មានការភ្ញាក់ផ្អើលយ៉ាងខ្លាំង បន្ទាប់ពីពិធីការិនី និងជាតារាសម្ដែងកញ្ញា ណាក់ ស្រីណា បានបង្ហោះជាសាធារណ:ថា ផលិតកម្មមហាហង្ស បានជំពាក់ថ្លៃសម្ដែងរបស់នាងរហូតដល់ចំនួន២ពាន់ដុល្លារ ដោយជំពាក់ប្រមាណជាមួយឆ្នាំមកហើយ ពោលគឺតាំងពីភាពយន្តដែលនាងសម្ដែងឲ្យត្រូវបានបញ្ចប់។ យ៉ាងណាក៏ដោយជាមួយនឹងព័ត៌មានរសើបនេះ ផលិតកម្មមហាហង្សបានទម្លាយឲ្យដឹងជាផ្លូវការ ក្រោយពីបានប្រកាសថាមិនចង់បកស្រាយក្រោយពីនាងបកអាក្រាត។

លោក អ៉ិន ម្ចាស់ផលិតកម្មមហាហង្ស បានអះអាងថា ហេតុផលដែលតារាសម្ដែងកញ្ញា ណាក់ ស្រីណា មិនទទួលបានតម្លៃថតនៅសល់ចំនួន២ពាន់ដុល្លារ ក្រោយពេលថតចប់ មិនមែនជាកំហុសរបស់ផលិតកម្មរបស់លោកនោះទេ ប៉ុន្តែគឺកំហុសរបស់អតិថិជនរបស់លោកដែលជាអ្នកស្នើឲ្យលោកផលិតរឿង«មរតកចុកឈាម» ហើយតម្រូវឲ្យលោកជ្រើសយកនាងឲ្យធ្វើជាតួឯកប៉ុណ្ណោះ។ លោកថ្លែងបញ្ជាក់ថា ក្នុងពេលកុងត្រាតម្រូវឲ្យលោកផលិតរឿង«មរតកចុកឈាម» អតិថិជនរបស់លោកបានកំណត់ឲ្យលោកត្រូវតែយក តារាសម្ដែង ណាក់ ស្រីណា ឲ្យសម្ដែងធ្វើជាតួឯក ហើយបណ្ដាលមកពីភាពយន្តនោះក្រោយពេលផលិតចប់ អតិថិជនរបស់លោកមិនបានប្រគល់លុយឲ្យលោកតាមការកំណត់ ទើបលោកត្រូវតែបង្កក់តម្លៃនៅសល់របស់នាងដូចគ្នា។ លោកនិយាយថា«ខ្ញុំមិនអត់២ពាន់ឲ្យគាត់(ណាក់ ស្រីណា)ទេ ប៉ុន្តែឲ្យខ្ញុំឲ្យយ៉ាងមិច បើអ្នកដែលតម្រូវឲ្យខ្ញុំយកគាត់សម្ដែង មិនទាន់មានលុយឲ្យខ្ញុំគ្រប់ផងហ្នឹង ចឹងខ្ញុំមានលុយណាបើកឲ្យគាត់!»។

លោកថាភាពយន្តរឿង«មរតកចុកឈាម»ត្រូវកំណត់ដាក់បញ្ចាំងនៅលើទូរទស្សន៍មួយតាំងពីប៉ុន្មានខែមុនម្ល៉េះ ប៉ុន្តែដោយសារតែអ្នកទិញអត់មានលុយឲ្យលោក តាមការកំណត់ ទើបមានការពន្យារពេលដាក់ផ្សាយមកទល់ពេលនេះ។ លោកថាមិនខឹងចំពោះការទម្លាយរបស់តារាសម្ដែង ណាក់ ស្រីណា នោះទេ ដោយលោកយល់ថាអ្វីដែលនាងបានប្រតិកម្មគឺជាសារលាតត្រដាងឲ្យអតិថិជនដែលជួលឲ្យលោកផលិតរឿងឲ្យ ដឹងពីផលវិបាករបស់លោក នឹងរួសរាន់ប្រគល់ថវិកាឲ្យលោកតាមអ្វីដែលបានកុងត្រានោះផង។ លោកបង្ហើបថា អ្នកទិញភាពយន្តមួយនេះរបស់លោក នៅខ្វះប្រមាណជិត២ម៉ឺនដុល្លារទៀត ទើបមានសិទ្ធិបញ្ចាំងរឿង ទើបលោកត្រូវតែបង្កកថវិកាកញ្ញា ណាក់ ស្រីណា ដែលជាតារាជម្រើសដោយអតិជននោះ ជាការត្រលប់វិញ។

ក្នុងនោះលោកក៏បានទម្លាយថា មិនមែនមានតែកញ្ញា នោះទេ ដោយផលិតកម្មមហាហង្សជំពាក់លុយមិនទាន់បើកថ្លៃសម្ដែងឲ្យ គឺតារាមួយចំនួនផ្សេងទៀត ក៏មានផងដែរ ដោយសារតែតារាទាំងនោះក្នុងពេលកុងត្រាគឺឲ្យមួយអាទិត្យ៣ថ្ងៃ ឬ២ថ្ងៃ តាមអ្វីដែលបានព្រមព្រៀង ប៉ុន្តែដល់ពេលចេញថតគឺសុំថ្ងៃណាក៏រវល់ដកឃ្លាមិនបាន ហើយនៅពេលចុះថតទៀតសោត គឺណាត់ម៉ោង៧ មកម៉ោង១០ ហើយទារទៅមុនរហូត ធ្វើឲ្យការផលិតរបស់លោកយឺតយ៉ាវ។ លោកនិយាយថា«សម្រាប់ណាក់ ស្រីណា ខ្ញុំមិនឲ្យគាត់ ដោយសារតែអតិថិជនដែលតម្រូវតួគាត់ មិនទាន់បើកលុយឲ្យខ្ញុំគ្រប់ ប៉ុន្តែមានតួមួយចំនួនទៀត ក៏ខ្ញុំបង្កកលុយចឹងដែរ ដោយសារតែគាត់ក្រឡុកផលិតកម្មពេក ហើយអ្នកខ្លះខ្ញុំមិនបើកលុយឲ្យហើយ ខ្ញុំចង់ប្ដឹងផង ដោយសារតែហៅថតថ្ងៃណេះសុំថ្ងៃណុះ ដូចក្នុងរឿងមួយហ្នឹងគាត់ថតតែគាត់ អត់មានតួផ្សេងចូលរួម!»។

កញ្ញា ណាក់ ស្រីណា បានអះអាងថា នេះជាមេរៀនទី១ក្នុងជីវិតជាអ្នកសម្ដែងរបស់នាង ហើយនាងបញ្ជាក់ថានេះគឺជា បំបាក់ទឹកចិត្តចំពោះអ្នកសិល្បករមួយដ៏ធំ ដោយនាងបញ្ជាក់ថា ការព្រមព្រៀង គឺថតចប់ប្រគល់លុយអស់ ដោយមិនមែនមួយឆ្នាំមកហើយនៅតែស្ងាត់ ហើយមិនអើពើក្នុងការដោះស្រាយនោះទេ។ យ៉ាងណាមិញ នាងហាក់រក្សាភាពស្ងាត់ស្ងៀម ក្រោយការបង្ហោះរបស់ខ្លួនក្លាយជារឿងរសើបក្ដៅៗ៕