មនុស្ស២នាក់របួសធ្ងន់ រីឯរថយន្ត២គ្រឿងឆេះនិងខូចខាតស្ទើរទាំងស្រុង ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយនៅវេលាម៉ោង២០និង៤០នាទី ថ្ងៃទី៩ ខែសីហា ឆ្នាំ២០២១ ត្រង់ចំណុចខាងមុខច្រកចូលបុរីសេរីមង្គល ស្ថិតនៅភូមិទួលក្រសាំង សង្កាត់រកាខ្ពស់ក្រុងតាខ្មៅ ខេត្តកណ្ដាល ។
មន្ត្រីនគរបាលចរាចរក្រុងតាខ្មៅបានឲ្យដឹងថា រថយន្តរងការខូចខាតមាន២គ្រឿង ទី១. រថយន្តម៉ាកឡិចស៊ីស NX200T ពណ៌ស ពាក់ស្លាកលេខភ្នំពេញ 2BO-8772 បើកបរដោយជនមិនទាន់ស្គាល់អត្តសញ្ញាណ។ ចំណែករថយន្តមួយគ្រឿងទៀត ម៉ាកDAEWO ពណ៌ខៀវ ពាក់ស្លាកលេខ ភ្នំពេញ 2D-7735 បើកបរដោយឈ្មោះ ឡេង គឹមសយ ភេទប្រុស អាយុ៥០ឆ្នាំ ស្នាក់នៅភូមិ ព្រែកខ្មែរ ឃុំស្អាងភ្នំ ស្រុកស្អាង ខេត្តកណ្តាល និងអ្នករួមដំណើរត្រូវជាប្រពន្ធឈ្មោះ ប៉ឹត សុជាតិ ភេទស្រី អាយុ៤៦ឆ្នាំ ស្នាក់នៅភូមិឃុំខាងលើ (រងរបួសធ្ងន់ទាំង០២)។
ប្រភពដដែលបន្តថា នៅមុនពេលកើតហេតុ មានរថយន្តមួយគ្រឿងម៉ាកDAEWO ពណ៌ខៀវ ពាក់ស្លាកលេខភ្នំពេញ2D-7735 បើកបរដោយឈ្មោះ ឡេង គឹមសយ និងអ្នករួមដំណើរត្រូវជាប្រពន្ធឈ្មោះប៉ឹត សុជាតិ ក្នុងទិសដៅពីត្បូងទៅជើង រួចបត់ឆ្វេងត្រលប់ក្រោយ ស្របពេលនោះក៏មានរថយន្តមួយគ្រឿងទៀត ម៉ាកឡិចស៊ីសNX200T ពណ៌ស ពាក់ស្លាកលេខភ្នំពេញ 2BO-8772 បើកបរក្នុងទិសដៅពីជើងទៅត្បូង ក៏បានបុកគ្នាពេញមួយទំហឹង បណ្ដាលឲ្យរថយន្តឡិចស៊ីស200T បានរេចង្កូតទៅស្តាំរួចក៏បុកបង្គោលភ្លើងបំភ្លឺផ្លូវមួយដើមឆេះយ៉ាងសន្ធោសន្ធៅ (អ្នកបើកបរគេចខ្លួនបាត់មិនទាន់ស្គាល់អត្តសញ្ញាណ) រីឯរថយន្តម៉ាកDAEWO រងការខូចខាតធ្ងន់ធ្ងរ និងអ្នកបើកបរ២នាក់ប្តីប្រពន្ធរងរបួសធ្ងន់ ត្រូវបានបងប្អូនដឹកយកទៅព្យាបាល នៅគ្លីនិកឯកជនមួយកន្លែងនៅស្រុកស្អាង។
ក្រោយពីមានហេតុការណ៍កើតឡើង កម្លាំងនគរបាលជំនាញក្រុងតាខ្មៅ បានចុះមកកន្លែងកើតហេតុ ធ្វើការពិនិត្យវាស់វែង រួចកសាងសំណុំរឿងដកហូតយករថយន្តទាំង២គ្រឿងទៅរក្សាទុក បណ្ដោះ អាសន្ន នៅអធិការដ្ឋាន ដើម្បី ចាត់ការ តាមនីតិវិធី។
តាមការសន្និដ្ឋានរបស់សមត្ថកិច្ចជំនាញបានឲ្យដឹងថា មូលហេតុដែលមានគ្រោះថ្នាក់កើតឡើង គឺបណ្ដាលមកពីអ្នកបើកបររថយន្ថម៉ាកDAEWO ពណ៌ខៀវបើកបត់ឆ្វេងត្រឡប់ក្រោយ ខ្វះការប្រុងប្រយ័ត្ន និងអ្នកបើកបររថយន្តម៉ាកឡិចស៊ីសNX200T បើកបរក្នុងល្បឿនលឿនដោយខ្វះការប្រុងប្រយ័ត្ន៕
ប្រភព៖ អគ្គស្នងការដ្ឋាននគរបាលជាតិ
មតិយោបល់