ភ្នំពេញ៖ ក្រោយទៅរួមរស់ជាមួយស្វាមី នៅប្រទេសថៃ អ្នកនាងថន ដារ៉ា ត្រូវបានប្រជាជនថៃស្វាគមន៍ គោរពស្រលាញ់នាង និងស្វាមី ហើយស្វាមីនាងទៀតសោត ក៏គាំទ្រនាងក្នុងការស្លៀកពាក់នូវអ្វីដែលជា របស់ខ្មែរ ។
ក្នុងបទសម្ភាសន៍ ជាមួយ Post News តាមរយ: Messenger លើបណ្តាញសង្គមហ្វេសប៊ុក ថន ដារ៉ា បានអះអាងថា ប្តីរបស់នាង បានគាំទ្រនាង ក្នុងការស្លៀកពាក់នូវ អ្វីដែលជាអត្តសញ្ញាណ របស់ខ្មែរ និងមិនបានហាមឃាត់នោះទេ។
ថន ដារ៉ាថា «ចំពោះការស្លៀកពាក់ស្វាមីខ្ញុំ ចូលចិត្តបែបប្រពៃណីខ្មែរយើង ដោយគាត់មិនដែលបង្គាប់ឲ្យស្លៀកពាក់ តាមប្រទេសគាត់ និងកម្មវិធីធំៗម្តងៗ គាត់តែងកុម្ម៉ង់ ឲ្យខ្ញុំស្លៀកតាមរបៀបខ្មែរ និងបានណែនាំឲ្យភ្ញៀវដែលចូលរួមថាខ្ញុំ ជាតារាភាពយន្តខ្មែរ ហើយឈុតដែលស្លៀកពាក់កន្លងទៅនោះ តម្លៃ ៣៥០ ដុល្លារអាម៉េរិក» ។
ថ្លែងពីការរស់នៅប្រទេសថៃវិញ បងស្រីរបស់ ថន លក្ខិណា បានបន្តថា ការរស់នៅរបស់នាង(ថន ដារ៉ា)នៅទីនេះគឺសុខសប្បាយទេ ប្រជាជននៅទីនេះគេគោរពស្វាមីនាងនិងនាងណាស់ ហើយជារឿយៗអោយតែមានពិធីបុណ្យសពនៅក្នុងតំបន់នេះម្ដងៗគេតែងតែអញ្ចើញនាងនិងស្វាមីនាងធ្វើជាប្រធានបូជាភ្លើងសព។
ថន ដារ៉ា បានបន្តក្នុងន័យអះអាងថា ដំបូងពួកគេមិនសូវស្គាល់នាងទេ ពេលឥលូវគេស្គាល់ គេក៏ផ្ដល់កិក្តិយសអញ្ជើញដោយមានឈ្មោះនាងដែរ ហើយគ្រប់ពេលដែលគេបូជាពសម្ដងៗ គេតែងតែប្រកាសហៅឈ្មោះនាងថា លោកស្រីដារ៉ា ដែលជាតារាភាពយន្តមកពីប្រទេសកម្ពុជា ហើយភ្ញៀវទាំងក៏អស់នាំគ្នាងាកមើល ដែលធ្វើឲ្យនាងមានភាពសប្បាយរីករាយណាស់ ៕
មតិយោបល់