ភ្នំពេញ: តារាចម្រៀង សាន ផានិត និងអតីតពិធីការិនី ស្ថានីយ៍ទូរទស្សន៍ ប៉ុស្តិ៍លេខ ៣ កញ្ញា ឡាពិន នៅរសៀលថ្ងៃទី១៦ ខែសីហា ឆ្នាំ២០១៦ បាន នាំយកថវិកាដែលគៀងគរ បានពីសប្បុរសធម៌ ទៅជូនដល់ សំ ប៉ូលីដា ដែលកំពុងជួបទុក្ខធំ បាក់ជើង ។
ថវិកាដែល លោក សាន ផានិត កញ្ញា ឡាពិន និង លោក កែវ សាស្ត្រា(រវល់មិនបានទៅដល់ផ្ទះសំ ប៉ូលីដា) បានគៀរគរ ជូនដល់សំ ប៉ូលីដា បានចំនួន ៥០០ ដុល្លារអាម៉េរិក ដែលថវិកាទាំងនោះបានមកពី លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ពីតារាសិល្ប:ជាច្រើន ដែលមិនអាចរៀបរាប់ឈ្មោះ បូករួមទាំងសិស្សានុសិស្ស និងអាជីវករ ស្ថិតក្នុងខេត្ត មណ្ឌលគិរី ។
លោក សាន ផានិត បានប្រាប់ប៉ុស្តិ៍ញូវ (Post News) ឲ្យដឹងថា «ការងារសប្បុរសធម៌ ដែលពួកខ្ញុំ ធ្វើនេះ មិនមានពាក់ព័ន្ធអ្វី នឹងនិន្នាការនយោបាយអ្វីឡើយ ហើយខាងខ្ញុំតាំងចិត្តដាច់ខាត គ្មាននិន្នាការនយោបានណាមួយអាចអូសទាញពួកខ្ញុំបានឡើយ»។
ដោយឡែកកញ្ញា ឡាពិន អតីតពិធីការិនីស្ថានីយ៍ទូរទស្សន៍ប៉ុស្តិ៍លេខ ៣ ក៏មានប្រសាន៍ឲ្យដឹងផងដែរថា ការគៀងគរ ប្រមូលថវិកា ជូនដល់បងស្រី សំ ប៉ូលីដា នេះ ដោយសារតែខ្ញុំប្រកាន់គោលជំហរខ្លួន ឯងខ្មែរត្រូវជួយខ្មែរ ដោយមិនប្រកាន់និន្នាការនយោបាយ អ្វីទាំងអស់ ។ ម្យ៉ាងវិញទៀត កន្លងមកខ្ញុំជា Fan របស់លោក សាន ផានិត នៅពេលទទួលបានដំណឹងពីគាត់ ឲ្យជួយដល់ បងស្រី សំ ប៉ូលីដា ខ្ញុំក៏សម្រេចចិត្តប្រកាស ស្វែងរកសប្បុរសជន ឲ្យជួយតែម្តង ហើយក្រៅពី បងស្រី សំ ប៉ូលីដា ដែលជួបបញ្ហា ខ្ញុំក៏ជួយដូចគ្នា ទន្ទឹមនឹងបង សាន ផានិត ជាប្រធានសហគមន៍ ជួយជនក្រីក្រ នោះ ។
ជាមួយគ្នានេះដែរ អ្នកនាង សំ ប៉ូលីដា ក៏បានថ្លែងអំណរគុណ ដល់លោក សាន ផានិត កញ្ញា ឡាពិន លោក កែវ សាស្ត្រា និង សប្បុរសជាច្រើនទៀត ដែលបានផ្តល់ថវិកា ដល់អ្នកនាង ដែលកំពុងជួបនូវទុក្ខធំ ហើយអ្នកនាងសំ ប៉ូលីដា ក៏បានអះអាងថា អ្នកនាងបាក់ជើងនេះ មិនមែនជាអំពើហិង្សានោះទេ ជាគ្រោះថ្នាក់ដោយចៃដន្យ ពិតមែន ៕
មតិយោបល់