ព័ត៌មានសិល្បៈ និងកម្សាន្ត

វណ្ណា វត្តី រវល់ជក់ខ្យល់ជាមួយថៅកែ សារភាពថាដកថយពីសិល្បៈ

តារាចម្រៀង និងជាតារាសម្ដែងកញ្ញា វណ្ណា វត្តី បានទទួលស្គាល់ថា ខ្លួនពិតជាស្ងប់ស្ងាត់ពីសិល្ប:នាពេលចុងក្រោយ បន្ទាប់ពីជក់សូរនឹងថៅកែ។ យ៉ាងណាមិញនាងថា មិនបោះបង់សិល្ប:នោះទេ បើទោះជាក្នុងពេលនេះថៅកែៗ ទាញពេលវេលារបស់នាងច្រើនជាង។

ប្រភពជិតស្និទ្ធិទម្លាយថា វណ្ណា វត្តី កំពុងរយាលឆ្ងាយពីសិល្ប:នៅក្នុងពេលនេះ ដោយសារតែនាងវក់ជាមួយនឹងថៅកែៗ ដោយចំណាយពេលច្រើន តែនៅតាមខេត្ត អមដោយវត្តមានថៅកែៗ និងបុរសសេដ្ឋី។ ប្រភពដដែលបន្ត ទម្លាយថា នាងមិនត្រឹមតែមិនខ្វល់នឹងការងារសប្បុរសធម៌ ឬ ការងារសង្គមនោះទេ សូម្បីតែការងារសិល្ប:នានា ក៏នាងស្ទើរតែលែងចង់រវល់ផងដែរ ចាប់តាំងពីនាងបានស្គាល់ថៅកែធំៗ ហើយជាប់សូរទៅណាមកណា តែជាមួយបុរសៗ ទ្រព្យស្ដុកទាំងនោះ។ នាងចំណាយពេលស្ទើរតែ៣០ថ្ងៃ ក្នុងមួយខែ ជាមួយតែថៅកែៗ ក្នុងគម្រោងដើរមើលដីធ្លី តាមខេត្តគ្មានពេលសម្រាក។ យ៉ាងណាមិញ សកម្មភាពដែលនាង កំពុងធ្វើនៅក្នុងពេលពេលនេះ មានការអះអាងថា ទទួលបានចំណូលច្រើនមិនធម្មតានោះឡើយ ទើបនាងសប្បាយនឹងមុខជំនួញថ្មីនេះ រហូតលែងខ្វល់នឹងការងារសិល្ប:។

កញ្ញា វណ្ណា វត្តី សារភាពថា នាងពិតជាមិនសូវបានគិត ពីការងារសិល្ប:ប្រមាណ ជាង២ខែចុងក្រោយ បន្ទាប់ពីនាងបានស្គាល់ដៃគូ ហើយចាប់ដៃគ្នារកស៊ីខាង នាំថៅកែខ្មែរ ចិន និងជនជាតិផ្សេងៗដើរមើលដី។ មុខរបរថ្មី ដ្បិតតែធ្វើឲ្យនាង នៅខេត្តច្រើនជាងនៅភ្នំពេញ ហើយត្រូវធ្វើដំណើរពីមួយកន្លែងទៅមួយកន្លែង ប៉ុន្តែសម្រាប់ចំណូលគឺក្រែល ជាពិសេសក្នុងពេលណែនាំភ្ញៀវចិន ឬ ថៅកែៗ ឲ្យទិញដីបានមួយប្លង់ៗ ដែលមានទំហំច្រើនហិកតារ។ កញ្ញាថាបណ្ដាផលិតករ និងអ្នករៀបចំកម្មវិធី ហៅនាងឲ្យសម្ដែង និង ឡើងច្រៀងច្រើនណាស់ ដោយសូម្បីតែក្រុមការងារ ក៏ស្នើផលិតចម្រៀងក្នុងពេលរវល់នេះមិនតិចដែរ ប៉ុន្តែនាងមិនអាចទទួលព្រោះតែរវល់នៅតែខេត្ត។

យ៉ាងណាមិញនាងថាមិនចោលសិល្ប:នោះទេ គឺនៅតែនឹងរកពេលផលិតបទថ្មី និងទទួលការងារសម្ដែង ដោយនឹងសកម្មក្នុងការចូលរួមកម្មវិធីសប្បុរសធម៌ ឲ្យបានញឹកជាថ្មី ឲ្យតែនាងដកឃ្លាពីការងារមើលដីបានបន្តិច៕

មតិយោបល់