នៅក្នុងពិធីខួបប្រចាំរបស់ទូរទស្សន៍ប៉ុស្ដិ៍លេខ៥កាលពីថ្ងៃទី៩ កុម្ភ: នៅភោជនីយដ្ឋានទន្លេបាសាក់២ គេកត់សម្គាល់ថាមានវត្តមានតារាសិល្ប:យ៉ាងច្រើនកុះករតែម្ដង ដោយក្រៅពីចំណាយថវិកាយ៉ាងសន្ធឹកជួលទីតាំង និងចំណាយលើការជប់លៀងឲ្យក្រុមការងារ និងតារាសិល្ប: បានសប្បាយរីករាយ នៅក្នុងពិធីនោះក៏មានការផ្ដល់រង្វាន់ដល់តារាសិល្ប:សរុបជាទឹកប្រាក់មិនតិចនោះដែរ។ នៅក្នុងពិធីនោះ តារាសិល្ប:មិនតិចជាងរាប់រយនាក់ ក៏យកជាវេទិកាបង្អួតសម្រស់ដាក់គ្នាធ្វើឲ្យកម្មវិធីគម្រប់ជាង២០ឆ្នាំរបស់ប៉ុស្ដិ៍លេខ៥ កាន់តែមានភាពអធឹកអធ័ម។

តារាសិល្ប:ដែលបានបង្ហាញខ្លួននៅក្នុងពិធីនោះ ភាគច្រើនគឺជាតារាសម្ដែង ដោយសារតែប៉ុស្ដិ៍លេខ៥តាំងពីត្រូវបានប្ដូរថៅកែ ជាម្ចាស់សណ្ឋាគារសូហ្វីតែលគឺមានការបោះទុនផលិតកុនច្រើនក្រុម និងច្រើនរឿង ដោយមានតារាខ្មែរ និងផលិតករខ្មែរមិនតិចជាងរយនាក់នោះទេ ទទួលបានឱកាសការងារពីកំណែទម្រង់នោះ។ មន្ត្រីជាន់ខ្ពស់របស់ប៉ុស្ដិ៍លេខ៥ បានអះអាងថាដើម្បីធ្វើឲ្យការងារមួយទទួលបានជោគជ័យ គឺក្រុមការងារទាំងនោះមិនគ្រាន់តែមានការងារធ្វើ និងទទួលបានប្រាក់កម្រៃល្អប្រសើរប៉ុណ្ណោះទេ ប៉ុន្តែក៏ត្រូវបង្កើតកម្មវិធីជប់លៀង និងបង្កបរិយាកាសស្និទ្ធស្នាលជាមួយគ្នាឲ្យបានច្រើនផងដែរ ដើម្បីឲ្យការងាររឹងមាំ ហើយម្នាក់ៗកាន់តែមានទឹកចិត្តរួមគ្នា។

អ៉ីចឹងហើយទើបប៉ុស្ដិ៍លេខ៥បោះទុនខ្ពស់ទាំំងការផលិតកុន និងទាំងការរៀបចំកម្មវិធីសប្បាយៗ ដើម្បីធ្វើឲ្យតារាសិល្ប: និងក្រុមការងារកាន់តែរួមចិត្តគ្នា ហើយធ្វើឲ្យឲ្យប្រព័ន្ធការងារមានភាពរលូន។ ជាក់ស្ដែងនៅក្នុងពិធីជប់លៀង ស្ថាប័នមួយនេះក៏បានចំណាយមិនតិចជាងពាន់ដុល្លារ ដើម្បីផ្ដល់ឲ្យអ្នកចូលរួមជាពិសេសគឺតារាសិល្ប: ទទួលបានទូរទឹកកក ទូរទស្សន៍កញ្ចក់ស្ដើង ច្រើនគ្រឿង អមដោយរង្វាន់ប្រាក់សុទ្ធ១០០ៗដុល្លារ និងរង្វាន់ទៅសម្រាកនៅសណ្ឋាគារលំដាប់ផ្កាយ៥នៅខេត្តសៀមរាបជាច្រើន ដែលធ្វើឲ្យម្នាក់ៗដែលបានចូលរួមក៏ភ្ញាក់ផ្អើល។

នៅក្នុងពិធីនោះគេឃើញតារាសិល្ប: និងភ្ញៀវកិត្តិយសច្រើននាក់ទទួលបានរង្វាន់ធំៗ ហើយបើទោះជាអ្នកចូលរួមភាគច្រើនមិនត្រូវបានរង្វាន់ក៏ធ្វើឲ្យម្នាក់ៗលាន់មាត់ថាប៉ុស្ដិ៍លេខ៥ឆ្នាំនេះចំណាយមិនធម្មតាគ្រាន់តែខួបប្រចាំឆ្នាំរបស់ខ្លួន។

តារាសិល្ប:ដែលត្រូវគេឃើញបង្ហាញខ្លួននៅក្នុងពិធីនោះ គឺចម្រុះដោយតារាល្បីៗយ៉ាងច្រើនកុះករ តែតារាថ្មីក៏មានច្រើនដែរ ដោយសារតែប៉ុស្ដិ៍លេខ៥មានគោលការណ៍បណ្ដុះតារាថ្មីៗដើម្បីជម្រុញឲ្យមានអ្នកជំនាន់ក្រោយឈានឡើង។
តារាដែលបានចូលរួមនៅក្នុងពិធីនោះបានទាំងចាត់ទុកថាកម្មវិធីខួបប្រចាំឆ្នាំរបស់ប៉ុស្ដិ៍លេខ៥ ថាជំនួបតារាដ៏ធំប្រចាំឆ្នាំដែលធ្វើឲ្យពួកគេ និងផលិតករចាស់ថ្មីបានជួបគ្នាប្រកបដោយបរិយាកាសរីករាយកម្រមាននោះផង៕