(កូរ៉េ)៖ ថ្មីៗនេះមហាជន និងអ្នកគាំទ្រ ក្រុមតារាចម្រៀងស្រីកូរ៉េ BLACKPINK មានការចាប់អារម្មណ៍ជាខ្លាំង បន្ទាប់ឭសមាជិកស្រីពីររូប គឺ Jennie និង Rosé ត្រូវបានគេប្រទះឃើញ នៅក្នុងហាងមួយ នៅ Los Angeles សហរដ្ឋអាមេរិក ខណៈវត្តមានរបស់តារាស្រីពីររូបនេះ នៅលើទឹកដីអាមេរិក បានធ្វើឲ្យមានការសង្ស័យជាខ្លាំង។ ជាពិសេសនោះ គឺអ្នកគាំទ្រជាច្រើន ចង់ដឹងពីមូលហេតុ និងគោលបំណងនៃការហោះទៅអាមេរិករបស់តារាទាំងពីរ។

ទន្ទឹមគ្នានេះ នៅថ្ងៃទី ២ ខែ កក្កដា កាលពីម្សិលមិញនេះ អ្នកនាំពាក្យមកពីផលិតកម្ម YG Entertainment បាន បង្ហើបថា «Jennie និង Rosé កំពុងធ្វើទស្សនកិច្ច នៅសហរដ្ឋអាមេរិក ដើម្បីធ្វើការលើតន្រ្តី»។

ដូចទស្សនិកជនបានជ្រាបស្រាប់ហើយ ថ្មីៗនេះ BLACKPINK កំពុងរៀបចំគម្រោងជាច្រើន ក្នុងនោះសកម្មភាពបុគ្គលរួមមាន គម្រោង Solo ដែលត្រូវបានរំពឹងទុកយ៉ាងខ្លាំងរបស់ Lisa ក៏ដូចជាគម្រោង K-Drama រឿង Snowdrop ដែលជិតមកដល់របស់ Jisoo។ លើសពីនេះទៀត ខួបលើកទី ៥ របស់ពួកគេ ផលិតកម្មក៏ទើបតែបានប្រកាសអំពីគម្រោង BLACKPINK ៤ + ១ PROJECT នឹងរំលឹកខួបលើកទី ៥ របស់ពួកគេ ដែលមានចាប់តាំងពីការបង្ហាញខ្លួនលើកដំបូងមក៕