Post News Media ព័ត៌មានសិល្បៈ និងកម្សាន្ត មួយបទ របស់ សោ...

មួយបទ របស់ សោភា ទេពី កក្រើកLive Show Cambodian Idol

ក្នុងចំណោកបេក្ខជនបេក្ខនារី ដែលបានបង្ហាញសមត្ថភាពក្នុងវគ្គ Live Show សម្រាប់សប្ដាហ៍ទី១ ក្នុងកម្មវិធីCambodian Idol កាលពីយប់ថ្ងៃទី៩ កុម្ភ: គេនៅតែមើលឃើញថាបេក្ខនារី ញឹម សួនសោភាទេពី ដែលគេនិយមហៅថា សោភា ទេពី លេចធ្លោរជាងគេ ជាមួយនឹងសមត្ថភាពច្រៀងដ៏អស្ចារ្យរបស់នាង។ ចម្រៀងមួយបទចម្រៀងចំណងជើងថា«បេះដូង១០០» ដែលជាម្ចាស់ដើមរបស់កញ្ញា លាង សុផាឡែន បេក្ខនារីរូបនេះស្ទើរតែស្រែកដាច់ និងពីរោះ ជាងម្ចាស់ដើមនោះផង ទើបការបកស្រាយបទចម្រៀងរបស់នាងត្រូវគេឃើញអ្នកទស្សនាផ្ទាល់កញ្ច្រោលទះដៃយ៉ាងកងរំពងតែម្ដង។

ក្នុងនោះសូម្បីតែគណកម្មការទាំងក៏រំជួលចិត្តនឹងទេពកោសល្យរបស់នាង ហើយបានសរសើរមិនដាច់ពីមាត់ផងដែរ។

លោកព្រាប សុវត្ថិ បានហៅសមត្ថភាពសោភា ទេពីថាជាតារារ៉ុកដែលមានសមត្ថភាពយ៉ាងកម្រ ក្នុងចំណោមបេក្ខនារីច្រើនរូបដែលមានសមត្ថភាព។

លោកថានាងគឺជាតារាចម្រៀងម្នាក់ដែលមានសំឡេងខ្ពស់ ហើយក៏មានស្ទីលបកស្រាយបទចម្រៀងបានត្រូវនឹងបទចម្រៀង ទាំងការតែងខ្លួន និងការទប់សំឡេងធ្វើឲ្យស្រែកខ្លាំងកម្រិតណាក៏នៅតែស្ដាប់ទៅមិនបែក និងពីរោះរន្ដំ។ មិនខុសគ្នាដែរ គណកម្មការ៣រូបផ្សេងទៀតក៏សរសើរមិនដាច់ពីមាត់ដូចគ្នា ថានាងគឺជាតារាចម្រៀងដែលមានសមត្ថភាពសំឡេង និងស្ទីលមិនគួរនឹងមើលរំលង ដោយនាងមិនមែនអាចច្រៀងបានពីរោះត្រឹមតែបទមនោសញ្ចេតនានោះទេ។ លោកណុប បាយ៉ារិទ្ធិ និយាយថាបទចម្រៀងរបស់សោភា ទេពី គឺជាបទពិបាកច្រៀងណាស់ ហើយបើនិយាយពីការស្រែកត្រង់កន្លែងរ៉ឺហ្វ្រាំងក៏មិនងាយនឹងមានអ្នកស្រែកបានល្អនោះដែរ ប៉ុន្តែសម្រាប់បេក្ខនារីរូបនេះគឺច្រៀងបានល្អ រហូតសូម្បីតែលោកក៏ទប់អារម្មណ៍មិនសរសើរមិនបាន។

នាងមិនត្រូវបានប្រកាសថាបានទទួលសំឡេងឆ្នោតពីការបោះឆ្នោតប៉ុណ្ណានោះទេ ប៉ុន្តែនាងត្រូវបានប្រកាសថាជាប់ដោយមិនបាច់ប្រឈមនឹងការសង្គ្រោះរបស់គណកម្មការដើម្បីឲ្យនាងទទួលបានឱកាសទៅកម្មវិធី Live Show ក្នុងសប្ដាហ៍ទី២។ នាងគឺជាបេក្ខនារីដែលធ្វើឲ្យគេមើលឃើញថាទទួលបានសំឡេងគាំទ្រខ្លាំងក្លាជាងគេពីសំឡេងទះដៃ និងហ៊ោ កញ្ជ្រៀវយ៉ាងខ្ទរពេញស្ទីឌីយោ របស់ហង្សមាសនៅផ្សារទំនើបអ៉ីអន។ ជាមួយនឹងសន្ទុះគាំទ្រក៏ល្អដែលនាងទទួលបានក្នុងសប្ដាហ៍ទី១ក្នុងវគ្គ Live Show នេះ ធ្វើឲ្យគេមើលឃើញកាន់តែច្បាស់ថានាងនៅតែបន្តក្ដោបតំណែងជាបេក្ខនារីដែលមានប្រជាប្រិយភាពខ្លាំងក្លាជាងគេ ខណ:ដែលនាងក៏មានសមត្ថភាពខ្លាំងទាំងបទចម្រៀងសម័យ បុរាណ និងបទចម្រៀងរ៉ក់បានល្អព្រមគ្នាមិនធម្មតា៕