(ភ្នំពេញ)៖ មហាជនហាក់មានការចាប់អារម្មណ៍ជាខ្លាំង ពាក់ព័ន្ធនឹងរឿងរ៉ាវជម្លោះប្តីប្រពន្ធរបស់ លោកស្រី ទ្រី ដាណា ដែលមហាជនតែងតែហៅថា ថៅកែចិត្តធម៌ ជាមួយនឹងស្វាមី។ ក្រោយពីបញ្ចេញរឿងក្នុងចិត្តជាបន្តបន្ទាប់ ទម្លាយពីមូលហេតុនៃជម្លោះ ត្រូវស្វាមីវ៉ៃជាច្រើនដង នៅពេលនេះ លោកស្រី ទ្រី ដាណា បានបន្តទម្លាយអារម្មណ៍ពិត បញ្ចេញវោហាស័ព្ទតាមរយ:បណ្តាញសង្គម Facebook ពីរឿងម្តាយក្មេក និងបងប្អូនថ្លៃ ទើបធ្វើឲ្យលោកស្រីមានរឿងរកាំរកូសជាមួយប្តី។

ប៉ុន្មាននាទីមុននេះ លោកស្រី ទ្រី ដាណា បានសរសេរសារដ៏វែងមានមានអត្ថន័យថា «មិនចង់និយាយរឿងគ្រួសារច្រើនទេ តែបើមិនបង្ហាញ គ្រប់គ្នានៅតែច្រឡំចឹង ថាខ្ញុំមិនជួយឪពុកម្ដាយក្មេក បងប្អូនថ្លៃ ធ្វើបុណ្យសម្ដែងជួយតែអ្នកដទៃ(ដោយសារពូម៉ៅឡាយនិយាយបំពានខ្ញុំ)(ក្នុងចេតនាធ្វើឲ្យមហាជនយល់ច្រទ្បំមកលើខ្ញុំ)។ នុស្សក្បែរខ្លួន ខ្ញុំជួយទាំងអស់មុនពេលជួយគេ តែឱ្យខ្ញុំជួយប៉ុណ្ណា ទើបពេញចិត្តប្ដីខ្ញុំ? ខ្សែកពេជ្រ ខ្សែដៃ ពេជ្រ នាឡិកាពេជ្រ មាសទាំងដំឡឹងខ្ញុំជូនពួកគាត់ ពេលបុណ្យទានក៏ខ្ញុំជូនលុយគាត់ទាំងពាន់ ហើយបុណ្យបច្ច័យបួនពួកគាត់ នាងខ្ញុំ ធ្វើ អស់លុយទាំងម៉ឺន ទិញឡានឲ្យគាត់ជិះទៀត បងប្អូនថ្លៃគាត់ក៏ចូលរកស៊ីជាមួយក្រុមហ៊ុនខ្ញុំ សួរថាខ្ញុំគ្មានចិត្តមែន?»។

លោកស្រីបានបន្តថា «ប្រឹងរករាល់ថ្ងៃគ្មានពេលសម្រាក រហូតយប់ជ្រៅម្នាក់ឯង ត្រូវគិតសព្វគ្រប់ ការងារ ការរកស៊ី ក្រុមហ៊ុន តំណាងចែកចាយរាប់ម៉ឺននាក់ ហាងពេជ្រ លើខ្ញុំទាំងអស់ គឺដើម្បីអនាគតគ្រួសារ និងកូនៗ មិនមែនដើម្បីបងប្អូនខាងណាទេ។ គាត់មិនមែនមនុស្សស្រី មិនយល់ថាការទុកដាក់លុយសម្រាប់អនាគតកូនៗ វាសំខាន់ប៉ុណ្ណាទេ។ យើងមិនអាចរកបាន ៥០ យក ២០ ទៅជួយគ្រួសារម្ខាងៗទេ ព្រោះពួកគាត់ក៏មានកូនៗផ្សេងទៀតដែរ ហើយគាត់ក៏ធូរធារហើយដែរ»។

ថៅកែស្រី ទ្រី ដាណា បានបន្ថែមថា « ឪពុកម្ដាយក្មេក ខ្ញុំគោរពណាស់ ព្រោះអត់ពីម្ដាយឪពុកបង្កើតទៅ មានតែពួកគាត់នេះហើយ ជាចាស់ទុំសម្រាប់នាងខ្ញុំ ពុកក្មេកខ្ញុំ ល្អណាស់ ខ្ញុំសរសើរគាត់ គោរពគាត់ ព្រោះគាត់ចង់ឃើញតែកូនបានសុខ មិនដែលរករឿង និយាយចាក់ចូចអីទេ។ មានតែម៉ែក្មេកខ្ញុំ បងប្អូនថ្លៃ និយាយដើមខ្ញុំជាមួយប្ដី ឱ្យតែទៅលេងផ្ទះ មកវិញរករឿងខ្ញុំរហូត ហើយឈាន ដល់វៃដំមកលើរូបខ្ញុំ ដោយសារប្អូនថ្លៃនិងម្តាយក្មេកនិង ជឿហើយធ្លាប់លឺគេថាអណ្តាតម្ដាយក្មេក ពិតណាស់ ឃើញខ្ញុំនៅម្នាក់ឯងគ្មានឪពុកម្ដាយបង្កើតនៅឃុំគ្រង ចង់គ្រប់គ្រងខ្ញុំ ចាត់ចែងលើកម្លាំងញើសឈាមខ្ញុំ»។

លោកស្រី ទ្រី ដាណា ថា «ការជួយអ្នកដទៃ ជាទឹកចិត្តខ្ញុំ ជួយអ្នកក្រលំបាកពិតប្រាកដ ហើយក៏ធ្វើតាមគន្លងឪពុកម្ដាយខ្ញុំ ដើម្បីបំពេញបំណងពួកគាត់។ ពេលគេនិយាយចឹង ខ្ញុំនឹក ខ្ញុំអាណិតឪពុកម្ដាយបង្កើតខ្ញុំ ដែលខ្ញុំមិនទាន់មានលទ្ធភាពបានជួយគាត់ស្រួលផង គាត់ក៏លាទៅបាត់ ឪពុកម្ដាយក្មេកខ្ញុំធូរធារហើយ បងប្អូនថ្លៃក៏ចឹងដែរ មិនគួរច្រណែន ជាមួយអ្នកខ្ញុំជួយទេ។ ខ្ញុំអស់ទ្រាំហើយ ហើយក៏អស់ជម្រើសនិយាយគ្នាផ្ទាល់ដែរ ទើបត្រូវបង្ហាញតាមនេះ ខញុំមិនប្ដូរចិត្តទេ ជួយអ្នកដទៃ ខ្ញុំនឹងបន្តជួយរហូត។ បើប្ដីខ្ញុំច្រណែនរឿងនេះ អាចទៅរកអ្នកណា ដែលជួយគ្រួសារគាត់ បំបេញចិត្តម្ដាយក្មេក និងបងប្អូនថ្លៃគាត់ចុះ»៕