(ភ្នំពេញ)៖ លោក ដួង សុខគា ត្រូវបានមហាជនខ្មែរដឹងថា គឺជាសិល្បករដែលមានចំណេះវិជ្ជាខ្ពង់ខ្ពស់ មានជំនាញផ្នែកសិល្បៈច្បាស់លាស់ និងជាគំរូដល់សិល្បករជំនាន់ក្រោយជាច្រើនផងដែរ ត្បិតថាលោកក្រៅពីមានសមត្ថភាព ក្នុងការច្រៀងភ្លេងការ និងអាយ៉ៃឆ្លើយឆ្លងបុរាណ ជាពិសេសកំណាព្យកាបឃ្លោងពាក្យចុងជួនបែបកំប្លែងស្ងួត ឲ្យអ្នកទស្សនាសើចសប្បាយរីករាយហើយនោះ គឺមានចំណេះដឹងច្រើនផងដែរ។

ដោយឡែក ថ្មីៗនេះក្រោយឃើញមានសកម្មភាពអ្នកដឹកនាំកំប្លែងក្មេងៗហាក់មានកាយវិការនិងពាក្យសំដីខ្លះ ហាក់មិនសមរម្យ មិនមានសីលធម៌ ស្រាប់តែលោក សុខគា ចេញមុខមកអង្វរដល់ពួកគេបែបនេះថា« ខ្ញុសូមអង្វរអ្នកដឹកនាំក្មេងៗ លេងកំប្លែង សូមមេត្តា កុំនាំគ្នាឱ្យប្រើពាក្យអសីលធម៌ កាយវិការមិនសមរម្យ ឱ្យសោះ! គេជាទំពាំង! រឿងសើចសប្បាយ មិនចាំបាច់ឈ្លើយទេ កាចក៏មិនចាំអសីលធម៌ដែរ! សូមមេត្តា អធ្យាស្រ័យ!»។

គួរជម្រាបថា នាពេលបច្ចុប្បន្ន តារាពហុជំនាញជើងចាស់ លោក ដួង សុខគា ក៏នៅតែបន្តការងារលើវិស័យសិល្បៈនេះជាធម្មតា ខណៈដែលមានក្រុមសិល្បៈក្មេងៗជំនាន់ក្រោយចូលមកជាហូរហែរ។ ក្នុងនោះ ថ្វីបើមានរលកក្រោយច្រើនយ៉ាងណាក្តី ក៏ប្រិយភាពរៀមច្បងរូបនេះមិនបានធ្លាក់ចុះនោះទេ ។