឹម និងដាក់សារធាតុគីមីជាដើម ដើម្បីរក្សាគុណភាពត្រីក្រោយពេលធ្វើរួច។ អ៉ីចឹងហើយទើបមុខរបរប្រហុកផ្អក និងត្រីងៀតជាដើមរបស់អ្នកនាង គឺមើលទៅសាមញ្ញមែន ប៉ុន្តែក្នុងមួយខែមានការកុម្ម៉ង់មិនក្រោម១០០០គីឡូនោះទេ ដែលអាចអោយអ្នកនាងរកចំណូលបានរាប់ពាន់ដុល្លារដោយមិនលំបាក។

យ៉ាងណាមិញ អ្នកនាងថាមិនបោះបង់ការងារសិល្បៈនោះទេ ទើបអ្នកនាងនៅតែចំណាយបង្វឹកសិស្សដែលចង់បានបច្ចេកទេសច្រៀងបទពីជំនាន់ដើម និងបានទទួលច្រៀងក្នុងកម្មវិធីតូចធី ជាពិសេសគឺឡើងឆាកទូរទស្សន៍ជាដើម។ អ្នកនាងបានទាំងចាប់ដៃគូជាមួយលោក ផល្លី ហើយធ្វើអោយមានទីផ្សារដល់ថ្នាក់ត្រូវគេទាក់ទងអោយចេញច្រៀងទាំងៗគូរហូតចង់មានការច្រលំថាអ្នកនាង និងលោកផល្លី គឺជាដៃគូបេះដូងនោះផង។

អ្នកនាងមាស លក្ខិណា បញ្ជាក់ថាអ្នកនាងរាល់ថ្ងៃគឺអាចនិយាយបានថាជោគជ័យទាំងចម្រៀង ទាំងអាជីពថតចម្រៀងក្នុងស្ទីឌីយោ និងជាពិសេសគឺអាជីពលក់ត្រីងៀតធម្មជាតិតែម្ដង។ ជាក់ស្ដែងក្នុងពេលអ្នកនាងថតបង្ហោះពីសកម្មភាពធ្វើត្រីងៀត និងត្រីប្រឡាក់ម្ដងៗគឺមានការកុម្ម៉ង់ពីបងប្អូនក្រៅស្រុក ស្ទើរតែគ្មានត្រីលក់នោះទេ ដោយបងប្អូនខ្មែរដែលបានទទួលទិញត្រី ផ្អករបស់អ្នកនាងសុខចិត្តចំណាយសោហ៊ុយអោយផ្ញើត្រីទាំងនោះដោយមិនស្ដាយថវិកាព្រោះតែជាប់ចិត្តនឹងត្រីងៀតរបស់អ្នកនាងផង។

អ្នកនាងមានគម្រោងបើកហាងលក់ត្រីងៀត និងប្រហុកផ្អកជាទ្រង់ទ្រាយធំក្នុងពេលខាងមុខ ដើម្បីអោយអាជីវកម្មមួយនេះកាន់តែមានចំណូលខ្ពស់ ប៉ុន្តែអ្នកនាងក៏ប្រកាសថាមិនចោលមុខរបរស្ទីឌីយោសម្រាប់ជួលថតសំឡេង និងមិនចោលមុខរបស់ឡើងច្រៀងតាមឆាកទូរទស្សន៍ និងតាមមង្គលការផងដែរ ដោយអ្នកនាងយល់ថាបើគ្មានការគាំទ្រក្នុងសិល្បៈ ក៏គ្មានមិនអាចធ្វើអោយមុខរបស់ក្រៅសិល្បៈរបស់អ្នកនាងក្លាយជាលុយកាក់ដុំកំភួន៕
https://youtu.be/LSODa2iOY0s