(ភ្នំពេញ)៖ តារាចម្រៀងប្រុសល្បីឈ្មោះប្រចាំប្រទេសកម្ពុជា គឺ លោក ខេមរៈ សិរីមន្ត ត្រូវបានមហាជនទូទៅដឹងថា ក្រៅពីមានទឹកដមសំឡេងពិរោះរណ្តំ ត្រូវគ្រប់ប្រភេទចម្រៀងហើយនោះ ងាកមករាងរបស់លោក គឺពិតជាសង្ហារតែម្តង។ ខណៈរាល់ការតុបតែងខ្លួនចេញទៅក្រៅ ចូលរួមកម្មវិធីនានាម្តងៗ គឺលោកមានការតុបតែងខ្លួនឡើងទាក់ទាញតែម្តង ខណៈនៅពីក្រោយនៃការតុបតែងដ៏ទាក់ទាញនេះ គឺត្រូវបានគដឹងថា មានភរិយារបស់លោកនៅពីក្រោយ ជាជំនួយការផ្ទាល់ខ្លួន ដោយលោកតែងតែមានការជួយតុបតែងខ្លួនឲ្យ ដោយភរិយាលោកផ្ទាល់តែម្តង។

ជាការពិតណាស់ ជាច្រើនឆ្នាំមកហើយ តារាចម្រៀង ខេមរៈ សិរីមន្ត មិនបានបើកបង្ហាញពីជីវិតគ្រួសារនោះទេ ទើបតែមួយរយៈចុងក្រោយនេះ តារាចម្រៀងជូរមុខរបស់ផលិតកម្មរស្មីហង្សមាសរូបនេះ ចាប់ផ្ដើមបង្ហាញវត្តមានភរិយារបស់ខ្លួន ដោយមិនខ្វល់ពីការធ្លាក់ប្រជាប្រិយភាពដូចពីមុនឡើយ។ ជាពិសេសភរិយារបស់លោក ត្រូវបានមហាជនពោលសរសើរថា ជាមេផ្ទះដ៏ពូកែ និងល្អិតល្អន់ទៀតផង ដោយអ្នកនាងតែងទៅធ្វើជាជំនួយការរបស់ប្ដី ក្នុងការរៀបចំតុបតែងខ្លួនឲ្យស្វាមី គឺតារាចម្រៀង ខេមរៈ សិរីមន្ត ដោយផ្ទាល់តែម្ដង រាល់ការចេញទៅចូលរួមកម្មវិធីនានា ឬការប្រគុំតន្ត្រីនាពេលកន្លងមកដែលនេះអាចចាត់ទុកថាជាគុណសម្បត្តិមួយដែលធ្វើឲ្យទំនាក់ទំនងប្ដីប្រពន្ធកាន់តែស្អិតល្មួតថែមមួយកម្រិតទៀត។

ជាមួយគ្នានេះដែរលោក ខេមរៈ សិរីមន្ត ក៏បានមកជាមួយសំណេរ បែបនេះថា «កាលពីមុនស្វាមីទៅច្រៀងទៅថតតាមទៅរៀបចំខ្លួនអោយ ឥឡូវស្វាមីទៅបើកគម្រោងដីឡូត៍នៅប៉ោយប៉ែតរកសុីផ្នែកអចលនទ្រព្យក៏ទៅតាមរៀបចំខ្លួនអោយទៀត។ ដូចពាក្យចាស់ថាសំណាបយោងដីស្រីយោងបុរសត្រូវរបស់គាត់មែន»។

សូមបញ្ជាក់ថា តារាចម្រៀង ខេមរៈ សិរីមន្ត ត្រូវបានគេមើលឃើញថា កំពុងទទួលបានជោគជ័យទាំងអាជីពសិល្បៈ និងជំនួញផ្នែកអចលនទ្រព្យ។ ជាក់ស្ដែងលោកបានបើកគម្រោងដីឡូតិ៍នៅក្រុងប៉ោយប៉ែត ខេត្តបន្ទាយមានជ័យ ព្រមទាំងជាអ្នកស្និតជាមួយសេដ្ឋីអចលនទ្រព្យវ័យក្មេង គឺអ្នកឧកញ៉ា ឡេង ណាវ៉ាត្រា ផងដែរ៕