Post News Media ព័ត៌មានសិល្បៈ និងកម្សាន្ត វ៉ាន់ វលក្ខណ៍...

វ៉ាន់ វលក្ខណ៍ ស្ងាត់ៗ បង្ហើបតម្រុយហើយ!

បន្ទាប់ពីការងារសិល្ប:ចាប់ផ្ដើមឈានឡើង តារាសម្ដែងកញ្ញា វ៉ាន់ វលក្ខណ៍ បានរៀបចំពិធីខួបកំណើតយ៉ាងអធឹកអធម កាលពីយប់ថ្ងៃទី២១ មេសា នៅហាងវីហ្វ្រេនកោះពេជ្រ ដោយមានតារាសិល្ប:ច្រើនគួរសមបង្ហាញខ្លួន។ នៅក្នុងថ្ងៃនោះ គេឃើញមានកាដូមួយចំនួនត្រូវបានប្រគល់ជូន ដោយនាងបញ្ជាក់ថា ពិតជាមានកាដូមួយក្នុងចំណោមកាដូទាំងអស់ជារបស់ម្ចាស់ស្នេហ៍ តែនាងមិនទាន់ចង់បង្ហាញ ឲ្យដឹងពីអត្តសញ្ញាណ នៅឡើយទេ។

កញ្ញា វ៉ាន់ វលក្ខណ៍ ដែលចាប់ផ្ដើមជោគជ័យក្នុងការសម្ដែងភាពយន្ត ជាពិសេសក្នុងរឿង «កូនពស់កេងកង»ដែលត្រៀមនឹងដាក់ផ្សាយ នៅប៉ុស្ដិ៍ហង្សមាស បានអះអាងថា មកទល់នឹងវ័យពេញ២៣ឆ្នាំនេះ នាងមានមនុស្សជាទីស្រឡាញ់រួចហើយ ដោយនាង និងបុរសម្នាក់នេះ បានចំណាយពេលសិក្សាចិត្តគ្នា បានមួយរយ:នោះផង។ នាងមិនខ្លាចក្នុងការលាតត្រដាងនោះទេ ប៉ុន្តែបណ្ដាលមកពីគូស្នេហ៍របស់នាង មិនទាន់ចង់បង្ហាញមុខនៅឡើយ ទើបនាងក៏បំពេញសំណូមពរ ហើយមិនទាន់ចង់និយាយ។ នាងថាមនុស្សដែលនាងស្រឡាញ់ គឺជាបុរសសាមញ្ញ ហើយមិនមែនជាបុរសមានចំណងស្នេហា ជាមួយអ្នកផ្សេងក្រៅពីនាងនោះទេ ប៉ុន្តែបណ្ដាលមកពីការលាតត្រដាងនៅមិនទាន់ដល់ពេល ទើបនាងមិនទាន់បង្ហាញឡើង។ នាងថាខ្លួននៅគិតពីរឿងការងារសិល្ប:ឲ្យជោគជ័យសិន ដ្បិតថាបើទោះជាមានបុរសម្នាក់ ស្រឡាញ់ពេញចិត្តចំពោះនាង ក៏បុរសម្នាក់នោះជំរុញឲ្យបន្តសម្ដែងឲ្យបានខ្លាំងក្លា ដើម្បីកុំឲ្យនាងបាត់បង់ប្រជាប្រិយភាព។

ជាក់ស្ដែងនៅក្នុងពិធីខួបរបស់នាង ក៏បុរសជាទីស្រឡាញ់បង្ហាញខ្លួនផងដែរ ប៉ុន្តែនាងថាលោកមិនទាន់ចង់ចេញមុខ ទើបមិនទាន់ចង់ផ្ដល់សម្ភាសន៍។ ក្នុងពិធីខួបដែលគេ បានឃើញនោះ តារាសម្ដែងកញ្ញា វ៉ាន់ វលក្ខណ៍ រីកមុខរីកមាត់យ៉ាងខ្លាំង ដោយសារតែមានវត្តមានតារាល្បីៗ ដែលបានអញ្ជើញទាំងប៉ុន្មានលេចមុខស្ទើរមិនបាត់មនុស្សម្នាក់ ហើយបុរសដែលនាងបង្ហើបជាគូស្នេហ៍ ក៏បានជូនកាដូមួយក្នុងចំណោមកាដូដែលនាងបានទទួល។ នាងថាបើខ្លួនដាក់ចិត្តស្រឡាញ់បុរសណា គឺទោះជាបុរសម្នាក់នោះ មានតែសំបកខ្លួន ហើយមិនមានអ្វីជាដុំកំភួនឲ្យនាង ក៏នាងពេញចិត្តទទួលយកផងដែរ ទើបនាងប្រកាសមិនស្រើបស្រាលនឹងកាដូថ្លៃ ដែលមិនមានតម្លៃក្រៅពីមនុស្សជាទីស្រឡាញ់ឡើយ។

ក្នុងនោះការអន្ទងពីបុរសទ្រព្យស្ដុកណាម្នាក់ ក៏ប្រហែលជាគ្មានឥទ្ធិពលចំំពោះចំណងស្នេហ៍របស់នាងនោះដែរ ក្នុងពេលដែលនាងហាក់ចង់លាតត្រដាង ពីគូស្នេហ៍ដោយមិនលាក់បាំងបែបនេះទៅហើយ៕