ព័ត៌មានសិល្បៈ និងកម្សាន្ត

តារាងសម្ដែងលោក ឈឹម​ កក្កដា​ ​​ត្រូវ​ចោរ​ឆក់ទូរ​ស័ព្ទ​ដៃ ​​ខណៈពេល​ត្រឡប់​មក​ពី​ហូប​ពោត​

ភ្នំពេញ: តារាង​សម្តែង​ និងត្រូវ​ជា​សង្សារ​របស់អ្នក​នាង​ ពេជ្រ​ សោភា​ ត្រូវបាន​ក្រុមចោរ​ធ្វើ​សកម្មភាព​ឆក់​ទូរស័ព្ទ​ដៃ ​យកទៅបានសម្រេច​ខណ:ដែល​កំពុងជិះម៉ូតូកង់បី ​មកពី​ហូបពោត​ស្ងោរ​ កាលពីវេលាម៉ោង​១ និង​៣០នាទី​រំលង​អធ្រាត្រ​ ឈានចូលថ្ងៃទី​១៨​ ខែមករា​ ឆ្នាំ​២០១៨​ ត្រង់ចំណុច​ខាងកើត​ស្តុប​ពេទផន​ តាមបណ្ដោយ​ផ្លូវ​១៨២​ ស្ថិតក្នុងសង្កាត់​ផ្សារ​ដេប៉ូ​ទី​១​ ខណ្ឌ​ទួលគោក​។

ជន​រងគ្រោះ​​មាន​ឈ្មោះ​ ឈឹម​ កក្កដា​ អាយុ​២៨ឆ្នាំ ជាតារា​សម្ដែង​ និងតារា​ម៉ូឌែល​ ស្នាក់នៅ​ក្នុង​សង្កាត់​បឹងសាឡាង​ ខណ្ឌ​ទួល​គោក​។

តាម​សម្តី​ពី​តារាសម្ដែង​ខាងលើ​ បាន​រៀបរាប់​ឲ្យដឹង​ថា ​នៅ​មុន​ពេល​កើត​ហើយ​ គាត់បាន​ហៅម៉ូតូ​កង់បីមួយគ្រឿង (ផាស់អេប​)​ ដើម្បីជិះ​ចេញ​ពីផ្ទះនៅម្តុំបឹងសាឡាង​តែម្នាក់ឯង បំណងទៅហូបពោត​ស្ងោ​រ នៅម្តុំ​វិមានឯករាជ្យ​។ ពេលហូបរួចហើយ​ គាត់​ក៏បានជិះត្រលប់មក​ផ្ទះ​វិញ​ ដោយបានធ្វើដំណើរ​តាម​បណ្ដោយ​ផ្លូវ​១៨៧​ ក្នុងទិស​ដៅ​ពីកើតទៅលិច​ ហើយពេលដែលធ្វើដំណើរ​តាម​ផ្លូវ​ គាត់​ក៏បាន​ដកទូរស័ព្ទដៃមួយគ្រឿង​ម៉ាក​ oppo R17 Pro របស់គាត់​យក​មកលេង​ហ្វេសបុក​។

លុះមកដល់​ចំណុច​កើត​ហេតុ​ ក៏ស្រាប់​តែ​លេចមុខ​ជនសង្ស័យ​ពីរ​នាក់​ជិះ​ម៉ូតូ​មួយគ្រឿង​ម៉ាក​ ហុងដាឌ្រីម​ មិន​ចាំ​ស្លាក​លេខ​ មកពីក្រោយ។ ​រួចក៏បានធ្វើសមក្មភាព​ឆក់​ទូរស័ព្ទ​ដៃ​ពី​រូប​គាត់​ បណ្ដាល​ឲ្យ​ទូរស័ព្ទ​ ជ្រុះ​ទៅលើដី​ ភ្លាមៗ​នោះ​ក៏មាន​បក្ខពួក​របស់​ជនសង្ស័យ ​ជិះម៉ូតូ​មួយ​គ្រឿង​ផ្សេង​ទៀត​ មករើស​យក​ទូរស័ព្ទ​ដៃរបស់​គាត់​ រួច​ជិះ​រត់​គេច​ខ្លួន​បាត់​ស្រមោល​។

តារា​សម្ដែង​រូបនេះ បាន​បញ្ជាក់​ថា​ គាត់​មិន​សូវ​ស្តាយ​និង​ទូរស័ព្ទ​ដៃ​ដែលត្រូវក្រុមចោរ​​ឆក់យកទៅ​នោះទេ​ គឺ​គាត់​ស្តាយ​ពីឯកសារ​សំខាន់​ៗ​ ដែល​គាត់​បាន​រក្សាទុក​ក្នុង​ទូរស័ព្ទ​ដៃ​នោះ​ គឺ​មានដូចជា​ ម៉ែឡូឌី​ចម្រៀង​ និង​បារ៉ូ​រឿងខ្លី​ៗ ដែល​គាត់បាន​និពន្ធ​ជាច្រើន​ ហើយ​​ជា​ឯកសារ​ដែលគាត់​ គ្រោងចូលទៅ​​ក្នុង​ផលិតកម្ម​មួយ​ក្នុងពេលឆាប់ៗខាងមុខនេះផងដែរ។

ក្រោយ​ពេល​កើត​ហើយ​តារាសម្ដែង​ខាងលើ ​ត្រូវ​បាន​សមត្ថកិច្ច​មូល​ដ្ឋាន​ដឹក​យកទៅ​សួរនាំ និង​ដាក់​ពាក្យ​បណ្ដឹង​នៅប៉ុស្តិ៍​នរគបាល​រដ្ឋបាល​ផ្សារ​ដេប៉ូ​ទី​១​ ដើម្បី​សមត្ថកិច្ច​ស្រាវជ្រាវ​ រក​ជនសង្ស័យ​យក​មក​ផ្តន្ទា​ទោស​ទៅ​តាម​ផ្លូវ​ច្បាប់​៕

មតិយោបល់