ធ្លាប់តែលេចឮថាក្រុម«គ្រួសារតារាកម្ពុជា» និងក្រុមសមាគមរបស់អ្នកនាង ចន ច័ន្ទលក្ខិណា មិនខុសពីទឹក និងប្រេង ប៉ុន្តែ កាលពីយប់ថ្ងៃទី១៥ មិថុនា គេឃើញស្ថាបនិក និងតំណាងក្រុមសំខាន់ៗរបស់”គ្រួសារតារាកម្ពុជា”ច្រើនរូប បង្ហាញខ្លួនក្នុងព្រឹត្តិការណ៍អាហារសាមគ្គី ក្រោមការអញ្ជើញរបស់លោកហេង ឡុង និងអ្នកនាងចន ច័ន្ទលក្ខិណា ដោយតំណាងក្រុមទាំងពីរ ក៏បានបង្ហាញនូវសកម្មភាពជិតស្និទ្ធិគ្នា ក្នុងនាមជាអ្នកជួយបំផុសដល់សង្គមជាប្រយោជន៍ដល់សិល្ប:ដូចគ្នានោះផង។ នេះជាការចាប់ដៃរបស់ក្រុមទាំងពីរ ដែលគេធ្លាប់តែឮថាមានការប្រកាន់បក្សពួករៀងខ្លួន ដែលការពិតក្រោយស្វែងរកឃើញថា គឺជាការលាបពណ៌ ក្រុមទាំងពីរកាន់តែមានសកម្មភាពសហការគ្នានាពេលចុងក្រោយ ខណ:ដែលស្ថាបនិកគ្រួសារតារាកម្ពុជា បានអះអាងថា ឲ្យតែនោះគឺជាសកម្មភាពដើម្បីសង្គម និងដើម្បីអ្នកសិល្ប: គឺទោះជាក្រុមណារៀបចំ ក៏សប្បាយចិត្តដឹកនាំសមាជិកឲ្យចូលរួម ដើម្បីបំផុស។

កម្មវិធីដែលបានធ្វើឡើងនៅភោជនីយដ្ឋានSeven Bright ទួលគោក នេះ ត្រូវគេឃើញថានៅតែមានសភាពអឹកអធឹក ដោយសារតែមានវត្តមានដ៍ខ្ពង់ខ្ពស់ពីលោក ហ៊ុន ម៉ានី ប្រធានសហភាពសហព័ន្ធកម្ពុជា និងលោកជំទាវ ដោយនៅក្នុងនោះ ក៏មានតារាសិល្ប: ទាំងអ្នកមានសកម្មភាពខ្លាំងនៅក្នុងសិល្ប: និងអ្នកចូលនិវត្តន៍កុះករបង្ហាញខ្លួនផងដែរ។ តារាសិល្ប:ក្មេងៗ និងតារាចាប់ផ្ដើមឡើងកូដជាដើម ត្រូវគេឃើញមានវត្តមានច្រើន បើទោះជាក្នុងឆ្នាំនេះ អ្នកនាង ចន ច័ន្ទលក្ខិណា ប្រកាសថា នឹងធ្វើក្នុងទ្រង់ទ្រាយតូច។ លោក ហេង ឡុង ប្រធានសមាគមនសិល្បករស្ម័គ្រចិត្តជួយសង្គម និងជាអ្នកចាត់ចែងទាំងស្រុង បានអះអាងថា នេះជាឆ្នាំទី២ហើយ ដែលលោករៀបចំកម្មវិធីនេះឡើង ដោយអ្វីដែលលោកចង់បានគឺចង់ឃើញតារាសិល្ប:រួមកម្លាំងគ្នាតែមួយ ហើយកាន់តែបានរួមចំណែកជួយដល់សង្គម ជាពិសេសគឺក្រុមតារាចាស់ៗ ដែលតារាទាំងនោះសុទ្ធតែត្រូវការជំនួយ និងការលើកទឹកចិត្ត។ លោកថាសមាគមលោក នឹងរៀបចំកម្មវិធីបែបនេះឲ្យបាន១ឆ្នាំម្ដង ហើយគម្រោងរៀបចំ៥ឆ្នាំសម្រាប់ជំហានដំបូង ខណ:ដែលការរៀបចំមួយឆ្នាំៗក៏នឹងធ្វើឲ្យមានទម្រង់ខុសគ្នា។

លោកកាន់តែបង្ហាញអារម្មណ៍កក់ក្ដៅ ដែកតារាសិល្ប:មកពីក្រុមផ្សេងៗ ជាពិសេសគឺមកពី”គ្រួសារតារាកម្ពុជា”ដែលកន្លងមកមានពាក្យចចាមអារ៉ាមថា មិនត្រូវការសហការជាមួយសកម្មភាពរបស់ក្រុមលោកលើគ្រប់ទម្រង់ បានដឹកនាំសមាជិកច្រើនរូបចូលរួម ដែលបង្ហាញពីការសាមគ្គីរវាងក្រុមសិល្ប: និងក្រុមសិល្ប:។

សមាសភាព”គ្រួសារតារាកម្ពុជា”នៅក្នុងថ្ងៃនោះ ដឹកនាំដោយស្ថាបនិកក្រុម លោក ផាត់ តារារដ្ឋ ដោយក្នុងនោះរួមតំណាងក្រុមសំខាន់ៗរួមមាន កញ្ញា រំដួលលិចទឹក; កញ្ញា ប៉ុបពី; លោក សន សុវណ្ណារ៉ា ពិធីករ; លោក ឌួង តារាផាឌីន តារាចម្រៀង; លោក សេម អាជុន តារាចម្រៀង; កញ្ញាទេព មុន្នីរក្សា តារាសម្ដែង; លោក កែន ឩត្តមវាសនា ហៅឌីជេកង្កែប តារាសម្ដែង; លោក ឃីម រតន: តារាសម្ដែង; លោក ស៊ឹម ស៊ីណាត តារាចម្រៀង; លោក ង៉ែត សុភ័ក្ត្រ តារាសម្ដែង; កញ្ញា នី ម៉ាលីណា តារាចម្រៀង; និងតារាក្មេងមួយចំនួនទៀត។ ក្នុងការចូលរួមនេះ ក្រៅពីលោក ហេង ឡុង សមាសភាពរបស់សមាគមសិល្បករស្ម័គ្រចិត្តជួយដល់សង្គមភាគច្រើន ក៏ផ្ដល់ការទទួលរាក់ទាក់ ដល់”គ្រួសារតារាកម្ពុជា” មិនខុសពីវត្តមានសិល្បករសិល្បការិនីផ្សេងទៀតផងដែរ៕