Post News Media ព័ត៌មានសិល្បៈ និងកម្សាន្ត មិនគួរជឿ! ម៉ៅ...

មិនគួរជឿ! ម៉ៅ ប៊ុនរតនា មានស្នាដៃក្នុងសិល្ប:រាប់មិនអស់ តែមិនល្បី

​ ស្រទាប់មហាជន និងអ្នកសិល្ប: ស្ទើរមិនបានដឹងថាលោក ម៉ៅ ប៊ុនរតនា ដែលជាម្ចាស់ហាង Mr.Man គឺជាតារាសិល្ប:កាលពីអតីតកាលនោះទេ ដោយសារតែការប្រឡូករបស់លោកនៅក្នុងអំឡុងពេលនោះ មិនទទួលជោគជ័យ ដូចគ្នានឹងពេលដែលលោកបានក្លាយជាម្ចាស់មុខជំនួញនាពេលនេះ។ លោកបានទម្លាយពីការងារច្រៀងរាំ និងសម្ដែងរាប់មិនអស់ ដោយក្នុងនោះស្នាដៃដែលលោកបានសម្ដែងក៏បានបន្សល់ទុកច្រើនផងដែរ មុនពេលបោះបង់ឈប់គិតគូរ ហើយងាកមកពីស៊ប់នឹងមុខជំនួញមួយដាច់ដោយឡែក។

លោក ម៉ៅ ប៊ុនរតនា បានរំលឹងពីអតីតកាលក្នុងសិល្ប:ឲ្យដឹងថា ក្រោយពេលមានឱកាសបានក្លាយជាតារាចម្រៀង បន្ទាប់ពីបានចូលហ្វឹកហាត់ក្នុងក្លិបសិល្ប:មួយ លោកក៏មានមុខមាត់បានច្រៀងនៅតាមឆាកតន្ត្រីជាពិសេសតន្ត្រីខេត្តក្រុង និងកម្មវិធីតូចធំស្ទើរមិនមានពេលសម្រាកនោះទេ បើទោះជាប្រាក់កម្រៃនៅក្នុងពេលនោះ ទទួលបានមិនច្រើន។ លោកបានចំណាយពេលប្រឡូកក្នុងអាជីពចម្រៀងរហូតមានការទទួលស្គាល់ក្នុងចំណោមអ្នកប្រឡូកអាជីពចម្រៀងរួមគ្នា ទើបសម្រេចចិត្តចូលហ្វឹកហាត់ក្នុងក្លិបសិល្ប:របស់លោកចេវ វិរ:បន្ថែមមួយទៀតកាលពីឆ្នាំ២០០៩ ព្រោះតែស្រឡាញ់អាជីពពិធីករ។ យ៉ាងណាមិញ លោកថាមិនបានទទួលផ្លែផ្កាពីអាជីពពិធីករនោះទេ ដោយបែរជាជោគជ័យក្នុងអាជីពសម្ដែងទៅវិញ បន្ទាប់ពីពេលគេចុះជ្រើសតួក្នុងក្លិប ហើយពេញចិត្តរូបសម្រស់របស់លោក។

ស្នាដៃដែលធ្វើឲ្យគេស្គាល់លោកក្នុងអាជីពសម្ដែងមុនពេលបាត់មុខ គឺភាពយន្តភាគរឿង«រលកស្នេហ៍ចម្រៀងជិវិត»របស់ស្ថានីយទូរទស្សន៍ប៉ុស្ដិ៍លេខ៥ និងភាពយន្តមួយចំនួនទៀត ដែលលោកបានសម្ដែងជាមួយ លោក ទេព រិន្ទដារ៉ូ ជាដើម។ លោកថាមុនងាកមកធ្វើជំនួញ លោកច្រៀង និង សម្ដែងច្រើនណាស់ ប៉ុន្តែបណ្ដាលមកពីអត់ជោគជ័យ ពោលគឺអាចនិយាយបានថាមិនមានកេរ្តិ៍ឈ្មោះបោះសំលេងតាមការចង់បាន ទើបលោកសម្រេចចិត្តបោះបង់។ លោកថាចំណាយពេលប្រឡូកក្នុងអាជីពសិល្ប:មិនតិចឆ្នាំ អត់មានអ្នកស្គាល់ច្រើនទេ ប៉ុន្តែបែរជាមានអ្នកស្គាល់ច្រើនក្រោយបើកជំនួញលក់ខោអាវយីហោ Mr.Man ខណ:ដែលលោកក៏ភ្ជាប់ទំនាក់ទំនងជាមួយតារាសិល្ប: និងផលិតករកាន់តែច្រើន តាមរយ:ការផ្ដល់សំលៀកបំពាក់ប្រចាំហាងឲ្យតារាៗ និងបានចូលរួមធ្វើសកម្មភាពសង្គម និងសិល្ប:ជាច្រើនដើម្បីជ្រោមជ្រែងវិស័យសិល្ប:។

លោក ម៉ៅ ប៊ុនរតនា បន្តថា បើលោកចង់ប្រឡូកអាជីពសម្ដែងគឺអាចនឹងមានអ្នកចាប់អារម្មណ៍ច្រើននៅក្នុងពេលនេះ ប៉ុន្តែមកពីលោកចង់ទុកឱកាសឲ្យក្មេងជំនាន់ក្រោយ ទើបលោកសម្រេចចិត្តបោះបង់ ហើយធ្វើជាអ្នកជ្រោមជ្រែងតារាសិល្ប:ជំនាន់ក្រោយឲ្យមានឱកាសបានប្រឡូកអាជីពសិល្ប:វិញ៕